Read Kernewek Breusysi 13 Bible Online

Breusysi 13 - Kernewek bible

Breusysi 13

¹Mebyon Ysrael a wrug an pyth o drog yn golok an ARLOEDH, ha'n ARLOEDH a's ros yn leuv an Filistysi dew-ugens blydhen.

²Yth esa gour a Sora, a gordh an Danysi, Manoagh y hanow, hag anvap o y wreg, ny's tevo flogh.

³Hag el an ARLOEDH a omdhiskwedhas dhe'n venyn hag a leveris dhedhi, ‘Kynth os gownagh, ha ny dhuges fleghes, ty a wra omdhoen ha dineythi mab.

⁴Ytho gwayt na yffi gwin na diwes krev, na dhyppri travyth avlan.

⁵Rag ty a omdheg ha dineythi mab. Gwayt na dheffo altenn vyth war y benn rag an mab a vydh Naziryas dhe Dhuw a'y enesigeth. Ev a vydh neb a dhalleth delivra Ysrael a leuv an Filistysi.’

⁶Ena an venyn a dheuth hag a leveris dh'y gour, ‘Gour Duw a dheuth dhymm, ha'y semlans o haval dhe semlans el Duw, pur euthyk; ny wovynnis vy orto a-ble teuth ha ny dherivas dhymm y hanow,

⁷mes ev a leveris dhymm, “Ty a omdheg ha dineythi mab. Ytho na yv gwin vytholl na diwes krev, ha na dheber travyth avlan, rag an mab a vydh Naziryas dhe Dhuw a'y enesigeth bys dydh y vernans.” ’

⁸Ena Manoagh a bysis war an ARLOEDH, ha leverel, ‘A Arloedh, my a bys, gas may teffo dhyn arta an gour Duw a dhannvensys, ha dyski dhyn an pyth dhe wul a-dro dhe'n mab hag a vydh genys.’

⁹Duw a woslowas orth Manoagh hag el Duw a dheuth arta dhe'n venyn, ha hi owth esedha y'n mes; mes nyns esa hy gour Manoagh gensi.

¹⁰Ytho hi a boenyas skav hag a leveris dh'y gour, ‘An gour a dheuth dhymm nammnygen re omdhiskwedhas dhymm.’

¹¹Manoagh a sevis hag a holyas y wreg, hag a dheuth dhe'n gour hag a leveris dhodho, ‘Osta jy an gour hag a gewsis dhe'n venyn ma?’ Hag y leveris, ‘Ov.’

¹²Ena Manoagh a leveris, ‘Lemmyn pan ello dha eryow ha bos gwir, pyth a vydh rewl bewnans an mab, ha pandr'a vydh y ober?’

¹³El an ARLOEDH a leveris dhe Manoagh, ‘Gwaytyes an venyn gul pup-tra oll a leveris vy dhedhi.

¹⁴Difennys vydh orti dybri travyth a dheu a'n gwinbrenn. Difennys vydh orti eva naneyl gwin na diwes krev, na dhybri travyth avlan. Res vydh dhedhi bos gostydh dhe bup-tra re worhemmynnis vy dhedhi.’

¹⁵Manoagh a leveris dhe el an ARLOEDH, ‘Gas ni dhe'th witha genen ha dhe bareusi gevrik ragos.’

¹⁶El an ARLOEDH a leveris dhe Manoagh, ‘Mara'm gwithydh genowgh, ny dhebrav dha voes; mes mar mynnydh pareusi offrynn leskys, ena gwra y offrynna dhe'n ARLOEDH.’ Rag ny wodhya Manoagh y vos el an ARLOEDH.

¹⁷Ena Manoagh a leveris dhe el an ARLOEDH, ‘Pyth yw dha hanow, rag may hyllyn dha enora pan vo gyllys dhe eryow gwir?’

¹⁸Mes el an ARLOEDH a leveris dhodho, ‘Prag y hwovynnydh orthiv ow hanow? Re varthys yw.’

¹⁹Yndella Manoagh a gemmeras an gevrik gans an offrynn greun, ha'y offrynna war an garrek dhe'n ARLOEDH, dhodho ev neb a wra marthusyon.

²⁰Pan yskynnas an flamm war-tu ha'n nev dhiwar an alter, el an ARLOEDH a yskynnas yn flamm an alter, ha Manoagh ha'y wreg ow mires; hag i a goedhas, ha'ga fas dhe'n dor.

²¹Ny omdhiskwedhas el an ARLOEDH dhe Manoagh ha'y wreg arta. Ena Manoagh a wodhva y vos el an ARLOEDH.

²²Ha Manoagh a leveris dh'y wreg, ‘Ni a verow yn surredi, rag ni re welas Duw.’

²³Mes y wreg a leveris dhodho, ‘Mar mynna an ARLOEDH agan ladha, ny dhegemmersa offrynn leskys hag offrynn greun a'gan diwleuv, na ny dhiskwedhsa oll an traow ma, na ny dherivsa dhyn traow a'n par ma.’

²⁴An venyn a dhineythis mab, ha'y henwel Samson. An maw a devi, ha'n ARLOEDH a'n bennigas.

²⁵Spyrys an ARLOEDH a dhallathas movya ynno yn Mahane-dan, yntra Sora ha Eshtaol.