Read Kernewek 1 Timothi 4 Bible Online

1 Timothi 4 - Kernewek bible

1 Timothi 4

¹An Spyrys a lever yn tiblans re dhe asa an fydh yn termynyow diwettha ha gul vri a fals spyrysyon ha dyskasow dywolow;

²yn falsuri gowleverysi, leskys aga howses gans horn.

³I a dhifenn demmedhyans hag a worhemmynn omwitha rag boes a veu gwrys gans Duw dhe ranna gans grasyans yntra kryjygyon, ha'n re re wodhva an gwir

⁴Rag da yw pub kreatur a Dhuw, ha nyns yw res gorra travyth dhe-ves, mars yw degemmerys gans grasyans,

⁵drefenn y vos sakrys dre er Duw ha pysadow.

⁶Mar profydh an taklow ma dhe'n vreder, gwas da dhe Grist Yesu vydhydh, megys gans geryow an fydh ha'n dyskas da re siwsys.

⁷Mes skon hwedhlow didhuw ha hwedhlow gwraghes, ha lavur troha sansoleth;

⁸rag lavur an korf yw nebes dhe les, mes sansoleth yw dhe les rag pup-tra, gans ambos bewnans y'n termyn ma hag yn termyn a dheu.

⁹Lel yw an ger ha gwiw dhe gemmeryans leun.

¹⁰Dhe hemma ni a lavur ha strivya,[3] rag yma agan govenek y'n Duw bew, neb yw an Selwador a bub den, hag a gryjygyon dres oll.

¹¹Gwra erghi ha dyski an taklow ma.

¹²Na dhispresys denvyth dha yowynkneth, mes deus ha bos patron dhe'n gryjygyon yn lavar, yn bewedh, yn kerensa, yn fydh, yn glander.

¹³Erna dhyffiv, omri dhe lenna skryptor, dhe gennerth, ha dhe dhyski.

¹⁴Na wra dispresya an ro usi ynnos a veu res dhiso dre brofoesans gans gorra diwla an henavogyon warnas.

¹⁵Gwra oberi gans an taklow ma; bydh diwysyk y'n taklow ma may fo dha avonsyans diblans dhe bub den.

¹⁶Bydh war a-dro dhiso jy dha honan, hag a-dro dhe'th tyskas; gwra pesya ynna i, rag, ow kul yndella, ty a wra omselwel, ha selwel ynwedh dha woslowysi.