Read Kernewek Yoshua 3 Bible Online

Yoshua 3 - Kernewek bible

Yoshua 3

¹Yoshua a sevis myttin a-varr hag i eth yn-kerdh dhiworth Shittim ha dos bys y'n Yordan, ev hag oll an Ysraelysi. I a wortas ena kyns i dhe dreusi.

²Ytho dhe benn tri dydh an soedhogyon a dremenas der an kamp,

³hag i a worhemmynnis dhe'n bobel ow leverel, ‘Pan welowgh argh kevambos an ARLOEDH agas Duw, ha'n oferysi, an Levysi, orth hy doen, hwi ynwedh ewgh yn-rag a'gas tyller ha'y holya.

⁴Byttegyns omwithewgh neb pellder dhiworti, a-dro dhe dhew vil gevelin; na dhewgh nes dhedhi mayth aswonnowgh an fordh mayth ewgh warnedhi, rag ny dremensowgh an fordh ma kyns.’

⁵Yoshua a leveris dhe'n bobel, ‘Omsakrewgh; rag a-vorow an ARLOEDH a wra marthusyon yn agas mysk.’

⁶Ha Yoshua a gewsis dhe'n oferysi, ow leverel, ‘Drehevewgh argh an kevambos, ha treusiwgh a-dherag an bobel.’ Ytho i a dhrehevis argh an kevambos ha mos a-dherag an bobel.

⁷An ARLOEDH a leveris dhe Yoshua, ‘An jydh ma my a dhalleth dha veurhe yn dewlagas oll Ysrael, hag i a woer my dhe vos genes, par dell esen vy gans Moyses.

⁸Ha ty a worhemmynn dhe'n oferysi usi ow toen argh an kevambos, ow leverel, “Pan dhewgh dhe amal dowrow an Yordan, ke ha sevewgh y'n Yordan.” ’

⁹Ytho Yoshua a leveris dhe'n Ysraelysi, ‘Dewgh nes omma ha goslowewgh orth geryow an ARLOEDH agas Duw.’

¹⁰Ha Yoshua a leveris, ‘Gans hemma godhvydhewgh bos an Duw bew yn agas mysk hag ev dhe fesya a-dheragowgh heb falladow an Kananysi, an Hittysi, an Hivysi, an Perizzysi, an Girgashysi, an Amorysi ha'n Yebusysi.

¹¹Otta, yma argh kevambos Arloedh oll an nor ow treusi a-dheragowgh y'n Yordan.

¹²Lemmyn kemmerewgh dewdhek gour dhiworth loethow Ysrael, unn gour dhiworth pub loeth.

¹³Ha pan bowes godhnow treys an oferysi usi ow toen argh an ARLOEDH, Arloedh oll an nor, yn dowrow an Yordan, dowrow an Yordan a vydh treghys dhiworth an dowrow a dheu yn-nans a-wartha; hag i a sev yn graghell.’

¹⁴Ytho pan eth an bobel yn-rag dhiworth aga thyldow dhe dreusi an Yordan, an oferysi esa ow toen argh an kevambos eth a-rag an bobel.

¹⁵Pan dheuth an re esa ow toen an argh bys y'n Yordan, ha treys an oferysi esa ow toen an argh a veu troghys yn amal an dowrow, rag an Yordan a fenn dres oll y lannow oll dydhyow an drevas,

¹⁶an dowrow esa ow tos yn-nans a-wartha a sevis stag; i a omdhrehevis yn graghell mar bell avel Adam, an sita usi ryb Sarethan; ha'n dowr esa ow mos troha Mor an Araba, Mor an Hoelan, a veu stoppys yn tien. Ytho an bobel a dreusis a-dal Yeriko.

¹⁷An oferysi esa ow toen argh kevambos an ARLOEDH a sevis fast war syghtir yn kres an Yordan, hag oll Ysrael a dreusis war syghtir, bys pan worfennas oll an genedhel treusi an Yordan.