Read Kernewek Breusysi 17 Bible Online

Breusysi 17 - Kernewek bible

Breusysi 17

¹Yth esa gour a vro venydhyek Efraym, Mika y hanow.

²Ev a leveris dh'y vamm, ‘An unnek kans bath a arghans a veu kemmerys dhiworthis anedha may kewsys molleth hag yn surredi ty a'n kewsys y'm klewans — yma an arghans genev; my a'n kemmeras, mes lemmyn y'n daskorrav dhis.’[4] Ha'y vamm a leveris, ‘Re bo ow mab bennigys gans an ARLOEDH.’

³Ena ev a dhaskorras an unnek kans bath a arghans dh'y vamm, ha'y vamm a leveris, ‘Sakra a wrav an arghans dhe'n ARLOEDH a'm leuv a-barth ow mab rag gul imaj gravys hag imaj teudh.’

⁴Ytho pan dhaskorras an arghans dh'y vamm, y vamm a gemmeras dew kans bath a arghans, ha'y ri dhe weythor arghans, neb a's gwrug yn imaj teudh; hag yth esa yn chi Mika.

⁵An keth gour ma Mika a'n jevo y sentri y honan, hag ev a wrug efod ha terafim hag a sakras onan a'y vebyon, neb eth ha bos y oferyas.

⁶Y'n dydhyow na nyns esa myghtern yn Ysrael; pub gour a wre an pyth o ewn yn y dhewlagas y honan.

⁷Lemmyn yth esa gour yowynk a Bethlehem yn Yuda, a gordh Yuda. Levyas o, trigys ena.

⁸An gour ma a asas an dre Bethlehem yn Yuda rag triga yn pyle pynag may hallo kavoes tyller. Pan esa ow vyajya, ev a dheuth dhe ji Mika yn bro venydhyek Efraym.

⁹Mika a leveris dhodho, ‘A byle osta devedhys?’ Ev a worthybis, ‘Levyas a Bethlehem yn Yuda yth ov, hag yth av dhe driga yn py le pynag may hallav kavoes tyller.’

¹⁰Ena Mika a leveris dhodho, ‘Trig genev, ha bydh dhymmo tas hag oferyas, hag y rov dhiso deg bath a arghans a'n vlydhen, dha dhillas ha'th pygans.’

¹¹An Levyas a assentyas dhe driga gans an gour; ha'n den yowynk eth ha bos avel onan a'y vebyon.

¹²Yndella Mika a sakras an Levyas, ha'n gour yowynk eth ha bos y oferyas, hag yth esa trigys yn chi Mika.

¹³Ena Mika a leveris, ‘Lemmyn my a woer an ARLOEDH dhe wul da dhymm, drefenn an Levyas dhe vos ha bos ow oferyas.’