Read Kernewek 1 Thessalonianys 2 Bible Online

1 Thessalonianys 2 - Kernewek bible

1 Thessalonianys 2

¹Hwi a woer, a vreder, nag o agan devedhyans dhywgh yn euver,

²mes wosa godhevel kyns ha bos arvedhys, dell wodhowgh, yn Filippi, yth en ni kolonnek yn agan Duw dhe gewsel orthowgh aweyl Duw, gans strivyans meur.

³Rag ny dheuth agan galow a gammdybyans na plosedhes, nag yn toell,

⁴mes, ha ni kommendys gans Duw may fo gorrys an aweyl yn charj dhyn ni, yndella y kewsyn: ny wren kewsel dhe blegya dhe vab-den, mes dhe Dhuw a brev agan kolonnow.

⁵Rag ny wrussyn bythkweth devnydh a eryow fekyl, dell wodhowgh, na kudhlenn krefni, Duw yn test.

⁶Ny wrussyn hwilas gordhyans dhiworth mab-den, na dhiworthowgh hwi na dhiworth tus erell,

⁷kyn hyllyn poesa warnowgh avel abesteli Krist. Mes klor[3] en ni yn agas mysk kepar ha mammeth ow chershya hy fleghes.

⁸Ytho, ha ni hirethek war agas lergh, pes da en ni ow profya dhywgh aweyl Duw hag ynwedh agan enevow ni rag hwi dhe vos ha bos meurgerys genen.

⁹Rag hwi a berth kov, a vreder, a'gan lavur ha'gan hwel. Owth oberi dydh ha nos ma na worren begh warnowgh, ni a bregowthas dhywgh aweyl Duw.

¹⁰Hwi yw testow, ha Duw ynwedh, fatell en ni sans ha gwiryon ha divlam dhywgh hwi neb a grys.

¹¹Hwi a woer fatell wrussyn ni agas dyghtya, pubonan ahanowgh, kepar dell wra tas y fleghes ev,

¹²orth agas ynnia ha'gas kennertha, ha'gas konjorya may hwrellewgh kerdhes gwiw dhe Dhuw usi orth agas gelwel dh'y wlaskor ha'y splannder.

¹³Ha rakhemma ni ynwedh a ras dhe Dhuw heb hedhi, pan dhegemmersowgh ger Duw a glewsowgh ahanan, na wrussowgh y dhegemmeres avel ger mab-den, mes avel ger Duw, dell yw yn hwir, a wra oberi ynwedh ynnowgh hwi neb a grys.

¹⁴Rag hwi, a vreder, re holyas ensampel eglosyow Duw usi yn Yudi yn Krist Yesu, rag hwi ynwedh a wodhev an keth taklow ma dhiworth agas pobel agas honan dell wrussons godhav gans an Yedhewon,

¹⁵a wrug ladha an Arloedh Yesu Krist ha'n brofoesi,[4] ha'gan helghya yn-mes heb plegya dhe Dhuw, hag owth arvedh pub den oll,

¹⁶orth agan lettya a gewsel orth an Jentilys may fens i selwys, may hwrellens kollenwel aga feghosow pup-prys. Mes an sorr a dheuth warnedha wortiwedh.

¹⁷Mes, ha ni diberthys[5] dhiworthowgh, a vreder, unn pols byghan, y'n korf a-der y'n kolonn, dhe voy yth esa hwans dhyn dhe weles agas fas, meur agan yeunadow.

¹⁸Rakhenna, ni a vynna dos dhywgh hwi, my Powl unnweyth ha diwweyth, ha Satnas a'gan lettyas.

¹⁹Rag pyth yw agan govenek po agan lowena po kurun agan bost — a nyns yw hwi, a-rag agan Arloedh Yesu Krist, orth y dhevedhyans?

²⁰Rag hwi yw agan splannder ha'gan lowena.