Read Kernewek 1 Peder 4 Bible Online

1 Peder 4 - Kernewek bible

1 Peder 4

¹Ytho, a-ban wrug Krist godhevel[13] y'n kig, omarvewgh hwi ynwedh gans an keth brys, rag neb re wodhevis y'n kig re asas peghadow,

²ytho ny vew namoy yn hwansow mab-den dres an termyn yw gesys y'n kig, mes orth bodh Duw.

³Rag lowr yw an termyn usi tremenys dhe wul war-lergh towl an Jentilys ow pesya yn leshyans, drokhwansow, medhwenep, kevewiow gwyls, eva re ha gordhyans idolys yw erbynn lagha.

⁴Marth a's teves na resowgh hwi gansa i dhe'n keth liv a wrians direwl, hag i a'gas kabel;

⁵mes i a re akont dhe neb yw parys dhe vreusi an re vew ha'n re varow.

⁶Rakhenna y feu an aweyl pregewthys hwath dhe'n re varow, may fewens yn spyrys war-lergh Duw, kyn fens i breusys avel mab-den y'n kig war-lergh mab-den.

⁷Gorfenn pup-tra re dheuth nes; ytho bedhewgh doeth ha sad orth pysadow.

⁸Kyns oll, kevewgh kerensa yntredhowgh heb hedhi[14], rag kerensa a gudh peghosow pals.

⁹Bedhewgh hel dhe westoryon, an eyl dh'y gila, heb krodhvol.

¹⁰Dell dhegemmeras pubonan ahanowgh ro, gwrewgh devnydh anodho an eyl rag y gila kepar ha rennysi dha a'n gras divers a Dhuw.

¹¹Den mar kews, kewses ev lavarow Duw; den mar konis, gonedhes gans nerth yw res gans Duw, may fo Duw gordhys yn pup-tra dre Yesu Krist, dhe neb re bo gordhyans ha nerth, trank heb worfenn. Amen.

¹²Karadowyon, na vedhewgh sowdhenys a'n prevyans gans tan usi genowgh rag agas previ, kepar ha pan ve neppyth ankoth ow koedha warnowgh.

¹³Mes, ha hwi ow kevrenna godhevyansow Krist, lowenhewgh, may lowenhahowgh ynwedh yn heudhik orth diskwedhyans y splannder.

¹⁴Mars owgh hwi despitys yn hanow Krist, gwynn agas bys rag an Spyrys a splannder hag a Dhuw a wra powes warnowgh.[15]

¹⁵Mes na wres denvyth ahanowgh godhevel avel denledhyas, na lader, na drogoberer, na mellyer yn negys tus erell.

¹⁶Mes mar kodhev avel Kristyon, na berthes meth, mes gwres ev gordhya Duw y'n hanow ma[16].

¹⁷Rag devedhys yw an termyn dhe dhalleth an vreus orth teylu Duw, ha mar talleth orthyn ni, pandr'a vydh gorfenn an re nag yw gostydh dhe aweyl Duw?

¹⁸Ha mar skantlowr yw selwys an den gwiryon, ple hwra an den didhuw ha'n peghador omdhiskwedhes?

¹⁹Ytho, an re a wodhev war-lergh bodh Duw, gwrens i kemmynna aga enev dhe Greador lel, ow kul dader.