Read Kernewek Yoshua 20 Bible Online

Yoshua 20 - Kernewek bible

Yoshua 20

¹An ARLOEDH a leveris dhe Yoshua,

²‘Lavar dhe vebyon Ysrael, “Gwrewgh ragowgh an sitys meneghi, a gewsis dhywgh anedha dre leuv Moyses,

³may fio bys di ladher a wysk den dre wall ha heb entent; hag i a vydh agas meneghi dhiworth dialor an woes.

⁴Ev a fi dhe onan a'n sitys ma ha sevel yn daras yet an sita, ha styrya an kas yn skovornow henavogyon an sita na. I a'n kemmer a-ji dhe'n sita, ha ri dhodho tyller, may trikko gansa.

⁵Pan dho dialor an woes war y lergh, ny dhelivrons an ladher dh'y leuv, rag ev dhe weskel y gentrevek heb godhvos, ha heb atti kyns.

⁶Ev a drig y'n sita na bys pan sev a-dherag an guntelles rag breus, bys mernans an arghoferyas esa y'n prys na: ytho an ladher a dhehwel, ha dos dh'y sita ha dh'y ji, dhe'n sita le may fias dhiworti.” ’

⁷I a sakras Kedesh yn Galile yn bro venydhyek Naftali, ha Shekem yn bro venydhyek Efraym, ha Kiryath-arba (yw Hebron) yn bro venydhyek Yuda.

⁸Dres an Yordan troha'n howldrevel a Yeriko, i a ros Beser y'n gwylvos war an ughelgompesenn, dhiworth loeth Rewben, ha Ramoth yn Gilead, dhiworth loeth Gad, ha Golan yn Bashan, dhiworth loeth Manasse.

⁹An re ma yw an sitys apoyntys rag oll an Ysraelysi, ha rag an alyon trigys yn aga mysk, may fia bys di ladher a wysk den heb godhvos, ma na varwa dre leuv dialor an woes, kyns ev dhe sevel a-rag an guntelles.