Read Kernewek 1 Yowann 3 Bible Online

1 Yowann 3 - Kernewek bible

1 Yowann 3

¹Otta, py par kerensa re ros an Tas dhyn, bys ma'gan henwir fleghes Duw. Ytho ny'gan aswonn an bys drefenn na'n aswonni ev.

²Hwi garadowyon, lemmyn yth on fleghes Duw, ha ny welir hwath pandr'a vydhyn: mes ni a woer y fydhyn haval dhodho pan omdhiskwettho; rag ni a wra y weles dell yw ev.

³Ha pub den a'n jeves an govenek ma ynno a omlanha, poran dell yw ev glan.

⁴Piwpynag a beggho a dremen dres an lagha: rag peghadow yw fara anlaghel.

⁵Ha hwi a woer y feu diskwedhys rag doen agan peghosow dhe-ves; hag ynno nyns eus peghes.

⁶Ny begh neb a drig ynno: neb a begh, ny'n gwelas na'n aswonnis.

⁷Fleghigow, na esiwgh denvyth dh'agas toella; neb a wra ewnder yw ewn, par dell yw ev ewn.

⁸Neb a begh, a'n jowl yma; rag an jowl a begh a-dhia'n dalleth. Dhe'n porpos ma y feu diskwedhys Mab Duw, rag may tistrua oberow an jowl.

⁹Neb yw dineythys a Dhuw, ny begh ev; rag y has a bes ynno: ha ny yll ev pegha, drefenn y vos dineythys a Dhuw.

¹⁰Yn homma yth yw diskwedhys fleghes Duw, ha fleghes an jowl: neb na wra ewnder, nyns usi ev a Dhuw, na'n den na gar y vroder.

¹¹Rag hemm yw an messaj re glewsowgh a-dhia'n dalleth, may karren an eyl y gila.

¹²Nyns yw avel Kayn, esa a'n tebel el, hag a voldras y vroder. Ha prag y'n moldras? Drefenn bos y oberow y honan drog, ha bos re y vroder da.

¹³Na vedhewgh sowdhenys, A vreder, mara'gas kas an bys.

¹⁴Ni a woer ni dhe dremena a'n mernans dhe'n bewnans, drefenn ni dhe gara an vreder. Neb na gar y vroder, a drig yn mernans.

¹⁵Neb a gas y vroder, moldrer yw: hag y hwodhowgh na'n jeves moldrer vyth bewnans heb diwedh ow triga ynno.

¹⁶Dredhi ni a wel kerensa, drefenn ev dhe hepkorr y vewnans ragon: ha ni a dal hepkorr agan bewnans rag an brederedh.

¹⁷Mes neb a'n jeves pyth an bys ma, hag a wel bos dh'y vroder edhomm hag a dhege y golonn orto, fatell drig ynno kerensa Duw?

¹⁸A fleghigow, na geryn yn ger nag yn taves, mes yn ober hag yn gwirder.

¹⁹Ha dredhi y hwodhon ni dhe vos a'n gwir, ha ni a hebaskha agan kolonn a-dheragdho.

²⁰Rag mara'gan kuhudh agan kolonn ni, Duw yw brassa ages agan kolonn, hag a woer pup-tra.

²¹Hwi garadowyon, mar ny'gan kuhudh agan kolonn, ytho ni agan beus fydhyans a-rag Duw.

²²Ha ni a'gan beus ganso pypynag a pysyn, drefenn ni dhe witha y worhemmynnow ha ni dhe wul an pyth yw plegadow a-ragdho.

²³Ha hemm yw y worhemmynn, may kryssyn yn hanow y Vab Yesu Krist, ha may kyrryn an eyl y gila, dell ros gorhemmynn dhyn.

²⁴Ha'n re a with y worhemmynnow, a drig ynno, hag ynna ev a drig. Ha dredhi y hwodhon y trig ev ynnon, der an spyrys re ros dhyn.