Read Kernewek Ebrowyon 5 Bible Online

Ebrowyon 5 - Kernewek bible

Ebrowyon 5

¹Rag pub arghoferyas dewisys yn mysk tus yw ordenys dhe weythres a-barth tus yn servis Duw, dhe brofya rohow ha sakrifisow rag peghosow.

²Ev a yll dyghtya yn hwar an re yw heb godhvos ha kellys yn aga fordh, drefenn y vos y honan settys a-dro gans gwannder.

³Ha rakhemma, y tegoedh dhodho offrynna sakrifis rag peghosow ragdho ev y honan keffrys ha'n bobel.

⁴Ha ny omgemmer denvyth an enor ragdho y honan, marnas ev a veu gelwys gans Duw, par dell veu Aron.

⁵Ytho ynwedh, ny wrug Krist omughelhe dhe vos gwrys arghoferyas, mes y feu res dhodho ganso ev neb a leveris dhodho, ‘Ty yw ow Mab, hedhyw my re'th tineythis’;

⁶par dell lever ynwedh yn ken le, ‘Ty yw oferyas bys vykken, war-lergh ordyr Melkisedek.’

⁷Yn dydhyow y gig, Yesu a brofyas pysadow ha govynnadow, gans kriow ughel ha dagrow, dhe neb a ylli y dhelivra dhiworth mernans hag ev a veu klewys drefenn y own a Dhuw.

⁸Kynth o Mab, ev a dhyskas gostytter der an pyth a wodhevis;

⁹ha wosa bos gwrys perfydh, y teuth ha bos fenten a selwyans bys vykken dhe beub yw gostydh dhodho,

¹⁰wosa bos henwys gans Duw arghoferyas war-lergh ordyr Melkisedek.

¹¹A-dro dhe hemma, ni a'gan beus meur dhe leverel yw kales dhe styrya, rag hwi dhe vos lent agas diwskovarn.

¹²Rag kyn talvia dhywgh bos dyskadoryon erbynn an termyn ma, edhomm a'gas beus nebonan dhe dhyski dhywgh an kynsa elvennow a lavarow Duw. Edhomm a'gas beus a leth, yn le boes kales;

¹³rag pubonan neb a gevrenn a leth yw heb prevyans y'n ger a ewnder, rag ev yw fleghik.

¹⁴Mes boes kales yw rag an devesigyon, rag an re a's teves kowses dyskys dre usadow dhe dhissernya yntra da ha dhrog.