Read Kernewek Yoshua 14 Bible Online

Yoshua 14 - Kernewek bible

Yoshua 14

¹An re ma yw an tiryow a eritas mebyon Ysrael yn pow Kanan, a veu rynnys dhedha avel eretons gans Yoshua mab Nun ha pennow teyluyow loethow Ysrael.

²Aga tiredh o rynnys dhedha gans koelbrenn, dell worhemmynnis an ARLOEDH dhe Moyses rag an naw loeth ha'n hanter-loeth.

³Moyses a ros eretons dres an Yordan dhe dhew loeth ha hanter-loeth; mes ny ros eretons dhe'n Levysi yn aga mysk.

⁴Rag mebyon Yosep o dew loeth, Manasse hag Efraym. Ny veu rann y'n tir res dhe'n Levysi, marnas sitys dhe driga ynna, gans aga feurvaow rag aga flokkys ha'ga greow.

⁵An Ysraelysi a rannas an tir war-lergh gorhemmynn an ARLOEDH dhe Moyses.

⁶Ena mebyon Yuda a dheuth dhe Yoshua yn Gilgal; ha Kaleb mab Yefunne an Kenizzyas a leveris dhodho, ‘Ty a woer an pyth a leveris an ARLOEDH dhe Moyses gour Duw yn Kadesh-barnea y'm kever hag y'th kever.

⁷Dew-ugens bloedh en vy pan y'm dannvonas Moyses gwas an ARLOEDH dhiworth Kadesh-barnea rag aspia an tir; ha my a dhros dhodho derivas war-lergh an pyth a veu y'm kolonn.

⁸Byttegyns ow breder eth yn-bann genev a wrug kolonn an dus teudhi yn own; mes my a besyas len dhe'n ARLOEDH ow Duw.

⁹Moyses a dos y'n jydh na, “Surredi an tir may trettyas dha dreys warnodho a vydh eretons ragos ha rag dha vebyon bys vykken, drefenn ty dhe besya len dhe'n ARLOEDH ow Duw.”

¹⁰Ytho lemmyn, awotta, an ARLOEDH re'm gwithas yn few, dell leveris, an pymp blydhen ha dewgens ma a-dhia'n termyn a gewsis an ARLOEDH an ger ma orth Moyses, pan esa Ysrael ow vyajya y'n gwylvos; hag ottavy y'n jydh ma, pymp bloedh ha peswar-ugens ow oes.

¹¹Yth ov vy hwath mar grev y'n jydh ma dell en y'n jydh a'm dannvonas Moyses; ow nerth lemmyn yw par dell o ow nerth ena, rag bresel, ha rag mos dhe-ves ha rag dos a-bervedh.

¹²Ytho ro dhymm an vro venydhyek ma, a gewsis anodho an ARLOEDH y'n jydh na. Ty dha honan a glewas y'n jydh na bos an Anakim ena, ha bos an sitys bras ha kerys; martesen an ARLOEDH a vydh genev, ha my a's fes, dell leveris an ARLOEDH.’

¹³Yoshua a'n bennigas, hag ev a ros Hebron dhe Kaleb mab Yefunne rag eretons.

¹⁴Ytho Hebron a dheuth ha bos eretons Kaleb mab Yefunne an Kenizzyas bys y'n jydh ma, drefenn ev dhe besya len dhe'n ARLOEDH, Duw Ysrael.

¹⁵Kiryath-arba o hanow Hebron kyns; an Arba ma o den bras yn mysk an Anakim. Ha'n tir a'n jevo powes a vresel.