Read Kernewek Breusysi 11 Bible Online

Breusysi 11 - Kernewek bible

Breusysi 11

¹Lemmyn Yefthagh an Gileadyas a veu kasor galloesek, mes ev a veu mab hora. Gilead a veu tas Yefthagh.

²Gwreg Gilead a omdhug dhodho mebyon; ha pan vons tevys dhe oes, i a herdhyas Yefthagh dhe-ves, ow leverel dhodho, ‘Ny eritydh travyth yn chi agan tas, rag mab yth os a gen venyn.’

³Ena Yefthagh a fias a'y vreder hag a drigas yn pow Tob. Outlayers a omguntellas a-dro dhe Yefthagh ha'y holya.

⁴Wosa termyn an Ammonysi a vatalyas orth Ysrael.

⁵Ha pan vatalyas orth Ysrael, henavogyon Gilead eth dhe dhri Yefthagh a bow Tob.

⁶I a leveris dhe Yefthagh, ‘Deus ha bydh agan kaslewydh, rag may patallyen orth an Ammonysi.’

⁷Mes Yefthagh a leveris dhe henavogyon Gilead, ‘A nyns owgh an keth re poran ha'n re a'm denaghas ha'm herdhya yn-mes a ji ow thas? Ytho prag y tewgh dhymmo pan berthewgh ahwer?’

⁸Henavogyon Gilead a leveris dhodho, ‘Byttegyns ni re dreylyas dhis arta, rag mayth ylli genen ha batalyas orth an Ammonysi, ha mos ha bos penn warnan, war oll trigoryon Gilead.’

⁹Yefthagh a leveris dhe henavogyon Gilead, ‘Mara'm drowgh tre arta rag batalyas orth an Ammonysi, ha'n ARLOEDH a's deliver dhymm, y fydhav agas penn.’

¹⁰Ha henavogyon Gilead a leveris dhe Yefthagh, ‘An ARLOEDH a vydh yn test yntredhon; mar ny wren war-lergh dha eryow.’

¹¹Ytho Yefthagh eth gans henavogyon Gilead, ha'n bobel a'n gwrug penn ha kaslewydh warnedha, ha Yefthagh a gewsis oll y eryow a-rag an ARLOEDH yn Mispa.

¹²Ena Yefthagh a dhannvonas kannasow dhe vyghtern an Ammonysi ow leverel, ‘Pyth eus yntredhon ni, mayth os devedhys dhymmo rag batalyas orth ow thir?’

¹³Myghtern an Ammonysi a worthybis dhe gannasow Yefthagh, ‘Ysrael a gemmeras ow thir, hag ev ow tos yn-bann dhiworth Ejyp, a Arnon dhe'n Yabbok ha dhe'n Yordan; lemmyn ytho daskorr e yn kres.’

¹⁴Unnweyth arta Yefthagh a dhannvonas kannasow dhe vyghtern an Ammonysi

¹⁵hag a leveris dhodho, ‘Yndella a lever Yefthagh: Ny dhegemmeras Ysrael tir Moab dhe-ves na tir an Ammonysi,

¹⁶mes pan dheuthons yn-bann dhiworth Ejyp, Ysrael eth der an gwylvos dhe'n Mor Rudh hag a dheuth dhe Kadesh.

¹⁷Ena Ysrael a dhannvonas kannasow dhe vyghtern Edom, ow leverel, “Gas ni dhe dremena dre dha dir”; mes ny vynna myghtern Edom goslowes. I a dhannvonas ynwedh dhe vyghtern Moab, mes ny vynna assentya. Ytho Ysrael a wortas orth Kadesh.

¹⁸Ena i a vyajyas der an gwylvos, i a dremenas ryb pow Edom ha tir Moab hag a dheuth dhe denewen an est dhe bow Moab hag a gampyas a'n tu arall dhe Arnon. Ny entersons tir Moab, rag Arnon o or Moab.

¹⁹Ena Ysrael a dhannvonas kannasow dhe Sihon myghtern an Amorysi, myghtern Heshbon; hag Ysrael a leveris dhodho, “Gas ni dhe dremena dre dha dir dh'agan tir ni.”

²⁰Mes ny drestya Sihon may tremenna Ysrael der y diredh, ytho Sihon a guntellas oll y dus war-barth, hag a gampyas yn Yahas, hag a vatalyas orth Ysrael.

²¹Ena an ARLOEDH, Duw Ysrael, a ros Sihon hag oll y dus yn leuv Ysrael, hag i a's fethas; ytho Ysrael a eritas oll pow an Amorysi, esa trigys y'n tir na.

²²I a eritas oll pow an Amorysi a Arnon bys y'n Yabbok hag a'n gwylvos dhe'n Yordan.

²³Yndella an ARLOEDH, Duw Ysrael, a fethas an Amorysi a-rag y bobel Ysrael. A dewlydh jy may kemmerri aga le?

²⁴A ny dhelledh dhis kavoes an pyth a re dha dhuw Kemosh dhis dh'y gavoes? Hag a ny dhelledh dhyn kavoes oll an pyth a re an ARLOEDH agan Duw dhyn ni?

²⁵Lemmyn osta gwell dhe wir ages Balak mab Sippor myghtern Moab? A vatalyas a'y oes orth Ysrael, po a werryas gansa?

²⁶Ysrael re beu trigys yn Heshbon ha'y threvow, hag yn Aroer ha'y threvow, hag yn oll an trevow usi ryb Arnon tri hans blydhen; prag na's daskevsys a-ji dhe'n termyn na?

²⁷Ny beghsyn er dha bynn, mes ty re wrug drog er ow fynn, ow kwerrya er ow fynn. An ARLOEDH, neb yw breusyas, a vreus hedhyw yntra mebyon Ysrael ha'n Ammonysi.’

²⁸Mes ny woslowas myghtern an Ammonysi orth messaj Yefthagh a dhannvonas dhodho.

²⁹Ena spyrys an ARLOEDH a dheuth war Yefthagh, hag ev a dremenas dre Gilead ha Manasse. Ev a dremenas dre Gilead ha Manasse, hag yth eth dhe Mispa a Gilead, hag alena ev a dremenas dhe'n Ammonysi.

³⁰Yefthagh a wrug ti dhe'n ARLOEDH hag y leveris, ‘Mar redh an Ammonysi y'm leuv,

³¹ena piwpynag a dheu yn-mes a dharasow ow chi dhe vetya genev pan dhehwelav yn kres a'n Ammonysi, an keth henna a vydh dhe'n ARLOEDH, avel offrynn leskys’.

³²Yndella Yefthagh a dremenas dhe'n Ammonysi rag omladh er aga fynn; ha'n ARLOEDH a's ros yn y leuv.

³³Ev a's fethas yn fen dhiworth Aroer bys yn kyrghynn Minnith, ugens tre, ha bys Abel-keramim. Yndella an Ammonysi a veu fethys a-rag pobel Ysrael.

³⁴Pan dheuth Yefthagh dh'y ji yn Mispa, y feu y vyrgh ow tos yn-mes dhe vetya ganso gans tabourigow ha gans donsya. Hi o y unn flogh. Ny'n jevo naneyl mab na myrgh marnas hi.

³⁵Pan y's gwelas ev a skwardyas y dhillas, ha leverel, ‘Ellas ow myrgh, ty re'm dug fest isel, gyllys os acheson a ahwer meur dhymmo, rag my re igoras ow ganow dhe'n ARLOEDH, hag ny allav daskavoes ow thi.’

³⁶Hi a leveris dhodho, ‘Ow thas, mar igersys dha anow dhe'n ARLOEDH, gwra dhymm herwydh an pyth re dheuth a'th anow, rag an ARLOEDH re ros dhis dial erbynn dha eskerens, an Ammonysi.’

³⁷Ha hi a leveris dh'y thas, ‘Gas may fo an dra ma gwrys ragov. Gront dhymm dew vis rag mayth ylliv ha gwandra war an menydhyow, ha kyni rag ow gwyrghses, my ha'm kowethesow.’

³⁸‘Ke’, yn-medh ev, hag y's dannvonas dhe-ves dew vis. Ytho hi eth, hi ha'y howethesow ha kyni hy gwyrghses war an menydhyow.

³⁹Orth penn dew vis, hi a dhehwelis dh'y thas, neb a wrug dhedhi herwydh an ti re wrussa. Ny gosksa hi gans gour. Yndella y sevis us yn Ysrael

⁴⁰yth ylli myrghes Ysrael peswar dydh blydhen wosa blydhen ha kyni myrgh Yefthagh an Gileadyas.