Read Kernewek 1 Timothi 5 Bible Online

1 Timothi 5 - Kernewek bible

1 Timothi 5

¹Na wra keredhi den kottha mes gwra y gennertha kepar ha tas, ha tus yowynka kepar ha breder,

²benynes kottha avel mammow, benynes yowynka avel hwerydh gans pub glander.

³Gwra enora gwedhwesow yw gwedhwesow yn hwir.

⁴Mes mars eus fleghes po fleghes-wynn dhe neb gwedhwes, dyskens i kyns oll gul aga dever kryjyk dh'aga theylu i hag attyli dh'aga thas ha'ga mamm, rag plegadow a-dherag Duw yw hemma.

⁵Neb yw gwedhwes wir, neb re beu gesys hy honan, re settyas hy govenek war Dhuw, ow pesya yn govynnadow ha pysadow dydh ha nos.

⁶Mes neb a vew yn plesour yw marow kyn fo hi hwath yn few.

⁷Ha gwra gorhemmynna an taklow ma, may fons i divlam.

⁸Mes den mar ny dharbar dh'y gerens ev, ha dres oll dh'y deylu ev, ev re naghas an fydh ha gweth es diskryjyk yw ev.

⁹Omrolys bedhes gwedhwes mar nyns yw le es tri-ugens bloedh, ha re beu gwreg unn gour,

¹⁰gans dustuni a'y gwriansow da, mar magas fleghes, mar ros hi ostyans dhe estrenyon, mar kolghas treys an syns, mar kweresas an re yn anken, mar omros dhe bub gwrians da.

¹¹Mes skon gwedhwesow yowynka; rag pan wra aga hwansow aga thenna dhiworth Krist, demmedhi a vynnons,

¹²ha breusys yns i rag i dhe asa aga hynsa ambos.

¹³Dhe'n keth prys ynwedh y tyskons bos diek, ow kerdhes a jy dhe jy. Nyns yns i diek yn unnsel mes ynwedh hwedhloresow ha mellyoresow, ow leverel taklow nag yw gwiw aga leverel.

¹⁴Ytho, my a vynn an re yowynka dhe dhemmedhi, dineythi fleghes, ha bos mestres chi, na vo ken dhe eskar dh'agan kabla.

¹⁵Seulabrys, re re dreylyas a-denewen war-lergh Satnas.

¹⁶Mars eus neb benyn gryjyk gans gwedhwesow yn hy theylu, gwres hi aga gweres, na vo begh war an eglos, may hallo gweres gwedhwesow gwir.

¹⁷Bedhes tybys gwiw ri enor dewblek dhe'n henavogyon a rewl yn ta, dres oll an re a lavur yn ger hag yn dyski.

¹⁸Rag yn-medh an skryptor, ‘Ny wredh kelmi min ojyon ow trushya’, hag, ‘An oberwas a dhervynn y wober.’

¹⁹Na wra degemmeres kuhudhans erbynn henavek marnas war lavar dew po tri dustunier.

²⁰An re a begh, gwra aga heredhi a-dherag pub den oll may portho an re erell own.

²¹My a'th charj a-dherag Duw ha Krist Yesu ha'n eledh dewisys may synsi an taklow ma heb ragvreus, heb gul travyth dre faverans.

²²Na worr diwla yn uskis war dhenvyth, ha na gemmer rann yn peghadow tus erell. Gwra omwitha dha honan glan.

²³Na wra eva dowr namoy, mes gwra devnydh a nebes win rag dha las ha'th klevesow menowgh.

²⁴Fest diblans yw peghosow rann an dus, ow mos a-dheragdha dhe vreus, mes peghosow re erell a siw war aga lergh.

²⁵Y'n keth vaner, fest diblans yw gwriansow da, ha hwath an re nag yw yndella ny yllons bos kudhys.