Read Kernewek 1 Yowann 2 Bible Online

1 Yowann 2 - Kernewek bible

1 Yowann 2

¹Ow fleghigow, an re ma a skrifav dhywgh, rag na begghowgh. Ha mar pegh denvyth, yma dhyn pledyas gans an Tas, Yesu Krist, an gwiryon.

²Hag ev yw dehwelyans rag agan peghosow: ha nyns yw unnsel rag agan peghosow ni, mes ynwedh rag peghosow an bys oll.

³Ha dredhi y hyllyn bos sur y'n aswonnyn, mar kwithyn y worhemmynnow.

⁴Neb a lever, ‘My a'n aswonn’, mes ny with y worhemmynnow, gowleveryas yth yw ev, ha nyns usi an gwirder ynno.

⁵Mes piwpynag a synso y er, ynno yth yw kerensa Duw perfydhhes: dredhi y hwodhon, ni dhe vos ynno.

⁶Neb a lever ev dhe driga ynno, y tegoedh dhodho ynwedh kerdhes par dell gerdhi ev.

⁷Hwi garadowyon, ny skrifav dhywgh gorhemmynn nowydh, mes gorhemmynn koth a'gas bo a-dhia'n dalleth. An gorhemmynn koth yw an ger re glewsowgh.

⁸Arta, gorhemmynnow nowydh a skrifav dhywgh, an pyth yw gwir ynno ev hag ynnowgh hwi: rag tremenys yw an tewlder ha'n gwir wolow lemmyn a splann.

⁹Neb a lever y vos y'n golewder, hag a gas y vroder, yma ev y'n tewlder bys omma.

¹⁰Neb a gar y vroder a drig y'n golewder ha nyns eus ynno ken a drebuchya.

¹¹Mes neb a gas y vroder yma ev yn tewlder, hag a gerdh yn tewlder, ha ny wonn ev ple'th a, rag tewlder dhe dhalla y dhewlagas.

¹²My a skrif dhywgh hwi, fleghigow, drefenn bos gevys dhywgh agas peghosow a-barth y hanow ev.

¹³My a skrif dhywgh hwi, tasow, drefenn hwi dh'y aswonn neb usi a-dhia'n dalleth. My a skrif dhywgh, gwer yowynk, drefenn hwi dhe fetha an tebel el. My a skrif dhywgh hwi, fleghigow, drefenn hwi dhe aswonn an Tas.

¹⁴My re skrifas dhywgh, tasow, drefenn hwi dhe aswonn neb usi a-dhia'n dalleth. My re skrifas dhywgh, gwer yowynk, drefenn hwi dhe vos krev ha ger Duw dhe driga ynnowgh ha hwi dhe fetha an tebel el.

¹⁵Na gerewgh an bys, na'n traow usi y'n bys. Mar kar nebonan an bys, nyns usi ynno kerensa Duw.

¹⁶Rag pup-tra eus y'n bys, lust an kig ha lust an lagasow ha goeth bewnans, nyns esons a'n Tas mes a'n bys.

¹⁷Ha'n bys a dremen, ha'y lust: mes neb a wra bodh Duw a vew bys vykken.

¹⁸A fleghigow, yth yw an diwettha eur: ha dell re glewsowgh y teu Antekrist, y'n eur ma yma ynwedh lies Antekrist; dredhi y hwodhon hy bos an diwettha eur.

¹⁹I eth yn-mes a-dhiworthyn, mes ahanan nyns esens; rag mar pens i ahanan, y pessens genen; mes i eth yn-mes, rag may fo diskwedhys nag esens i oll dhiworthyn ni.

²⁰Mes hwi a'gas beus untyans gans an Sans, ha hwi a woer pup-tra.[3]

²¹Ny skrifis dhywgh drefenn na wodhowgh an gwirder, mes drefenn hwi dh'y wodhvos, ha godhvos nag eus gow a-dhiworth an gwir.

²²Piw yw an gowleveryas marnas neb a nagh Yesu dhe vos an Krist? Hemm yw an Antekrist neb a nagh an Tas ha'n Mab.

²³Pub huni neb a nagh an Mab, na byth moy ny'n jeves an Tas; neb a aswonn an Mab a'n jeves an Tas ynwedh.

²⁴Triges ynnowgh, an pyth re glewsowgh a-dhia'n dalleth. Mar trig ynnowgh an pyth re glewsowgh a-dhia'n dalleth, hwi ynwedh a wra triga y'n Mab hag y'n Tas.

²⁵Ha hemm yw an ambos re ambosas dhyn,[4] bewnans heb diwedh.

²⁶An re ma re skrifis dhywgh a-dro dhe'n re a vynnsa agas toella.

²⁷Mes an untyans re gevsowgh ganso a drig ynnowgh ha ny'gas beus edhomm a dhyskans gans denvyth: mes par dell wra an keth untyans ma agas dyski a-dro dhe bup-tra, ha'n untyans yw gwir, ha nyns yw gow, trigewgh ynno, dell re'gas dyskas.

²⁸Ha lemmyn, fleghigow, trigewgh ynno rag ma'gan bo fydhyans ynno pan omdhiskwettho, ha ma na'gan bo meth a-ragdho orth y dhevedhyans.

²⁹Mar kodhowgh y vos ewn, y hwodhowgh pubonan a wra ewnder dhe vos dineythys anodho.