Read Kernewek 2 Timothi 3 Bible Online

2 Timothi 3 - Kernewek bible

2 Timothi 3

¹Ha godhvydh hemma, y'n diwettha dydhyow y teu termynyow kales,

²rag tus a vydh omgaroryon, karoryon mona, goethus, ughel aga fenn, ow tespitya tus erell, diwostydh orth kerens, heb godhvos gras, ansans,

³dinatur, avleythys, kammguhudhoryon, direwl, gwyls, ow kasa dader,

⁴traytours, dibreder, omhwythys, karoryon plesour moy es karoryon Duw,

⁵gans semlans sansoleth mes ow nagha y alloes. Treyl dhiworth an re ma.

⁶Rag yn mysk an re ma, yma an re a dheu a-bervedh yn chiow yn unn slynkya ha kemmeres benynes foll yw beghys gans peghadow ha hembrenkys dre hwansow a lies eghenn,

⁷ow tyski pup-prys, heb galloes kavoes bythkweth godhvos a'n gwir.

⁸Kepar dell settyas Yannes ha Yambres orth Moyses, y'n keth vaner an re ma a sett orth an gwir, shyndys aga brys, anwiw a-dro dhe'n fydh.

⁹Mes nyns ons i yn-rag na fella, rag aga follneth a vydh diblans orth pub den, kepar dell o follneth an dhew na.

¹⁰Mes ty re siwyas yn tiwysyk ow dyskas, ow fara, ow thowl, ow fydh, ow hirwodhevyans, ow herensa, ow ferthyans,

¹¹ow helghyans, ow galarow a goedhas warnav yn Antiogh, yn Ikonium, yn Lystra, an helghyans a berthis; ha'n Arloedh re wrug ow delivra yn-mes anedha oll.

¹²Dhe wir, pub den a vynno bewa bewnans sansel yn Krist Yesu a vydh helghys.

¹³Mes tus dhrog ha faytours a wra mos yn-rag gweth ha gweth ow toella, hag ow pos toellys.

¹⁴Mes ty, gwra pesya y'n taklow re wrussys dyski ha krysi yn fast, ow kodhvos gans neb y hwruss'ta aga dyski,

¹⁵ha ty dhe wodhvos a-ban es flogh an skrifow sans, a yll dha wul fur bys yn selwyans dre fydh yn Krist Yesu.

¹⁶Pub skryptor yw ynspirys gans Duw. Dhe les yw rag dyski, rag keski, rag ewnans ha rag dyskans yn ewnder,

¹⁷may fo den Duw gwiw ha parys yn leun rag pub ober da.