Read Kernewek 2 Thessalonianys 3 Bible Online

2 Thessalonianys 3 - Kernewek bible

2 Thessalonianys 3

¹Wor'tiwedh, a vreder, gwrewgh pysi ragon may hwrello ger an Arloedh spedya ha bos enorys kepar dell wrug vy ynwedh yn agas mysk,

²may fen ni delivrys dhiworth tus treus ha drog; rag nyns eus fydh gans pub den oll.

³Mes lel yw an Arloedh a wra agas nertha ha'gas gwitha rag an tebel el.[6]

⁴Hag yma fydhyans genen y'n Arloedh yn agas kever, hag yma fydhyans genen y'n Arloedh yn agas kever, hwi dhe vos ow kul, lemmyn hag y'n termyn a dheu, an taklow a wren ni gorhemmynna,

⁵Re wrello an Arloedh gidya agas kolonn dhe gerensa Duw ha dhe berthyans Krist.

⁶Ni a ergh dhywgh a vreder, yn hanow agan Arloedh Yesu Krist mayth omdennowgh dhiworth pub broder a gerdh yn tiek[7] heb siwya an hengov a dhegemmersons dhiworthyn ni.

⁷Rag hwi agas honan a woer fatell dhegoedh gul war agan lergh; rag nyns en ni diek[8] yn agas mysk,

⁸ha ny wren ni dybri bara dhiworth denvyth heb pe, mes gans hwel ha lavur dydh ha nos, owth oberi na worren begh war dhenvyth ahanowgh.

⁹Nyns on ni heb galloes, mes may ryllyn ni ensampel dhywgh may hallowgh gul war agan lergh.

¹⁰Rag pan esen ni genowgh ynwedh, ni a worhemmynnis dhywgh: den mar ny vynn oberi, na wres ev dybri naneyl.

¹¹Ni a glew, re ahanowgh dhe vos ow kerdhes a-dro yn tiek,[9] heb oberi mann mes mellyoryon yns.

¹²Ni a ergh dhe dus a'n par na ha'ga heski yn hanow an Arloedh Yesu Krist mayth oberrons yn kosel ha dybri aga bara aga honan.

¹³Ha hwi, a vreder, na wrewgh kelli kolonn ow kul dader.

¹⁴Ha mars eus den na vo gostydh dh'agan ger der an lyther, merkyewgh an den ma, na wrewgh kowethya ganso may fo meth gorrys ynno.

¹⁵Mes na wrewgh y synsi avel eskar, mes y geski avel broder.

¹⁶Ha'n Arloedh a gres y honan roy dhywgh kres pup-prys yn pub maner[10]. Re bo an Arloedh genowgh hwi oll.

¹⁷An dynnargh der ow dorn vy, Powl. Hemm yw an tokyn yn pub lyther; yndella y skrifav.

¹⁸Gras agan Arloedh Yesu Krist re bo genowgh hwi oll.[11]