Read Kernewek 1 Yowann 5 Bible Online

1 Yowann 5 - Kernewek bible

1 Yowann 5

¹Pub huni a grys Yesu dhe vos an Krist yw genys a Dhuw; ha pub huni a gar dineythor a gar ynwedh an flogh dineythys ganso.

²Dre hemma y hwodhon y keryn fleghes Duw, pan geryn Duw ha gwitha y worhemmynnow.

³Rag hemm yw kerensa Duw, may hwitthyn ni y worhemmynnow: ha nyns yw y worhemmynnow ankensi.

⁴Rag piwpynag a vo genys a Dhuw a feth an bys. Ha hemm yw an budhogoleth a fethas an bys: agan fydh.

⁵Piw yw ev a feth an bys saw neb a grys Yesu dhe vos Mab Duw?

⁶Hemm yw neb a dheuth dre dhowr ha dre woes, Yesu Krist; ha nyns o unnsel dre dhowr, mes dre dhowr ha dre woes. Ha'n Spyrys yw an dustunier, rag an Spyrys yw gwirder.

⁷Rag yma tri a dheg dustuni:[5]

⁸an Spyrys, an dowr, ha'n goes:[6] ha'n tri ma yw unnver.

⁹Mar kevyn an dustuni a dus, dustuni Duw yw brassa: rag hemm yw dustuni Duw may ros a-dro dh'y Vab.

¹⁰Neb a grys yn Mab Duw a'n jeves an dustuni ynno y honan. Neb na grys yn Duw, re'n gwrug gowleveryas; rag na grysis an dustuni re ros a-dro dh'y Vab.

¹¹Ha hemm yw an dustuni, Duw dhe ri dhyn bewnans heb diwedh, ha bos an bewnans ma yn y Vab.

¹²Neb a'n jeves an Mab a'n jeves bewnans; neb na'n jeves Mab Duw, ny'n jeves ev bewnans.

¹³My re skrifas an re ma dhywgh a grys yn hanow Mab Duw, rag may hwodhvowgh bos dhywgh bewnans heb diwedh.

¹⁴Ha hemm yw an fydhyans a'gan beus ynno: mar pysyn neppyth dhiworto herwydh y vodh, ev dh'agan klewes.

¹⁵Ha mar kodhon ev dh'agan klewes yn pypynag a byssyn, ni a woer ni dhe gavoes an pyth a wovynnsyn orto.

¹⁶Den mar kwel y vroder ow pegha peghes nag eus bys yn mernans, ev a wra pysi, ha Duw a re dhodho bewnans rag an re na beghons bys yn mernans. Yma peghes yw peghes bys yn mernans; ny lavarav y tylir pysi rakhenna.

¹⁷Oll kammwrians yw peghes, mes yma peghes nag yw bys yn mernans.

¹⁸Ni a woer na begh piwpynag yw genys a Dhuw, mes Neb a veu genys a Dhuw a'n gwith, ha na'n toch an tebel el.

¹⁹Ni a woer ni dhe vos a Dhuw, ha bos oll an bys yn nerth an tebel el.

²⁰Ha ni a woer re dheuth Mab Duw ha re ros dhyn konvedhes, dhe aswonn neb yw gwiryon; hag yth eson ynno ev yw gwiryon, yn y Vab Yesu Krist. Hemm yw an gwir Dhuw ha bewnans heb diwedh.

²¹A fleghigow, omwithewgh rag idolys.