Read Kernewek 1 Timothi 2 Bible Online

1 Timothi 2 - Kernewek bible

1 Timothi 2

¹Ytho, my a bys kyns oll, may fo gwrys govynnadow, pysadow, aspysadow ha grasyans rag tus oll,

²rag myghternedh ha tus oll ughel aga roweth, may hwryllyn ledya bewnans kosel ha hebask, yn pub revrons hag onester.

³Da yw henna, ha plegadow dhe Dhuw agan Selwador,

⁴neb a vynn tus oll dhe vos selwys ha dhe dhos dhe aswonnvos an gwir.

⁵Rag yma unn Duw hag unn mayn yntra Duw ha mab-den, an den Krist Yesu,

⁶neb a omros yn daspren rag pub den oll, an dustuni degys y'n termyn gwiw.

⁷Rakhenna my a veu ordenys herot hag abostol (an gwir a gowsav,[1] nyns esov ow gowleverel), dyskador an Jentilys yn fydh ha gwiryonedh.

⁸Ytho, my a vynn may hwrello pysi an wer yn pub le, ow trehevel diwla sans heb sorr na disputyans.

⁹Y'n keth vaner y koedh dhe venynes omwiska yn maner wiw, gans onester ha doethter, heb pletha aga gols gans owr na perlys, ha heb dillas meur y gost,

¹⁰mes gans gwriansow da, dell yw gwiw rag benynes ow professya revrons dhe Dhuw.

¹¹Dyskes benyn yn taw, gans pub uvelder.

¹²Ny asav dhe venyn may hwrello dyski na kemmeres awtorita war wour, mes bedhes hi tawesek.

¹³Rag Adam a veu formys kyns oll, ena Eva,

¹⁴ha ny veu Adam toellys, mes an venyn a veu toellys ha hi a gammdremenas.

¹⁵Mes hi a vydh selwys dre dhineythi fleghes mar kwra hi gortos yn fydh ha kerensa ha sansoleth gans doethter.