Read Kernewek Yoshua 11 Bible Online

Yoshua 11 - Kernewek bible

Yoshua 11

¹Pan glewas Yabin myghtern Hasor a'n traow ma, ev a dhannvonas dhe Yobab myghtern Madon, ha dhe vyghtern Shimron, ha dhe vyghtern Akshaf,

²ha dhe'n vyghternedh an gledhbarth y'n vro venydhyek hag y'n Araba a'n dyghow dhe Kinnereth, hag y'n Shefela, hag yn Nafoth-dor a'n howlsedhes,

³ha dhe'n Kananysi a'n howldrevel hag a'n howlsedhes, an Amorysi, an Hittysi, an Perizzysi, ha'n Yebusysi y'n vro venydhyek, ha dhe'n Hivysi yn-dann Hermon yn pow Mispa.

⁴I eth yn-mes, i hag oll aga luyow gansa, ost bras, avel an tewes war vin an mor orth niver, gans lies margh ha meur a jarettow.

⁵Oll an vyghternedh ma a omguntellas war-barth, hag i a dheuth ha kampya war-barth ryb dowrow Merom, rag omladh erbynn Ysrael.

⁶An ARLOEDH a leveris dhe Yoshua, ‘Na borth own a'ga govis: rag a-vorow dhe'n prys ma my a's delirv, pubonan ledhys, a-rag Ysrael: ty a evredh aga mergh, ha leski aga charettow gans tan.’

⁷Ytho Yoshua a dheuth a-dhesempis, hag oll an soudoryon ganso, er aga fynn ryb dowrow Merom, ha koedha warnedha;

⁸ha'n ARLOEDH a's ros yn leuv Ysrael, neb a's gweskis hag a's chasyas bys yn Sidon Meur, ha bys yn Misrefoth-maym, ha bys yn nans Mispe troha'n howldrevel; hag i a's gweskis, bys pan nag esa gesys dhedha remenant vyth.

⁹Ha Yoshua a wrug dhedha dell worhemmynnis an ARLOEDH dhodho: ev a evredhis aga mergh, ha leski aga charettow gans tan.

¹⁰Ena y'n termyn na Yoshua a dreylyas dhe-dre, ha kemmeres Hasor, ha gweskel hy myghtern gans an kledha: rag seulabrys Hasor a veu penn oll an gwlaskordhow na.

¹¹I a weskis oll an dus esa ynni gans min an kledha, orth aga sakra dhe dhistruyans: nyns esa gesys kreatur vyth dhe anella: hag ev a loskas Hasor gans tan.

¹²Yoshua a gemmeras oll sitys an vyghternedh na, hag oll aga myghternedh, ha'ga gweskel gans min an kledha, orth aga sakra dhe dhistruyans, dell worhemmynnsa Moyses gwas an ARLOEDH.

¹³Mes ny loskas Ysrael nagonan a'n sitys usi hwath ow sevel war grugow, marnas Hasor, a wrug Yoshua hy leski.

¹⁴An Ysraelysi a byllas oll preydh an sitys ma ha gwitha ragdha aga honan an bestes ha'n preydh arall; mes i a weskis oll an dus gans min an kledha, bys pan y's distrusens oll. Ny assons dhe vewa denvyth a anellas.

¹⁵Kepar dell worhemmynnis an ARLOEDH dhe Moyses y was, yndella Moyses a worhemmynnis dhe Yoshua, hag yndella Yoshua a wrug; ny asas travyth heb y wul dhiworth oll a worhemmynnis an ARLOEDH dhe Moyses.

¹⁶Ytho Yoshua a gemmeras oll an tir ma, an vro venydhyek, hag oll an Negeb, hag oll tir Goshen, ha'n Shefela, ha'n Araba, ha bro venydhyek Ysrael ha'y Shefela,

¹⁷dhiworth menydh Halak, a omdhrehav war-tu Seir, bys yn Baal-gad yn nans Lebanon yn-dann venydh Hermon: ev a gemmeras oll aga myghternedh, ha'ga gweskel ha'ga gorra dhe'n mernans.

¹⁸Lies dydh Yoshua a werryas erbynn oll an vyghternedh na.

¹⁹Nyns esa sita a wrug kres gans mebyon Ysrael, marnas an Hivysi trigys yn Gibeon: i a's gemmeras oll yn kas.

²⁰Y feu an ARLOEDH y honan grevhas aga holonnow, may tothyens erbynn Ysrael yn kas, rag aga sakra dhe dhistruyans, ha ma na's teffa mersi, mes rag ma's distrua, dell worhemmynnis an ARLOEDH dhe Moyses.

²¹Y'n termyn na Yoshua a dheuth ha treghi an Anakim dhiworth an vro venydhyek, dhiworth Hebron, dhiworth Debir, dhiworth Anab, ha dhiworth oll vro venydhyek Yuda, ha dhiworth oll vro venydhyek Ysrael: Yoshua a's sakras dhe dhistruyans gans aga threvow.

²²Nyns esa gesys an Anakim yn tir an Ysraelysi, mes nebes a veu gesys yn Gaza, yn Gath, hag yn Ashdod.

²³Ytho Yoshua a gemmeras an tir oll, war-lergh oll re lavarsa an ARLOEDH dhe Moyses: ha Yoshua a'n ros avel eretons dhe Ysrael war-lergh rannow aga loethow. Ha'n tir a'n jeva kres dhiworth bresel.