Read Kernewek Kolossianys 3 Bible Online

Kolossianys 3 - Kernewek bible

Kolossianys 3

¹Ytho mar pewgh drehevys gans Krist, gwrewgh hwilas an taklow usi war-vann, le mayth usi Krist owth esedha a dhyghow dhe Dhuw.

²Gwrewgh vri a'n taklow war-vann, a-der a'n taklow war an nor.

³Rag hwi re verwis, ha'gas bewnans yw kudhys gans Krist yn Duw.

⁴Pan vo diskwedhys Krist, agas[12] bewnans, ena hwi ynwedh a vydh diskwedhys ganso yn splannder.

⁵Ytho, gorrewgh dhe'n mernans an pyth ynnowgh usi a'n nor, fornikashyon, plosedhes, hwans dres eghenn, yeunes drog, ha krefni, yw gordhyans idolys,

⁶drefenn a'n re ma y teu sorr Duw war an vebyon a dhiwostytter.[13]

⁷Ynna hwi ynwedh a gerdhi kyns, pan wrewgh bewa y'n taklow ma.

⁸Mes lemmyn gorrewgh dhe-ves hwi ynwedh pup-tra: sorr, konnar, atti, blasfemi, kows plos yn-mes a'gas ganow.

⁹Na wrewgh gowleverel an eyl dh'y gila, wosa diwiska an den koth gans y wriansow ev,

¹⁰ha wosa gwiska an den nowydh, daswrys yn godhvos war-lergh an imaj a neb a'n gwrug.

¹¹Omma nyns eus Grek na Yedhow, trodreghyans nag antrodreghyans, den barbarus, Skythyas, kethwas, den rydh; mes Krist yw pup-tra, hag yn pup-tra yma ev.

¹²Ytho, avel tus dhewisys gans Duw, sans ha karadow, gwiskewgh truedh, kuvder, uvelder, klorder, perthyans,

¹³ow kodhav an eyl y gila, hag ow kava an eyl dh'y gila, mars eus krodhvol war nebonan. Kepar dell avas an Arloedh[14] dhywgh, gwrewgh hwi yndella, ynwedh.

¹⁴Ha dres oll an taklow ma, gwiskewgh kerensa, yw an golmenn a berfydhder.

¹⁵Ha gwres kres Krist[15] rewlya yn agas kolonn, an kres mayth owgh hwi gelwys dhodho yn unn korf; ha godhvydhewgh gras.

¹⁶Triges ger Krist ynnowgh yn rych, ow tyski ha keski an eyl y gila yn pub furneth, ow kana salmow, hymnys ha kanow spyrysek gans gras yn agas kolonn dhe Dhuw.[16]

¹⁷Ha pup-tra oll a wrewgh yn ger po yn gwrians, gwrewgh pup-tra yn hanow an Arloedh Yesu, ow krassa dhe Dhuw an Tas[17] dredho ev.

¹⁸A wragedh, bedhewgh gostydh dh'agas gour, dell yw gwiw y'n Arloedh.

¹⁹A wer, kerewgh agas gwreg, ha na vedhewgh hwerow orti.

²⁰A fleghes, obayewgh dh'agas kerens yn pup-tra, rag hemm yw plegadow dhe'n Arloedh,

²¹A dasow, na brovokyewgh agas fleghes, na vons i digolonnek.

²²A gethwesyon, obayewgh dh'agas arlydhi war-lergh an kig yn pup-tra, a-der gans gonis yw gwelys rag plegya dhe vab-den, mes gans glander kolonn, ow perthi own a'n Arloedh.

²³Pypynag a wrewgh, gwrewgh y oberi a'n enev, kepar dell ve dhe'n Arloedh, a-der dhe vab-den,

²⁴ow kodhvos hwi dhe dhegemmeres gober an eretons dhiworth an Arloedh. Hwi a serv[18] an Arloedh Krist.

²⁵Rag neb a wra kamm a wra degemmeres kessydhyans an pyth a wrug ev kamm, ha nyns eus faverans.