Read Kernewek Yoshua 10 Bible Online

Yoshua 10 - Kernewek bible

Yoshua 10

¹Pan glewas Adoni-sedek myghtern Yerusalem, Yoshua dhe gemmeres Ay ha'y sakra dhe dhistruyans, dell wrussa dhe Yeriko ha'y myghtern, ha bos annedhysi Gibeon yn kres gans Ysrael hag yth esens trigys yn aga mysk,

²ev a'n jeva own meur; rag Gibeon o sita vras, kepar hag onan an sitys ryel; hi o brassa ages Ay, hag oll hy gwer o kasoryon alloesek.

³Ytho Adoni-sedek myghtern Yerusalem a dhannvonas messaj dhe Hoham myghtern Hebron, ha dhe Piram myghtern Yarmuth, ha dhe Yafia myghtern Lakish, ha dhe Debir myghtern Eglon, ow leverel,

⁴‘Dewgh yn-bann dhe'm gweres, ha ni a wesk Gibeon; rag hi re wrug kres gans Yoshua ha gans an Ysraelysi’

⁵Ena pymp myghtern an Amorysi — myghtern Yerusalem, myghtern Hebron, myghtern Yarmuth, myghtern Lakish ha myghtern Eglon — a omguntellas war-barth ha dos yn-bann gans oll aga luyow ha kampya erbynn Gibeon, hag omladh er hy fynn.

⁶Gwer Gibeon a dhannvonas dhe Yoshua dhe'n lu yn Gilgal, ow leverel, ‘Na forsak dha wesyon; deus yn-bann dhyn uskis, ha saw ni, ha gweres ni; rag oll myghternedh an Amorysi yn vro venydhyek re omguntellas er agan pynn.’

⁷Ytho Yoshua eth yn-bann dhiworth Gilgal, ev hag oll an soudoryon ganso, hag oll an gasoryon.

⁸An ARLOEDH a leveris dhe Yoshua, ‘Na borth own anedha, rag my re's ros y'th leuv; ny sev gour anedha a-dheragos.’

⁹Ytho Yoshua a dheuth dhedha distowgh, wosa kerdhes yn-bann oll an nos dhiworth Gilgal.

¹⁰An ARLOEDH a's gorras yn deray a-rag Ysrael, hag i a's gweskis glan orth Gibeon, ha'ga chasya war fordh-yskynna Beth-horon, ha'ga gweskel bys Azeka ha bys Makkeda.

¹¹Pan esens ow fia a-rag Ysrael war an fordh yn-nans dhe Beth-horon, an ARLOEDH a dewlis keserennow bras warnedha dhiworth nev bys Azeka, hag i a verwis; moy anedha a verwis drefenn an keserennow es dell veu ledhys gans kledhedhyow an Ysraelysi.

¹²Ena Yoshua a gewsis dhe'n ARLOEDH y'n jydh pan dhelivras an ARLOEDH an Amorysi dhe'n Ysraelysi, hag ev a leveris yn golok Ysrael, ‘Howl, sav stag yn Gibeon, ha ty Loer, yn nans Ayyalon.’

¹³Ha'n howl a sevis stag, ha'n loer a hedhis, bys pan gemmersa an genedhel dial war hy eskerens. A nyns yw skrifys hemma yn Lyver Yashar? An howl a hedhis yn kres an nev ha ny fistenas dhe sedhi a-dro dhe dhydh kowal.

¹⁴Ny feu dydh kepar ha henna kyns po a-wosa, pan woslowas an ARLOEDH orth lev gour; rag an ARLOEDH a omladhas rag Ysrael.

¹⁵Ena Yoshua a dhehwelis, hag oll Ysrael ganso, dhe'n kamp yn Gilgal.

¹⁶Mes an pymp myghtern ma a fias hag omgudh yn kav yn Makkeda.

¹⁷Ha derivys veu dhe Yoshua, ‘An pymp myghtern re beu kevys, kudhys y'n kav yn Makkeda.’

¹⁸Yn-medh Yoshua, ‘Rolyewgh meyn bras erbynn ganow an kav, ha settya gwer warnodho rag aga gwitha;

¹⁹mes hwi, na wortewgh; chasyewgh war-lergh agas eskerens, hag omsettyewgh a-dhelergh dhedha. Na esiwgh i dhe entra yn aga sitys, rag an ARLOEDH agas Duw re's ros yn agas leuv.’

²⁰Yoshua ha'n Ysraelysi a's gweskis gans ladhva vras, ha'ga distrui glan, mes re anedha a dhienkas, ha mos bys y'n sitys kerys.

²¹Ena an lu kowal a dhehwelis dhe Yoshua y'n kamp yn Makkeda yn sawder; ny lavasas denvyth kewsel ger erbynn mebyon Ysrael.

²²Yoshua a leveris, ‘Igerewgh ganow an kav ha drewgh yn-mes dhymm an pymp myghtern ma dhiworth an kav.’

²³I a wrug yndella, ha dri yn-mes dhodho an pymp myghtern ma dhiworth an kav, myghtern Yerusalem, myghtern Hebron, myghtern Yarmuth, myghtern Lakish ha myghtern Eglon.

²⁴Pan dhrosons yn-mes an vyghternedh ma dhe Yoshua, Yoshua a elwis oll gwer Ysrael ha leverel dhe gaslewydhyon an soudoryon eth ganso, ‘Dewgh nes, gorrewgh agas treys war konnaow an vyghternedh ma.’ I a dheuth nes ha gorra aga threys war aga honnaow.

²⁵Yoshua a leveris dhedha, ‘Na berthewgh own ha na vedhewgh digolonnek. Bedhewgh krev ha hardh; rag an ARLOEDH a wra yndella dhe oll agas eskerens a omledhowgh er aga fynn.’

²⁶A'y wosa Yoshua a's gweskis ha'ga ladha, ha'ga kregi dhiworth pymp gwydhenn. Hag yth esens ow kregi dhiworth an gwydh bys y'n gorthugher.

²⁷Yn termyn an howlsedhes Yoshua a worhemmynnis, hag i a's kemmeras yn-nans dhiworth an gwydh hag a's tewlis dhe'n kav le mayth omgudhsens; i a worras meyn bras yn ganow an kav, hag ymons ena poran y'n jydh ma.

²⁸Yoshua a gemmeras Makkeda an jydh na, ha gweskel an sita ha'y myghtern gans min an kledha; ev a's sakras dhe dhistruyans, ha peub esa ynni; ny asas denvyth dhe vos gesys. Hag ev a wrug dhe vyghtern Makkeda dell wrussa dhe vyghtern Yeriko.

²⁹Ena Yoshua a dremenas a Makkeda, hag oll Ysrael ganso, dhe Libna, hag omladh erbynn Libna.

³⁰Ha'n ARLOEDH a ros an sita na ynwedh ha'y vyghtern yn leuv Ysrael; Yoshua a's gweskis gans vin an kledha, ha peub esa ynni; ny asas dhe vos gesys remenant ynni; hag ev a wrug dh'y myghtern dell wrussa dhe vyghtern Yeriko.

³¹Ena Yoshua a dremenas dhiworth Libna dhe Lakish, hag oll Ysrael ganso, ha kampya hag omladh er hy fynn.

³²An ARLOEDH a ros Lakish yn leuv Ysrael, hag Yoshua a's kemmeras an nessa dydh, ha'y gweskel gans vin an kledha, ha peub esa ynni, dell wrussa dhe Libna.

³³Ena Horam myghtern Gezer a dheuth yn-bann dhe weres Lakish; ha Yoshua a'n gweskis ev ha'y bobel, bys pan na veu gesys dhodho denvyth yn few.

³⁴Dhiworth Lakish Yoshua a dremenas dhe Eglon hag oll Ysrael ganso, ha kampya hag omladh er hy fynn;

³⁵hag i a's kemmeras y'n jydh na, ha'y gweskel a vin an kledha; ha peub esa ynni ev a sakras dhe dhistruyans, dell wrussa dhe Lakish.

³⁶Ena Yoshua eth yn-bann hag oll Ysrael ganso dhiworth Eglon dhe Hebron; hag i a omladhas er hy fynn,

³⁷i a's kemmeras, ha'y gweskel a vin an kledha, ha'y myghtern hag oll hy threvow, ha peub esa ynni. Ny asas dhe vos gesys denvyth, dell wrussa dhe Eglon; ev a's sakras dhe dhistruyans, hi ha peub esa ynni.

³⁸Ena Yoshua a dreylyas a-dro hag oll Ysrael ganso dhe Debir hag omladh er hy fynn.

³⁹Ev a's kemmeras, hi ha'y myghtern hag oll hy threvow; i a's gweskis a vin an kledha, ha sakra dhe dhistruyans peub esa ynni; ny asas dhe vos gesys denvyth; dell wrussa dhe Hebron, yndella ev a wrug dhe Debir ha'y myghtern, ha kepar dell wrussa dhe Libna ha'y myghtern.

⁴⁰Ytho Yoshua a weskis oll tir an vro venydhyek, an Negeb, an Shefela ha'n ledrow hag oll aga myghternedh; ny asas dhe vos gesys denvyth. Ev sakras dhe dhistruyans pup-tra a anellas, dell worhemmynnis an ARLOEDH, Duw Ysrael.

⁴¹Ytho Yoshua a's gweskis dhiworth Kadesh-barnea dhe Gaza, hag oll tir Goshen, mar bell avel Gibeon.

⁴²Yoshua a gemmeras oll an vyghternedh ma ha'ga thir yn unn kaskyrgh, drefenn an ARLOEDH, Duw Ysrael, dhe omladh rag Ysrael.

⁴³Ena Yoshua a dhehwelis hag oll Ysrael ganso dhe'n kamp yn Gilgal.