Read Kernewek Kolossianys 1 Bible Online

Kolossianys 1 - Kernewek bible

Kolossianys 1

¹Powl, abostol Krist Yesu dre vodh Duw, ha Timothi agan broder,

²Dhe'n syns ha dhe'n vreder lel yn Krist yn Kolosse: Gras dhywgh hwi ha kres dhiworth Duw agan Tas.[1]

³Ni a ras dhe Dhuw, Tas[2] agan Arloedh Yesu Krist, pup-prys ow pysi ragowgh.

⁴Ni re glewas a'gas fydh yn Krist Yesu hag a'n kerensa usi genowgh troha'n syns oll,

⁵drefenn an govenek yw gwithys ragowgh y'n nevow, a glewsowgh kyns yn ger an gwir, an aweyl,

⁶a dheuth dhywgh hwi, kepar hag yn oll an bys hi a dheg frut ha tevi, kepar dell dyv ynnowgh hwi ynwedh, dhiworth an jydh may klewsowgh ha godhvos gras Duw yn gwirder;

⁷kepar dell dhys'sowgh gans Epafras agan keswas karadow, yw menyster lel a Grist ragowgh hwi,

⁸hag ev re dhiskwedhas dhyn dha gerensa y'n Spyrys.

⁹Rakhenna ni ynwedh, dhiworth an jydh may klewsyn, ny hedhyn pysi ha govynn ragowgh, may fewgh lenwys a wodhvos a'y vodh yn pub furneth ha konvedhes spyrysek,

¹⁰dhe gerdhes gwiw dhe'n Arloedh, ow plegya yn tien, ow toen frut yn pub ober da hag ow tevi yn aswonnvos Duw,

¹¹nerthys gans pub galloes war-lergh krevder y splannder dhe bub perthyans ha godhevyans; gans lowena

¹²ow krassa dhe'n Tas re'gas[3] gwrug gwiw dhe gavoes rann yn eretons an syns y'n golow.

¹³Ev a wrug agan delivra yn-mes a alloes an tewlder ha'gan gorra[4] yn gwlaskor y Vab karadow,

¹⁴yn neb y'gan beus daspren, gevyans peghosow.

¹⁵Imaj yw ev a'n Duw diwel, an kynsa-genys a greashyon oll;

¹⁶rag ynno ev y feu pup-tra gwrys y'n nevow ha war an nor, hewel ha diwel, tronys, domynashyons, prynsipatys po potestatys; pup-tra a veu gwrys dredho ev ha ragdho ev.

¹⁷Hag yma ev a-dherag pup-tra, ha pup-tra a syns war-barth ynno ev.

¹⁸Hag ev yw penn an korf, an eglos, neb yw an dalleth, an kynsa-genys dhiworth an re varow, rag may fo ev an kynsa yn pup-tra.

¹⁹Rag ynno pub leunder a Dhuw a veu plesys dhe driga,

²⁰ha dredho dhe unnverhe pup-tra dhodho, po taklow war an nor po taklow y'n nevow, ow kul kres dre woes y grows.

²¹Ha hwi, ytho, re beu alyons kyns, hag eskerens y'n brys, dre wriansow drog;

²²mes lemmyn ev re wrug unnverheans y'n korf a'y gig der y vernans, dh'agas profya sans, dinamm ha divlam a-dheragdho,

²³mar kwrewgh pesya krev y'n fydh, grondys ha fyrv, heb bos removyes dhiworth govenek an aweyl a glewsowgh, pregewthys yn oll kreashyon yn-dann nev, ha my Powl, eth ha bos menyster anedhi.

²⁴Lemmyn my a lowenha y'm galarow ragowgh, ha my a gowlwra an taklow a fyll dhe baynys Krist y'm kig rag y gorf, yw an eglos.

²⁵My eth ha bos menyster anedhi war-lergh charj Duw res dhymmo ragowgh hwi, dhe gollenwel ger Duw,

²⁶an mysteri kudhys dhiworth an oesow ha'n henedhow, mes diskwedhys lemmyn dh'y syns,

²⁷dhe neb Duw a vynnas diskudha pyth yw rychys splannder an mysteri ma yn mysk an Jentilys, yw Krist ynnowgh hwi, govenek an splannder.

²⁸Ni a'n deriv, ow keski pub den ha dyski pub den yn pub furneth, may kwrellyn profya pub den perfydh yn Krist.

²⁹Rag hemma, my a lavur, ow strivya gans y oberyans owth oberi ynnov gans nerth.