Read Kernewek Yoshua 8 Bible Online

Yoshua 8 - Kernewek bible

Yoshua 8

¹An ARLOEDH a leveris dhe Yoshua, ‘Na borth own ha na vydh digolonnek. Kemmer oll an soudoryon genes, ha ke yn-bann dhe Ay. Mir, my re ros myghtern Ay y'th leuv war-barth gans y bobel, y sita, ha'y dir.

²Ty a wra dhe Ay ha'y vyghtern dell wrussys dhe Yeriko ha'y vyghtern; saw ty a yll gwitha ragowgh agas honan an preydh ha'n bestes. Sett kontrewaytyans erbynn an sita, a-dryv dhedhi.’

³Yoshua hag oll an soudoryon eth yn-bann dhe Ay. Yoshua a dhewisas deg mil wour galloesek warn ugens ha'ga dannvon dhe-ves nosweyth

⁴gans an gorhemmynn, ‘Mirewgh, kontrewaytyewgh erbynn an sita, a-dryv dhedhi; na gewgh pur bell a'n sita, mes hwi oll bedhewgh parys.

⁵My hag oll an bobel usi genev a dheu nes dhe'n sita. Pan ons yn-mes er agan pynn, kepar ha kyns, ni a fi anedha.

⁶I a yn-mes war agan lergh bys pan y's dynsyn yn-mes a'n sita; rag i dhe leverel, “I a fi ahanan, avel kyns.” Ytho ni a fi a-ragdha.

⁷Ena hwi a sev yn-bann dhiworth an kontrewaytyans ha kemmeres an sita; rag an ARLOEDH dha Dhuw a's re yn agas leuv.

⁸Wosa kemmeres an sita, hwi a worr tan ynni; war-lergh gorhemmynn an ARLOEDH hwi a wra. Mirewgh, my re worhemmynnis dhywgh.’

⁹Ytho Yoshua a's dannvonas yn-mes; hag i eth dhe dyller an kontrewaytyans, ha gortos yntra Bethel hag Ay, a'n howlsedhes dhe Ay; mes Yoshua a spenas a'n nos na yn kres an lu.

¹⁰Yoshua a sevis myttin a-varr ha hwithra an lu, hag ev ha henavogyon Ysrael eth yn-bann a-rag an lu erbynn Ay.

¹¹Oll an soudoryon esa ganso eth yn-bann, hag i a dheuth nes a-dherag an sita, ha kampya a'n gledhbarth dhe Ay, gans an nans yntredha hag Ay.

¹²Ev a gemmeras a-dro dhe bymp mil wour, ha'ga gorra dhe gontrewaytya yntra Bethel hag Ay, a'n howlsedhes dhe'n sita.

¹³Ytho i a dhesedhas an soudoryon, gans an kamp yn kledhbarth an sita ha'n re dhelergh a'n howlsedhes dhe'n sita. Mes Yoshua a spenas an nos na y'n nans.

¹⁴Pan y's gwelas myghtern Ay, i a fistenas ha sevel a-varr, ha gwer an sita eth yn-mes erbynn Ysrael rag gwerrya, ev hag oll y lu yn tyller apoyntys, a-dal Araba; mes ny wodhya bos kontrewaytyans er y bynn a-dryv an sita.

¹⁵Yoshua hag oll an Ysraelysi a omwrug aga bos fethys a-dheragdha, ha fia war fordh an gwylvos.

¹⁶Ytho oll an bobel esa yn Ay a veu gelwys yn-mes dhe jasya war aga lergh, hag i a jasyas war-lergh Yoshua hag a veu dynys yn-mes a'n sita.

¹⁷Nyns esa gour gesys yn Ay na Bethel, nag eth yn-mes war-lergh Ysrael; i a asas an sita igor, ha chasya war-lergh Ysrael.

¹⁸Ena an ARLOEDH a leveris dhe Yoshua, ‘Ystynn an guw usi y'th leuv war-tu hag Ay; rag my a's rov y'th leuv.’ Ha Yoshua a ystynnas an guw esa yn y dhorn war-tu ha'n sita.

¹⁹Kettel wrug hemma, gwer an kontrewaytyans a sevis uskis dhiworth aga thyller, ha poenya yn-rag. I a entras a-ji dhe'n sita, ha'y hemmeres, ha gorra tan ynni war-not.

²⁰Pan dreylyas gwer Ay war aga lergh, i a welas mog an sita ow mos yn-bann dhe'n nev. Nyns esa dhedha galloes dhe fia dhe du pynagoll. An Ysraelysi a omwrussa fia dhe'n gwylvos a dreylyas erbynn an helghyoryon.

²¹Pan welas Yoshua hag oll Ysrael an kontrewaytyans dhe gemmeres an sita ha mog an sita dhe vos yn-bann, i a dreylyas arta ha gweskel gwer Ay.

²²Y feu an re a dhothya yn-mes a'n sita er aga fynn keys a-ji gans an Ysraelysi war dhew denewen; hag i a's ladhas bys pan nag esa gesys dianker vytholl; nagonan ny skapyas.

²³Mes myghtern Ay a veu kechys yn few ha dres dhe Yoshua.

²⁴Pan worfennas Ysrael ladha oll annedhysi Ay y'n gwel hag y'n gwylvos le may chassens war aga lergh, ha pubonan re bia ledhys gans min an kledha, oll Ysrael a dhehwelis dhe Ay hag i a ladhas an remenant ena gans min an kledha.

²⁵Niver an re a goedhas y'n jydh na, gwer ha benynes, o dewdhek mil — oll poblans Ay.

²⁶Rag ny gildennas Yoshua y leuv mayth ystynnas an guw gensi, bys pan gowldhistrusa oll annedhysi Ay.

²⁷Mes an Ysraelysi a dhug dhe-ves ragdha i aga honan an bestes ha preydh an sita, war-lergh gorhemmynn an ARLOEDH dhe Yoshua.

²⁸Yoshua a loskas Ay, ha'y wul bys vykken krug a vagoryow, tyller ynyal dell yw bys y'n jydh ma.

²⁹Ev a grogas myghtern Ay war wydhenn bys y'n gorthugher; ha pan sedhis an howl Yoshua a worhemmynnis dhedha hag i a dorras an korf yn-nans a'n wydhenn, ha'y dewlel dhe'n dor orth entrans yet an sita, ha drehevel a-ughto kals bras a veyn, eus ena bys y'n jydh ma.

³⁰Ena Yoshua a dhrehevis alter dhe'n ARLOEDH, Duw Ysrael war venydh Ebal,

³¹dell worhemmynnis Moyses gwas an ARLOEDH dhe'n Ysraelysi, dell yw skrifys yn lyver lagha Moyses, ‘Alter meyn dien, na vons treghys gans toul a horn’; hag i a offrynnas warnedhi offrynnow leskys dhe'n ARLOEDH, ha sakrifia offrynnow kres.

³²Hag ena a-rag an Ysraelysi ev a skrifas war an veyn dasskrif a lagha Moyses.

³³Oll Ysrael, keffrys alyon ha genesik, y henavogyon ha'n soedhogyon, ha'y vreusysi a sevis a'n eyl tu a'n argh ha'y gila a-dal an oferysi leviek, a dhug argh kevambos an ARLOEDH. Yth esa hanter anedha a-dal menydh Gerizim ha hanter anedha a-dherag menydh Ebal, dell worhemmynnis Moyses gwas an ARLOEDH kyns, i dhe venniga pobel Ysrael.

³⁴A'y wosa ev a lennas oll geryow an lagha, bennathow ha mollothow, war-lergh oll yw skrifys yn lyver an lagha.

³⁵Nyns esa ger a oll a worhemmynnis Moyses na lennas Yoshua a-rag oll kuntelles Ysrael, gans an benynes, an re vyghan, ha'n alyons esa trigys yn aga mysk.