Read Kernewek 1 Thessalonianys 3 Bible Online

1 Thessalonianys 3 - Kernewek bible

1 Thessalonianys 3

¹Ytho, pan na yllyn perthi na fella, pes da en ni dhe vos gesys agan honan yn Athenys,

²ha ni a dhannvonas Timothi, agan broder ha kesoberer Duw yn aweyl Krist,[6] rag agas fastya ha'gas kennertha yn agas fydh,

³ma na vo denvyth troblys y'n galarow ma, rag hwi a woer bos hemma agan rann,

⁴rag ni a leveris dhywgh kyns, hwath pan esen ni genowgh hwi, y fedhen gweskys, kepar dell hwarva yn hwir, dell wodhowgh.

⁵Rakhenna pan na wrugavy perthi na fella, my a dhannvonas dhe wodhvos agas fydh, rag own a'n tempter dh'agas previ yn neb maner ha'gan lavur dhe bos euver.

⁶Mes Timothi re dheuth nammnygen dhyn ni dhiworthowgh, ha derivas dhyn nowodhow da a'gas fydh ha'gas kerensa, ha hwi dhe berthi kov da ahanan pup-prys, ha hwi hwansek dh'agan gweles, kepar dell on ni dh'agas gweles hwi;

⁷rakhenna kennerthys en ni, a vreder, a-dro dhywgh, yn agan galar ha'gan anken oll der agas fydh.

⁸Rag ni a vew lemmyn mar sevowgh hwi y'n Arloedh.

⁹Py gras ytho a yllyn ni daskorr dhe Dhuw ahanowgh hwi oll, hag a'n lowena may lowenhyn ragowgh a-dherag agan Duw,

¹⁰ow pysi yn tiwysyk dydh ha nos a weles agas fas ha kollenwel an pyth a fyll yn agas fydh?

¹¹Lemmyn agan Duw ha Tas y honan, ha'gan Arloedh Yesu re'gan gittyo yn agan fordh dhywgh hwi,

¹²ha'n Arloedh re wrello dhywgh ynkressya ha palshe yn kerensa an eyl dh'y gila, ha dhe bub den kepar dell wren ni ynwedh dhywgh hwi,

¹³dhe fastya agas kolonn divlam yn sansoleth a-dherag agan Duw ha Tas orth devedhyans agan Arloedh Yesu Krist gans y syns oll.[7]