Read Kernewek Yoshua 1 Bible Online

Yoshua 1 - Kernewek bible

Yoshua 1

¹Lemmyn wosa mernans Moyses gwas an ARLOEDH, an ARLOEDH a gewsis dhe Yoshua mab Nun, menyster Moyses, ow leverel,

²‘Marow yw Moyses ow gwas. Sav lemmyn ha ke dres an Yordan ma, ty hag oll an bobel ma, dhe'n tir a rov dhedha, dhe'n Ysraelysi.

³Pub tyller may trett godhen agas troes warnodho, my re'n ros dhywgh, kepar ha dell gewsis vy dhe Moyses.

⁴A'n gwylvos ha'n Lebanon ma bys y'n avon vras, an avon Ewfrates, oll tir an Hyttysi bys y'n mor bras y'n howlsedhes a vydh agas tiredh.

⁵Ny sev gour vyth er dha bynn oll dydhyow dha vewnans. Kepar dell en vy gans Moyses, my a vydh genes jy; ny wrav dha eskasa na'th forsakya.

⁶Bydh krev ha bydh kolonnek; rag ty re wrug dhe'n bobel ma erita an tir a des dh'aga thasow y ri dhedha.

⁷Mes bydh krev ha bydh pur golonnek, ow kwaytyas gul war-lergh oll an lagha a erghis Moyses ow gwas dhis; na dreyl dhiworti dhe'n barth dhyghow na dhe'n barth kledh, rag bos siwena dhis plepynag yth edh.

⁸Ny dhiberth an lyver ma a'n lagha dhiworth dha anow, mes ty a ombreder warnodho dydh ha nos, rag may hwaytti gul war-lergh pup-tra yw skrifys ynno. Rag ena ty a wra dhe'th fordh spedya, hag ena y fydh dhis siwena.

⁹A ny erghis dhis? Bydh krev ha bydh kolonnek; na borth own ha na vydh dyegrys, rag bos an ARLOEDH dha Dhuw genes plepynag yth edh.’

¹⁰Ytho Yoshua a erghis dhe soedhogyon an bobel,

¹¹‘Tremenewgh der an kamp, hag erghewgh dhe'n bobel: “Pareusiwgh agas boes; rag kyns penn tri dydh hwi a vydh ow treusi an Yordan ma, rag dos dhe erita an tir usi an ARLOEDH agas Duw ow ri dhywgh dh'y bewa.” ’

¹²Dhe'n Rewbenysi, ha dhe'n Gadysi, ha dhe'n hanter-loeth Manasse, Yoshua a gewsis, ow leverel,

¹³‘Perthewgh kov a'n pyth a worhemmynnis Moyses gwas an ARLOEDH dhywgh, ow leverel, “Yma an ARLOEDH agas Duw ow ri powesva dhywgh, hag ev a re dhywgh an pow ma.”

¹⁴Agas benynes, agas re vyghan, ha'gas gwarthek a yll gortos y'n tir a ros Moyses dhywgh dres an Yordan. Mes hwi a dreus arayys rag kas kyns agas breder, oll an gasoryon, ha hwi a's gweres,

¹⁵bys pan re an ARLOEDH powes dh'agas breder kepar ha hwi, hag i ynwedh a erit an tir usi an ARLOEDH agas Duw ow ri dhedha. Hwi a dhehwel dhe dir agas eretons ha'y gemmeres yn perghennogeth, an tir a ros Moyses gwas an ARLOEDH dhywgh dres an Yordan troha'n howldrehevel.’

¹⁶I a worthybis dhe Yoshua, ow leverel: ‘Pup-tra a worhemmynnsys dhyn, ni a'n gwra, hag yth en ni plepynag y'gan dannvenydh.

¹⁷Par dell glewsyn pup-tra gans Moyses, yndella ni a glew genes. Lemen re bo an ARLOEDH dha Dhuw genes, par dell o gans Moyses!

¹⁸Piwpynag a vo diwostydh dhe'th arghadow ha neb na woslow orth dha lavarow, pup-tra a worhemmynnydh dhodho, a vydh gorrys dhe'n mernans. Mes bydh krev ha bydh kolonnek.’