Read Kernewek Breusysi 10 Bible Online

Breusysi 10 - Kernewek bible

Breusysi 10

¹Wosa Abimelek, Tola mab Pua mab Dodo, gour a Yssakar, trigys yn Shamir yn bro venydhyek Efraym, a sevis dhe dhelivra Ysrael.

²Ev a vreusi Ysrael teyr blydhen warn ugens. Ena y ferwis, hag a veu ynkleudhys yn Shamir.

³War y lergh y teuth Yair an Gileadyas, hag ev a vreusi Ysrael diw vlydhen warn ugens.

⁴Ev a'n jevo deg mab warn ugens hag a varghoga war dheg asen warn ugens, hag yth esa dhedha deg tre warn ugens yn pow Gilead, ha henwys yth yns Havvoth-yair bys y'n jydh ma.

⁵Yair a verwis hag a veu ynkleudhys yn Kamon.

⁶Mebyon Ysrael a wrug arta an pyth o drog yn golok an ARLOEDH, ow kordhya an Baalim ha'n Ashtaroth, duwow Aram, duwow Sidon, duwow Moab, duwow an Ammonysi, ha duwow an Filistysi. Yndella i a asas an ARLOEDH, ha ny'n gordhyens.

⁷Ytho sorr an ARLOEDH a dhewis erbynn Ysrael, hag ev a's gwerthas yn leuv an Filistysi hag yn leuv an Ammonysi,

⁸hag i a vrewis hag arwaska mebyon Ysrael y'n vlydhen na. Etek blydhen i a waska oll mebyon Ysrael esa dres an Yordan yn pow an Amorysi, usi yn Gilead.

⁹An Ammonysi ynwedh a dreusis an Yordan rag omladh erbynn Yuda, erbynn Benyamin, hag erbynn chi Efraym; yndella Ysrael a berthi ahwer meur.

¹⁰Ytho mebyon Ysrael a grias dhe'n ARLOEDH ow leverel, ‘Ni re beghas er dha bynn, drefenn ni dhe asa agan Duw, ha servya an Baalim.’

¹¹Ha'n ARLOEDH a leveris, ‘A ny'gas delivris dhiworth an Ejyptianys ha dhiworth an Amorysi ha dhiworth an Ammonysi ha dhiworth an Filistysi?

¹²An Sidonysi ynwedh ha'n Amalekysi, ha'n Maonysi a'gas arwaska; ha hwi a grias dhymmo ha my a'gas delivras dhiworth aga leuv.

¹³Byttegyns hwi re'm gasas ha re servyas duwow erell, ytho ny'gas delivrav na fella.

¹⁴Kewgh ha kriewgh dhe'n duwow re dhewissowgh; gwrens i agas delivra yn termyn agas ahwer.’

¹⁵Ha mebyon Ysrael a leveris dhe'n ARLOEDH, ‘Ni re beghas; gwra dhyn ni pypynag a hevel da dhis; mes deliver ni, ni a'th pys, y'n jydh ma!’

¹⁶Yndella i a bellhas an duwow estren yn-mes anedha hag a servyas an ARLOEDH; ha ny allas ev perthi poenvos Ysrael na fella.

¹⁷Ena an Ammonysi a veu gelwys dhe arvow, hag i a gampyas yn Gilead; ha mebyon Ysrael a omguntellas, hag i a gampyas yn Mispa.

¹⁸Pobel Gilead ha'ga fennsevigyon a leveris an eyl dh'y gila, ‘Piw yw an gour a dhalleth batalyas orth an Ammonysi? Ev a vydh penn war oll trigoryon Gilead.’