Read Kernewek Filemon 1 Bible Online

Filemon 1 - Kernewek bible

Filemon 1

¹Powl, prisner a Grist Yesu ha Timothi agan broder, Dhe Filemon, agan karadow ha'gan kesoberer,

²ha dhe Affia agan hwoer,[1] ha dhe Arghippus agan kessouder, ha dhe'n eglos y'th chi:

³Gras dhywgh ha kres dhiworth Duw agan Tas ha dhiworth an Arloedh Yesu Krist.

⁴Prest yth aswonnav gras dhe'm Duw, pan borthav kov ahanas y'm pysadow,

⁵ow klewes a'th kerensa hag a'n fydh a'th eus y'n Arloedh Yesu hag orth an syns oll,

⁶ha my a bys[2] may fo kowethyans dha fydh mayn nerthek der aswonnvos oll an dader a'gan[3] beus yn Krist.

⁷Rag my a gavas meur a lowena ha konfort y'th kerensa, drefenn kolodhyon an syns dhe vos kennerthys dredhos, a vroder.

⁸Rakhenna, kyn fo dhymm bolder lowr yn Krist dhe worhemmynna dhis an pyth a dhegoedh,

⁹byttegyns rag kerensa gwell yw genev dha gonjorya, kepar dell ov vy, Powl, den koth ha lemmyn ynwedh prisner a Grist Yesu;

¹⁰ha my a'th pys rag ow mab, neb a dhineythis y'm kolmow, Onesimus,

¹¹hag o seulabrys diles dhis mes lemmyn devri dhe les dhiso jy keffrys ha dhymmo vy.

¹²My re wrug y dhastannvon dhis, — an den ma, neb yw ow holodhyon ow honan.

¹³My a garsa y witha genev rag menystra dhymm, y'th le, yn kolmow an aweyl,

¹⁴mes ny vynnis gul travyth heb dha gummyas, ma na ve dha dhader konstrynys, mes a'th vodh.

¹⁵Martesen rakhenna y feu ev diberthys dhiworthis berr dermyn ma'n degemmerri bys vykken,

¹⁶dhe vos na fella keth mes moy es keth, broder karadow, kyns oll dhymmo vy, mes pygemmys moy dhiso jy y'n kig keffrys hag y'n Arloedh.

¹⁷Rakhenna, mar akontydh ow bos koweth, degemmer e kepar ha dell ve ev my ow honan.

¹⁸Mar kwrug ev kamm vyth er dha bynn po mars usi yn kendon dhis, gorr an kost dhymmo vy.

¹⁹My, Powl, re skrifas gans ow dorn ow honan, my a wra attyli — heb leverel dhis ty dhe vos dha honan yn kendon dhymmo vy!

²⁰Ya, ow broder, re biv tylys genes y'n Arloedh. Hebaskha ow holodhyon yn Krist!

²¹Rag ow bos sur ty dhe vos gostydh, my re skrifas dhis ow kodhvos y hwredh moy es dell lavarav.

²²Y'n keth termyn pareus gwestva ragov, rag my a wayt ow bos grontys dhywgh, der agas pysadow.

²³Epafras, ow hesprisner yn Krist Yesu a wra dha salusi,

²⁴kepar dell wra Mark, Aristarghus, Demas ha Luk, ow hesoberoryon.

²⁵Gras an Arloedh[4] Yesu Krist re bo gans agas spyrys.[5]