Read Kernewek Ebrowyon 13 Bible Online

Ebrowyon 13 - Kernewek bible

Ebrowyon 13

¹Pesyes kerensa dhe breder.

²Na ankevewgh wolkomma estrenyon, rag yndellma nebes re wolkommas eledh heb y wodhvos.

³Perthewgh kov a'n brisnoryon par dell vewgh prisonys war-barth gansa; ha'n re yw kammdhyghtys, a-ban esowgh hwi ynwedh y'n korf.

⁴Bedhes priosoleth synsys yn enor gans peub, ha bedhes andhefolys gweli an demmedhyans; rag Duw a vreus an re dhijast ha'n avoutroryon.

⁵Bedhes agas bewnans rydh a gerensa arghans, ha bedhewgh kontentys gans an pyth a'gas beus; rag ev re leveris, ‘Nevra ny wrav dha fyllel na dha forsakya.’

⁶Ytho, ni a lever yn kolonnek, ‘An Arloedh yw ow gwereser, ny'm bydh own; pandr'a yll den gul dhymm?’

⁷Perthewgh kov a'gas hembrenkysi, an re a gewsis ger an Arloedh dhywgh; prederewgh a siwyans aga bewedh ha gul war-lergh aga fydh.

⁸Yesu Krist yw an keth de ha hedhyw ha bys vykken.

⁹Na vedhewgh kemmerys a-denewen gans divers dhyskasow ankoth; rag da yw may fo krevhes an golonn dre ras, yn le dre boesow na veu dhe les dhe'n re a wra devnydh anedha.

¹⁰Ni a'gan beus alter ma na's teves an re a serv an tabernakel an gwir dhe dhybri anodho.

¹¹Rag korfow an enyvales na, ha'ga goes kyrghys a-ji dhe'n sentri gans an arghoferyas yn sakrifis rag peghosow, yw leskys yn-mes a'n kamp.

¹²Yndellma, Yesu a wodhevis yn-mes a'n yet rag sanshe tus der y woes.

¹³Ytho deun yn-rag dhodho yn-mes a'n kamp ha doen y vismer ev ganso.

¹⁴Rag omma ny'gan beus sita a dhur, mes y hwilyn an sita dhe dhos.

¹⁵Dredho ytho, offrynnyn heb lett sakrifis a wordhyans dhe Dhuw, henn yw frut diwweus a wormel y hanow.

¹⁶Na ankevewgh gul oberow mas na kevrenna an pyth eus genowgh; sakrifisow a'n par ma yw plegadow dhe Dhuw.

¹⁷Bedhewgh gostydh dh'agas hembrenkysi hag uvel dhedha; rag ymons i ow koelyas a-barth agas enev, avel tus a goedh ri reknans; gesiwgh i dhe wul hemma yn lowen, heb kyni yn tristans, rag ny via henna dh'agas les.

¹⁸Pysiwgh a'gan govis ni, rag sur on ni bos kowses da dhyn, ow mynnes omdhegi yn enor yn pup-tra.

¹⁹My a'gas pys a wul hemma yn tiwysyk may fiv daskorrys dhywgh dhe skonna.

²⁰Lemmyn, an Duw a gres neb a dhros arta dhiworth an re varow agan Arloedh Yesu Krist, bugel meur an deves, dre woes an kevambos a dhur bys vykken,

²¹re'gas provio gans pub tra vas[15] may hwryllowgh y vodh, ow kul ynnon[16] an pyth yw plegadow yn y wolok dre Yesu Krist; dhe neb bedhes gordhyans bys vykken ha bynnari.[17] Amen.

²²Ha my a'gas pys, breder, a wul vri a'm ger a geskians, rag my dhe skrifa war verr lavarow.

²³Godhvydhewgh bos livrys agan broder Timothi, gans neb my a'gas gwel, mar teu yn skon.

²⁴Salusewgh agas hembrenkysi ha'n syns oll. An re a Itali a'gas salus.

²⁵Bedhes gras genowgh hwi oll. Amen.[18]