Read Kernewek Yoshua 4 Bible Online

Yoshua 4 - Kernewek bible

Yoshua 4

¹Ytho, pan worfennas oll an genedhel treusi an Yordan, an ARLOEDH a leveris dhe Yoshua:

²‘Kemmerewgh dhiworth an bobel dewdhek gour, unn gour dhiworth pub loeth,

³ha gorhemmynnewgh dhedha, “Kemmerewgh dewdhek men alemma dhiworth kres an Yordan, yn-mes a'n tyller may sevis fast treys an oferysi, ha'ga doen genowgh, ha'ga settya y'n tyller may fydhowgh ow spena an nos.” ’

⁴Ytho Yoshua a elwis an dewdhek gour re apoyntsa dhiworth an Ysraelysi, gour dhiworth pub loeth.

⁵Yn-medh Yoshua dhedha, ‘Tremenewgh a-rag argh an ARLOEDH agas Duw dhe gres an Yordan, ha kemmerewgh pub gour ahanowgh unn ven war y skoedh, war-lergh niver loethow an Ysraelysi,

⁶may fo hemma tokyn yn agas mysk. Pan wovynn agas mebyon yn termyn a dheu, “Pandr'a styr an veyn ma dhywgh?”

⁷ena hwi a lever dhedha, y feu dowrow an Yordan stoppys a-rag argh kevambos an ARLOEDH. Pan dreusis an Yordan, stoppys veu dowrow an Yordan. Ytho an veyn ma a vydh kovadh dhe'n Ysraelysi bys vykken.’

⁸Ytho an Ysraelysi a wrug yndella, dell worhemmynnis Yoshua, ha doen dewdhek men yn-mes a gres an Yordan, dell leveris an ARLOEDH dhe Yoshua, war-lergh niver loethow an Ysraelysi, hag i a's dug gansa dh'aga thyller, ha'ga gorra ena.

⁹Yoshua a settyas yn-bann an dewdhek men re bia yn kres an Yordan y'n tyller may sevis treys an oferysi a dhug argh an kevambos; hag ymons i ena bys y'n jydh ma.

¹⁰An oferysi esa ow toen an argh a sevi yn kres an Yordan, bys pan veu kollenwys pup-tra a wrug an ARLOEDH y worhemmynna dhe Yoshua dhe leverel dhe'n bobel, war-lergh pup-tra a wrug Moyses y worhemmynna dhe Yoshua. Ha'n bobel a dreusis yn unn fistena.

¹¹Ha kettell worfennas oll an bobel treusi, argh an ARLOEDH ha'n oferysi a dreusis a-rag an bobel.

¹²An Rewbenysi, an Gadysi, ha'n hanter-loeth Manasse a dreusis arayys rag kas a-rag an Ysraelysi, dell gewsis Moyses dhedha.

¹³A-dro dhe dhewgens mil ervys rag an gas a dreusis a-rag an ARLOEDH dhe blenys Yeriko rag bresel.

¹⁴Y'n jydh na an ARLOEDH a veurhas Yoshua yn golok oll Ysrael; hag i a berthi own anodho dell berthens own a Moyses, oll dydhyow y vewnans.

¹⁵An ARLOEDH a leveris dhe Yoshua,

¹⁶‘Gorhemmynn dhe'n oferysi usi ow toen argh an dustuni, mayth yskynnons yn-mes a'n Yordan.’

¹⁷Ytho Yoshua a worhemmynnis dhe'n oferysi, ‘Yskynnewgh yn-mes a'n Yordan.’

¹⁸Pan yskynnas yn-mes a'n Yordan an oferysi esa ow toen argh kevambos an ARLOEDH, ha pan veu godhnow treys an oferysi drehevys dhe'n tir sygh, dowrow an Yordan a dhehwelis dh'aga thyller ha fenna dres y lannow avel kyns.

¹⁹An bobel eth yn-bann dhiworth an Yordan yn degves dydh an kynsa mis, ha kampya yn Gilgal y'n tiredh a'n howldrevel dhe Yeriko;

²⁰hag ena Yoshua a settyas yn-bann an dewdhek men na a gemmersens yn-mes a'n Yordan.

²¹Ev a leveris dhe'n Ysraelysi, ‘Pan wovynn agas mebyon dhiworth aga thasow y'n termyn a dheu, “Pandr'a styr an veyn ma?”

²²ena displegyewgh dh'agas mebyon, “Ysrael a dreusis an Yordan ma war an tir sygh.”

²³Rag an ARLOEDH agas Duw a dhesyghas dowrow an Yordan a-ragowgh bys pan dreussiwgh, kepar dell wrug an ARLOEDH orth an Mor Rudh pan y'n desyghas ragon bys pan dreussen,

²⁴may hwodhve oll poblow an norvys bos krev leuv an ARLOEDH, ha may perthewgh own a'n ARLOEDH agas Duw bys vykken.’