Read Kernewek Ebrowyon 3 Bible Online

Ebrowyon 3 - Kernewek bible

Ebrowyon 3

¹Ytho, breder sans, kevrennoryon y'n galwans nevek, prederewgh a Yesu, abostol hag arghoferyas agan professyans;

²neb o len dhe neb a'n ordenas, kepar dell o Moyses len yn oll[2] chi Duw.

³Mes Yesu re beu reknys gwiw dhe gemmys moy a glori ages Moyses, par dell yw neb a dhrehevis chi moy enorys ages an chi y honan.

⁴Rag pub chi yw drehevys gans nebonan, mes neb a dhrehevis pup-tra yw Duw.

⁵Lemmyn Moyses o len yn oll chi Duw avel gwas, dhe desta dhe'n traow a vedha kewsys a-wosa,

⁶mes Krist o len avel Mab dres chi Duw. Ha ni yw y ji mar synsyn agan fydhyans ha goeth yn agan govenek, fyrv dhe'n diwedh.[3]

⁷Ytho, dell lever an Spyrys Sans, ‘Hedhyw, mar klewowgh y lev,

⁸na galeshewgh agas kolonn avel y'n rebellyans, war dhydh an prevyans y'n gwylvos,

⁹le ma'm gorras agas tasow dhe'n prov, ha gweles ow oberow dres dewgens blydhen.

¹⁰Yndella, serrys en gans an henedh ma, hag y leveris, “Pup-prys yth ons yn stray yn aga holonn; ny aswonnsons ow fordhow vy.”

¹¹Dell wrugavy ti y'm sorr, “Ny wrons entra y'm powesva.” ’

¹²Kemmerewgh with, breder, ma na vo yn denvyth ahanowgh tebelgolonn ankryjyk, ow treylya dhiworth an Duw bew.

¹³Mes ynniewgh an eyl y gila pub dydh, hedre vo gelwys ‘Hedhyw’, ma na vowgh kaleshes dre doell peghosow.

¹⁴Rag ni a gevrenn yn Krist pan synsyn agan kynsa fydhyans fyrv dhe'n diwedh.

¹⁵Dell veu leverys, ‘Hedhyw mar klewowgh y lev, na galeshewgh agas kolonn avel y'n rebellyans.’

¹⁶Piw ens a glewsons mes heb rebellya na hwath? A nyns ens oll an re a asas Ejyp yn-dann Moyses?

¹⁷Ha piw gansa y feu serrys dew-ugens blydhen? A nyns o gans an re a beghas, ha'ga horfow koedhys y'n gwylvos?

¹⁸Ha piw dhodho y hwrug ev ti na dheffens yn y bowesva, marnas dhe'n re o diwostydh?

¹⁹Ytho, ni a wel na allsons entra drefenn diskryjyans.