Read Kernewek Yoshua 23 Bible Online

Yoshua 23 - Kernewek bible

Yoshua 23

¹Lies blydhen a-wosa, a-ban rosa an ARLOEDH powes dhe Ysrael a-dhiworth oll aga eskerens y'n kyrghynn, ha pan o Yoshua gyllys koth yn y dhydhyow,

²Yoshua a elwis oll Ysrael, aga henavogyon, aga rewloryon, aga breusysi ha'ga soedhogyon, ha leverel dhedha, ‘Gyllys koth ov lemmyn y'm dydhyow;

³ha hwi re welas pup-tra re wrug an ARLOEDH agas Duw dhe oll an kenedhlow ma a-barth dhywgh; y feu an ARLOEDH agas Duw a omladhas ragowgh.

⁴Mirewgh fatell wrugavy ranna ragowgh an kenedhlow ma yw gesys avel eretons rag agas loethow, a-dhiworth an Yordan hag oll an kenedhlow re dhistruis, bys an Mor Meur y'n howlsedhes.

⁵An ARLOEDH agas Duw y honan a's fesyas a-dheragowgh, ha'ga chasya mes a'gas gwel; ha hwi a gemmer aga thir yn perghennogeth, par dell leveris an ARLOEDH agas Duw dhywgh.

⁶Ytho bedhewgh pur grev, ha gwaytyewgh gul pup-tra yw skrifys yn lyver lagha Moyses, heb treylya a-denewen naneyl dhe'n barth dhyghow na dhe'n barth kledh.

⁷Na gowethyewgh gans an kenedhlow ma yw gesys yn agas mysk, na elwewgh war henwyn aga duwow, na wrewgh tiow, na wregh aga servya ha na omblegyewgh dhedha,

⁸mes glenewgh orth an ARLOEDH agas Duw, dell wrussowgh bys y'n jydh ma.

⁹Rag an ARLOEDH re fesyas a-dheragowgh kenedhlow bras ha galloesek; nyns eus gour a allas sevel orthowgh bys y'n jydh ma.

¹⁰Unn gour mes a'gas mysk a yll chasya mil, rag an ARLOEDH agas Duw a omladh ragowgh, dell ambosas dhywgh.

¹¹Gorwithewgh ytho dhe gara an ARLOEDH agas Duw.

¹²Rag mar treylyowgh dhe-ves ha glena orth remenant an kenedhlow ma yw gesys yn agas mysk, ha mar junyowgh gansa yn demmedhyans, ha mar kowethyowgh gansa hag i genowgh hwi,

¹³godhvydhewgh yn sur na wra an ARLOEDH agas Duw fesya an kenedhlow ma a-dheragowgh arta. I a vydh antell ha maglenn dhywgh, skorja war agas keynow, ha dreyn yn agas lagasow, bys pan ewgh dhe goll a-dhiwar an dor da ma a wrug an ARLOEDH agas Duw ri dhywgh.

¹⁴‘Lemmyn yth esov ow mos y'n jydh ma yn fordh oll an tir, ha hwi a woer yn oll agas kolonn ha'gas enev, na goedhas travyth a oll an traow da a ambosis an ARLOEDH agas Duw dhywgh. Pup-tra re hwarva ragowgh, ha ny fyllis unn ger anodho.

¹⁵Mes par dell hwarva ragowgh pup-tra da a ambosis an ARLOEDH agas Duw dhywgh, yndella ynwedh an ARLOEDH a dhre warnowgh oll an droktraow, bys pan y'gas distruis dhiworth an tir da re ros an ARLOEDH agas Duw dhywgh.

¹⁶Mar kammdremenewgh erbynn kevambos an ARLOEDH agas Duw a worhemmynnis dhywgh, ha mars ewgh dhe servya duwow erell, hag omblegya dhedha, sorr an ARLOEDH a vydh ow leski er agas pynn, hag yth ewgh dhe goll dihwans dhiworth an tir da re ros dhywgh.’