Read Kernewek 1 Peder 3 Bible Online

1 Peder 3 - Kernewek bible

1 Peder 3

¹Y'n keth vaner, a wragedh, bedhewgh gostydh dh'agas gwer; ena, kyn fo re anedha nag yw gostydh dhe'n ger, i a yll bos gwaynys heb ger dre bewedh aga gwragedh,

²hag i ow kweles agas bewedh glan hag ownek.

³Na vedhes agas afinans war-tu a-ves, ow pletha an vlew na gorra tegennow owr a-dro dhywgh na gwiska dillas splann,

⁴mes bedhes gnas[8] kudhys an golonn, gans afinans na yll pedri a spyrys kosel ha klor, yw meur y brys a-dherag Duw.

⁵Rag yndella, seulabrys, an benynes sans, neb a's tevo govenek yn Duw, a wrug omafina, gostydh dh'aga gwer aga honan,

⁶kepar dell obayas Sara dhe Abraham orth y gelwel ‘Arloedh.’ Hwi yw hy fleghes pan wrewgh da, ha pan na berthowgh own a euth vytholl.

⁷Y'n keth vaner an wer, gwrewgh kesvewa gansa yn konvedhes, ow tiskwedhes enor dhe'n wreg avel dhe'n gwanna lester, kepar ha dhe heryon genowgh ynwedh a'n ras a vewnans, ma na vo lettys agas pysadow.

⁸Wor'tiwedh, bedhewgh hwi oll a'n keth brys, ow keskodhevel, ow kara an vreder, truedhek, uvel,[9]

⁹heb attyli drog rag drog na despit rag despit, mes yn le henna bennath, rag dhe henna y fewgh hwi gelwys, may hwrellewgh erita bennath.

¹⁰‘Neb a vynn kara bewnans ha gweles dydhyow da, fronnes ev y daves a dhrog ha'y dhiwweus a gewsel toell.

¹¹Treylyes ev dhiworth drog ha gul dader, hwiles ev kres ha'y siwya;

¹²rag bos dewlagas an Arloedh war an re wiryon, hag igor yw y dhiwskovarn dh'aga fysadow, mes fas an Arloedh yw settys erbynn an re a wra drog.’

¹³Ha piw a wra agas aperya mars ewgh ha bos diwysyk rag dader?

¹⁴Mes mar kodhevowgh ynwedh rag ewnder, gwynn agas bys. Na berthewgh own rag euth anedha, ha na vedhewgh troblys,

¹⁵mes sanshewgh an Arloedh Krist[10] yn agas kolonn. Bedhewgh parys pup-prys dhe wul defens dhe bub den a wovynn orthowgh a-dro dhe'n govenek usi ynnowgh,

¹⁶mes gans klorder hag own, ow kwitha kowses da, may fons i shamys neb a gabel agas bewedh da yn Krist, pan gewsons er agas pynn.

¹⁷Rag gwell yw godhevel ow kul dader, mar mynn bodh Duw, es drog.

¹⁸Rag Krist a wodhevis[11] unnweyth rag peghosow, den gwiryon rag tus kammhynsek, ma'gas[12] drollo dhe Dhuw, ledhys y'n kig mes bewhes y'n spyrys;

¹⁹hag ynno ev eth dhe bregoth dhe'n spyrysyon yn prison

²⁰a veu diwostydh kyns, pan esa hirwodhevyans Duw ow kortos yn dydhyow Noy, ha'n gorhel ow pos pareusys, may feu sawys niver byghan, henn yw eth enev, dre dhowr.

²¹Hemm yw tokyn a'gan saw lemmyn, henn yw besydhyans. Nyns yw gorra dhe-ves mostedhes an kig mes gorthyp kowses da dhe Dhuw dre dhasserghyans Yesu Krist,

²²usi a dhyghow dhe Dhuw, gyllys yn nev, gans eledh ha potestatys ha nerthow gwrys gostydh dhodho ev.