Read Kernewek 2 Peder 2 Bible Online

2 Peder 2 - Kernewek bible

2 Peder 2

¹Mes yth esa fals profoesi yn mysk an bobel kepar dell vydh fals dhyskadoryon yn agas mysk ynwedh, a vynn dri tebelgryjyansow fell, ow nagha hwath an Mester a wrug aga frena, hag ow tri diswrians uskis warnedha i.

²Ha lies a wra siwya aga fara direwl, ha drefenn an re ma y fydh fordh an gwiryonedh blasfemys.

³Ha dre grefni gans fals lavarow hwi a vydh gwrys marchondis gansa. Ragdha i seulabrys nyns yw lent an vreus, ha ny gosk an diswrians.

⁴Rag mar ny sparyas Duw eledh re wrussa pegha, mes aga dannvon yn-nans dhe dewlder Tartarus, dhe vos gwithys bys y'n vreus;

⁵ha mar ny sparyas an bys koth, mes y hwithas Noy, herot ewnder, gans seyth den arall, hag ev ow tannvon an liv war an norvys a dus dhidhuw;

⁶ha mar tampnyas sitys Sodom ha Gomorra dhe dhiswrians, orth aga leski dhe lusu yn ensampel dhe dus a vynno bewa ongrassyes;

⁷ha mar sawyas Lot gwiryon, grevys gans an bewedh plos a'n re dhrog,

⁸(rag dydh wosa dydh an den gwiryon ma, trigys yn aga mysk, a dormentyas y enev gwiryon gans aga gwriansow dilagha a welas ha klewes):

⁹ena an Arloedh a woer delivra tus dhuwek yn-mes a brevyans, mes gwitha tus kammhynsek yn-dann gessydhyans bys dydh breus,

¹⁰ha dres oll an re ow mos war-lergh an kig yn drokhwans plos hag ow tispresya awtorita. Bold ha goethus, ny berthons own a vlasfemya eledh splann an nev,

¹¹mes eledh, spit dh'aga nerth ha'ga galloes brassa, ny dhrons breus a vlasfemi er aga fynn a-dherag an Arloedh.

¹²Mes an re ma, kepar ha bestes heb reson dineythys war-lergh natur dhe vos kechys ha distruys, ow plasfemya a-dro dhe daklow na wodhons, a vydh distruys y'n keth vaner,

¹³ow kodhevel drog kepar ha gober drog ha tybi plesour hweg dydhweyth bos hegar. Nammow ha brith yns i ow lowenhe yn aga thoell hag i ow kevewi genowgh hwi.

¹⁴Lenwys yw aga dewlagas a hwans dhe neb avoutres, ow hwilas pegha heb hedhi. I a dhyn enevow gwann, dyskys aga holonn yn krefni, fleghes emskemunys!

¹⁵Ow kasa fordh ewn, i a sowdhanas, ow siwya fordh Balaam mab Beor[2] a garas gober droktra,

¹⁶mes ev a gavas keredh y dhrogober y honan: asen avlavar ow kewsel gans lev den a lettyas muskokter an profoes.

¹⁷An re ma yw fentynyow heb dowr, ha niwlow herdhys yn-rag dre hager-awel; ha tewolgow tewlder re beu gwithys ragdha i.

¹⁸Rag ow kewsel gans bostyans euver, i a dhyn gans drokhwansow direwl an kig an re na dhiank skant dhiworth an dus a vew yn maner bodrek.

¹⁹I a ambos rydhses dhedha, kyn fons i aga honan kethwesyon diswrians, rag den mars yw fethys gans nebonan, dhodho ev kethwas gyllys yw.

²⁰Rag wosa diank mostedhes an bys dre aswonnvos an Arloedh ha Selwyas Yesu Krist, mars yns i maglennys arta ynna ha fethys, gweth gallas an studh diwettha anedha es an kynsa.

²¹Gwell via dhedha na wodhviens an fordh a ewnder, es treylya, wosa godhvos, dhiworth an arghadow sans a veu res dhedha.

²²An gwir lavar re goedhas warnedha, ‘An ki a dreyl arta dh'y hwyjans y honan’, hag ‘An vanow, wosa omwolghi, a dreyl dhe omrolya yn leys.’