Read Kernewek 1 Timothi 6 Bible Online

1 Timothi 6 - Kernewek bible

1 Timothi 6

¹Gwres pub den usi yn-dann yew avel kethwas synsi y vester gwiw dhe bub enor, na vo despitys hanow Duw ha'y dhyskas.

²Ha'n re gans mestrysi a grys, na wrens i aga dispresya drefenn aga bos breder, mes y koedh dhedha gonis gwell, avel kethwesyon, rag kryjygyon ha karadow yw an re a wra devnydh a brow an gonis. Dysk an taklow ma ha'ga ynnia.

³Piwpynag a dhysk ken, ha na assent dhe lavarow yagh agan Arloedh Yesu Krist ha'n dyskas yw yn akord gans sansoleth,

⁴yw goethus, heb konvedhes travyth, mes yma dhodho hwans anyagh dhe dhadhlow ha dhe dhisputyansow a-dro dhe eryow. Dhiworth an taklow ma y teu avi, strivyans, kabel, gogrysyow drog,

⁵ha'n dadhlow heb worfenn a dus legrys aga brys, ha'n gwir kemmerys dhiworta i, a dyb sansoleth dhe vos mayn rag kavoes gwayn arghansek.[4]

⁶Mes gwayn meur yw sansoleth war-barth gans bos kontentys.

⁷Rag ny dhresen travyth dhe'n bys ma, ha ny[5] yllyn doen travyth yn-mes.

⁸Mes mars eus genen boes ha dillas, kontentys vydhyn gans an re ma.

⁹An re a vynn bos rych a goedh yn temptyans ha maglenn ha lies tebel-ewl gokki ha drog a wra dhe dus beudhi yn terroes ha diswrians.

¹⁰Rag fenten pub drog yw kerensa mona ha der an hwans ma nebes tus res eth yn sowdhan dhiworth an fydh ha gwana aga honan gans lies galar.

¹¹Mes ty, a dhen Duw, fi dhiworth an taklow ma ha ke war-lergh ewnder, sansoleth, fydh, kerensa, perthyans, klorder.

¹²Striv strivyans da an fydh; gwra synsi an bewnans heb diwedh may feus gelwys dhodho ha may hwrussys professyans da anodho a-dherag lies test.

¹³My a worhemmynn dhis a-dherag Duw a re bewnans dhe bup-tra ha'n Arloedh Yesu Krist a dhustunias gans professyans da a-dherag Pontius Pilat,

¹⁴may hwitthi an gorhemmynn heb namm, heb keredh, bys yn omdhiskwedhyans agan Arloedh Yesu Krist.

¹⁵Hemma, y'n termyn ewn, a wra ev diskwedhes, an unn Pennsevik bennigys, Myghtern myghternedh, hag Arloedh arlydhi,

¹⁶neb yn unnsel yw anvarwel, neb a drig yn golow na yllir dos nes dhodho; neb na wrug denvyth y weles na ny yll denvyth y weles. Dhodho ev re bo enor ha galloes bys vykken. Amen.

¹⁷Gorhemmynn dhe'n dus yw rych y'n bys ma na vons i goethus na trestya yn rychys nag yw sur, mes yn Duw,[6] a brof dhyn pup-tra yn rych dhe wul devnydh 'vas anodho.

¹⁸Lavar dhedha may hwrons dader, may fons rych yn gwriansow da, may fons hel, parys dhe ranna,

¹⁹ow kuntell tresor ragdha aga honan avel sel da erbynn an termyn a dheu, may hallons synsi an bewnans gwir.[7]

²⁰A Timothi, gwra gwitha an dra re beu res y'th charj, ow treylya dhiworth lavarow gwag hag ansans, ha tybyansow an eyl kontrari dh'y gila, yw henwys ‘Godhvos’ yn fals;

²¹ow professya hemma, nebes tus re sowdhanas dhiworth an fydh. Gras genowgh hwi.[8]