Read Kernewek 1 Peder 5 Bible Online

1 Peder 5 - Kernewek bible

1 Peder 5

¹Ytho, my a bys an re yw henavogyon yn agas mysk, ha my henavek ynwedh genowgh, ha test godhevyansow Krist, ha kevrenner y'n splannder a vydh diskwedhys,

²bugelyewgh flokk Duw usi yn agas mysk, ow korweles heb konstryna mes bolonjedhek, war-lergh bodh Duw[17]; heb hwansa gwayn plos, mes yn tiwysyk;

³heb lordya war an re a withowgh, mes yn ensamplys dhe'n flokk,

⁴ha pan omdhiskwa an penn-bugel, hwi a wra degemmeres an gurun a splannder na wedher.

⁵Y'n keth vaner, hwi, a dus yowynk, bedhewgh gostydh dhe'n henavogyon, ha pubonan gwiskewgh uvelder an eyl dh'y gila, rag ‘Duw a sett orth tus woethus, mes dhe dus uvel, y re ev gras.’

⁶Omuvelhewgh ytho yn-dann leuv alloesek Duw, rag ma'gas ughelhaho y'n termyn gwiw,

⁷ow tewlel oll agas fienasow warnodho, rag hwi yw bern dhodho ev.

⁸Bedhewgh sad, bedhewgh hewoel. Agas eskar an jowl, kepar ha lew owth usa, a gerdh a-dro, ow hwilas nebonan dhe dhevorya.

⁹Sevewgh orto, fyrv y'n fydh, ow kodhvos an keth godhevyans dhe hwarvos dh'agas breder usi y'n bys.

¹⁰Lemmyn, Duw pub ras, neb a'gas gelwis dh'y splannder heb diwedh yn Krist Yesu, wosa hwi dhe wodhevel pols, a wra y honan agas gul perfydh, fastya, krevhe ha selya.

¹¹Dhodho ev an galloes[18] trank heb worfenn. Amen.

¹²Dre Silvanus, broder lel, my a dyb, re skrifis vy dhywgh war nebes lavarow, ow keski ha dustunia bos hemma gwir gras Duw; sevewgh fyrv ynno.

¹³An eglos yn Babylon, dewisys war-barth genowgh hwi, ha Mark ow mab a'gas dynnergh.

¹⁴Salusewgh an eyl y gila gans bay kerensa. Kres dhywgh hwi oll usi yn Krist.[19]