Read Kernewek Yoshua 18 Bible Online

Yoshua 18 - Kernewek bible

Yoshua 18

¹Oll kuntelles mebyon Ysrael a omguntellas yn Shilo, ha settya ena tylda an kuntelles. Ha'n tir a veu fethys a-ragdha.

²Mes gesys veu yn mysk an Ysraelysi seyth loeth na dhegemmersa aga eretons.

³Yoshua a leveris dhe'n Ysraelysi, ‘Pes termyn a vydhowgh logh ow mos dhe gemmeres yn perghennogeth an tir re ros dhywgh an ARLOEDH, Duw agas tasow?

⁴Apoyntyewgh ragowgh tri gour dhiworth pub loeth, ha my a's dannvon dhe gerdhes der an tir, ha'y arhwithra, ha diskwedhes eretons pub loeth, hag ena dehweles dhymm.

⁵Rynnewgh an tir yn seyth rann. Yuda a bes yn y diredh a'n dhyghowbarth, ha chi Yosep a bes yn aga thiredh a'n gledhbarth.

⁶Arhwithrewgh an tir yn seyth rann ha drewgh an manylyon omma dhymm. My a dewl prennyer ragowgh omma a-rag an ARLOEDH agan Duw.

⁷Mes nyns eus rann yn agas mysk dhe'n Levysi, rag oferyaseth an ARLOEDH yw aga eretons. Gad, Rewben ha hanter-loeth Manasse re dhegemmeras aga eretons dres an Yordan troha'n howldrevel, a ros dhedha Moyses gwas an ARLOEDH.’

⁸Ytho an wer a sevis ha mos; ha Yoshua a worhemmynnis dhedha arhwithra an tir, ow leverel, ‘Kewgh ha kerdhewgh der an tir ha'y arhwithra, ha dehwelewgh dhymm; ha my a dewl prennyer ragowgh omma a-rag an ARLOEDH yn Shilo.’

⁹Ytho an wer eth ha tremena der an tir ha'y arhwithra, ha'y skrifa war-lergh an sitys yn lyver, yn seyth rann. Ena i a dheuth dhe Yoshua y'n kamp yn Shilo.

¹⁰Yoshua a dewlis prennyer ragdha yn Shilo a-rag an ARLOEDH; hag ena Yoshua a rannas an tir dhe'n Ysraelysi war-lergh aga rannow.

¹¹Hemm yw an koelbrenn a dheuth yn-bann rag loeth an Benyaminysi war-lergh aga theyluyow. Yth esa an or rynnys dhedha gans an koelbrenn yntra mebyon Yuda ha mebyon Yosep.

¹²Yth esa aga or war denewen an gledhbarth ow talleth dhiworth an Yordan; ha'n or eth yn-bann dhe leder Yeriko a'n gledhbarth, ha mos yn-bann troha'n howlsedhes bys y'n vro venydhyek; hag yth esa hy diwedh yn gwylvos Beth-aven.

¹³An or eth alena war-tu ha Luz, dhe leder Luz (yw Bethel), war-tu ha'n dyghow; ha'n or eth yn-nans dhe Ataroth-addar, war an vre a'n dyghow dhe Beth-horon a-is.

¹⁴Ena an or a dreylyas dhe'n dyghow orth denewen an howlsedhes dhiworth an vro venydhyek a-ugh Beth-horon, hag yth esa hy diwedh a veu yn Kiryath-baal, (yw Kiryath-yearim). Yth o an sita ma dhe Yuda. Hemma a veu tenewen an howlsedhes.

¹⁵Tenewen an dyghow a veu dhiworth amal Kiryath-yearim y'n howlsedhes; ha'n or eth yn-mes orth fenten dowrow Neftoagh.

¹⁶An or eth yn-nans dhe amal an vre a'n est dhe nans Mab-hinnom, a'n kledh dhe nans Refaim; hi eth yn-nans yn nans Hinnom, dhe leder dyghow an Yebusysi, hag ena dhe En-rogel

¹⁷Ena hi a dreylyas dhe'n gledhbarth ha mos dhe En-shemesh, ha Geliloth, usi a-dal bolgh Adummim; ha mos yn-nans dhe Ven Bohan, mab Rewben.

¹⁸Hi a besyas troha'n leder a-dal Araba dhe'n gledhbarth ha mos yn-nans dhe'n Araba.

¹⁹An or a dremenas dhe'n gledhbarth a leder Beth-hogla, hag yth esa hy finweth yn taves kledh Mor an Hoelan yn ganow dyghow an Yordan: hemma a veu or an dyghow.

²⁰An Yordan a veu an or war denewen an howldrevel. Hemm o eretons mebyon Benyamin, kylghenn dien aga oryon war-lergh aga theyluyow.

²¹Sitys loeth mebyon Benyamin war-lergh aga theyluyow o Yeriko, Beth-hogla, Emek-kesis,

²²Beth-araba, Semarim, Bethel,

²³Avvim, Para, Ofra,

²⁴Kefar-ammoni, Ofni, ha Geba: dewdhek sita gans aga godrevow.

²⁵Yth esa ynwedh Gibeon, Rama, Beeroth,

²⁶Mispe, Kefira, Mosa,

²⁷Rekem, Yrpeel, Tarala,

²⁸Sela, Elef, Yebus (honn yw, Yerusalem), Gibea ha Kiryath-yearim: peswardhek sita gans aga godrevow. Hemm yw eretons loeth Benyamin war-lergh aga theyluyow.