Read Kernewek Ebrowyon 2 Bible Online

Ebrowyon 2 - Kernewek bible

Ebrowyon 2

¹Rakhenna y tegoedh dhyn koela dhe voy orth an traow yw klewys, ma nag ellen gans an liv.

²Rag mars o fyrv an ger kewsys gans an eledh, ha mar tegemmeri pub kammweyth po diwostytter attal ewn,

³fatell wren ni diank mar ny wren vri a selwyans mar veur? Derivys veu yn kynsa der an Arloedh, ha dustuniys dhyn gans an re a'n klewas,

⁴ha Duw a dhustunias ynwedh der arwoedhyow ha dre varthusyon ha dre wriansow nerthek a bub eghenn ha dre rohow an Spyrys Sans rynnys herwydh y vodh y honan.

⁵Rag ny veu yn-dann eledh y hworras Duw an bys dhe dhos, hag anodho dell gewsyn.

⁶Destys yw yn neb le, ‘Pyth yw den may perthydh kov anodho, po mab den ma'n gwithydh?

⁷Ty a'n gwrug rag termyn nebes isella ages an eledh, ty re'n kurunas gans golewder hag enor,

⁸ow korra pup-tra yn gostytter yn-dann y dreys.’ Rag, dre worra pup-tra yn gostytter dhodho, ny asas travyth diwostydh dhodho. Rag lemmyn, ny welyn hwath pup-tra dhe vos gostydh dhodho.

⁹Mes ni a wel Yesu, neb a veu gwrys nebes isella ages an eledh, lemmyn kurunys gans golewder hag enor dre wodhevel mernans, may tastya mernans rag pub huni, dre ras Duw.

¹⁰Rag yth o gwiw ev, mayth usi pup-tra yn few ragdho ha dredho, ow tri lies mab dhe glori, dhe wul awtour aga selwyans perfydh dre wodhevel.

¹¹Rag ev neb a sansha, ha'n re yw sanshes, yw oll a'n unn devedhyans. Henn yw prag na'n jeves meth dh'aga gelwel breder,

¹²ow leverel, ‘My a dheriv dha hanow dhe'm breder, yn mysk an kuntelles my a'th wormel.’

¹³Hag arta, ‘My a vynn gorra ow fydhyans ynno.’ Hag arta, ‘Ottavy ha'n fleghes re ros dhymm Duw.’

¹⁴Ytho, a-ban gemmeras an fleghes rann yn kig ha goes, ev y honan a gevrennas a'n keth traow, may tistrua, dre vernans, neb a'n jeves galloes mernans, henn yw, an jowl,

¹⁵ha delivra an re oll neb a berthi kethneth, der own a vernans, der aga bewnans oll.

¹⁶Rag yn tevri nyns yw y breder a-dro dhe'n eledh, mes a-dro dhe has Abraham.

¹⁷Ytho, y tegoedhva dhodho bos haval dh'y vreder yn pub tremmynn, mayth ella ha bos arghoferyas tregeredhus ha lel yn gonis Duw, dhe wul dehwelyans rag peghosow an bobel.

¹⁸Rag drefenn ev y honan dhe wodhevel ha bos temptys, ev a yll gweres dhe'n re a vydh temptys.