Read Kernewek Breusysi 19 Bible Online

Breusysi 19 - Kernewek bible

Breusysi 19

¹Y'n dydhyow na, pan nag esa myghtern yn Ysrael, neb Levyas, trigys y'n rannow pell a vro venydhyek Efraym, a gemmeras iswreg dhodho y honan a Bethlehem yn Yuda.

²Mes y iswreg a veu serrys orto, ha hi eth dhiworto dhe ji hy thas yn Bethlehem yn Yuda, hag yth esa hi ena neb peswar mis.

³Ena hy gour eth yn-mes war hy lergh, rag kewsel gensi yn hwar, ha rag hy dri dhe dre. Yth esa gansa y was ha dew asen. Pan dheuth ev dhe ji hy thas, hy thas a'n gwelas hag a dheuth gans joy dhe vetya orto.

⁴Y hwegron, tas an vowes, a'n ynnias, hag yth esa trigys ganso tri dydh, ow tybri hag eva, hag ow koska ena.

⁵Y'n peswora dydh i a sevis myttin a-varr, hag ev a ombareusis rag mos; mes tas an vowes a leveris dh'y dheuv, ‘Omgrevha gans temmik a voes, ha wosa henna hwi a yll mos.’

⁶Yndella an dhew dhen a esedhas hag a evas war-barth; ha tas an vowes a leveris dhe'n gour, ‘Spen an nos omma mar pleg ha lowenhe?’

⁷Pan sevis an gour rag mos, y hwegron a'n ynnias bys pan spenas ev an nos ena arta.

⁸Y'n pympes dydh ev a sevis myttin a-varr rag mos; ha tas an vowes a leveris, ‘Omgrevha.’ Ytho i a hokyas bys pan sedhis an jydh, ha'ga dew a dhybris hag eva.

⁹Pan sevis an gour ha'y iswreg ha'y was dhe vos, y hwegron, tas an vowes, a leveris dhodho, ‘Mir, galsa, an jydh yn-rag bys pan yw hi gorthugher ogasti. Spenewgh an nos. Mir, deuva an jydh dh'y dhiwedh. Spen an nos omma ha lowenha. A-vorow hwi a yll sevel myttin a-varr rag agas vyaj, ha mos tre.’

¹⁰Mes ny vynna an gour spena an nos ena; ev a sevis yn-bann ha mos, hag a dheuth a-dal Yebus (honn yw Yerusalem). Yth esa ganso dew asen dibrys, hag yth esa y iswreg ganso.

¹¹Pan esens ogas dhe Yebus gyllys pell o an jydh ha'n gwas a leveris dh'y vester, ‘Deus lemmyn, treylyn a-denewen dhe'n sita ma a'n Yebusysi, ha spena an nos ynni.’

¹²Mes y vester a leveris dhodho, ‘Ny dremenyn dhe sita estren, ma nag yw hy fobel Ysraelysi, mes ni a yn-rag dhe Gibea.’

¹³Ena ev a leveris dh'y was, ‘Deus, gwren assaya dos nes dhe onan a'n tylleryow na ha spena an nos yn Gibea po yn Rama.’

¹⁴Yndella i a dremenas yn-rag hag i eth war aga fordh, ha'n howl a sedhis warnedha pan vons ogas dhe Gibea, yw dhe Benyamin.

¹⁵I a dreylyas a-denewen ena, rag entra ha spena an nos yn Gibea. Ev a entras hag a esedhas yn plen an sita, mes ny's kemmeras nagonan rag spena an nos.

¹⁶Ena y'n gorthugher yth esa gour koth ow tos dhiworth y lavur y'n mes. A vro venydhyek Efraym yth o an gour, hag yth esa trigys yn Gibea (pobel an tyller o Benyaminysi).

¹⁷Pan viras an kothwas war-vann hag a welas an tremenyas yn plen an sita, ev a leveris, ‘Ple'th esos ow mos hag a-ble osta devedhys?’

¹⁸Ev a worthybis, ‘Yth eson ow tremena a Bethlehem yn Yuda dhe'n pella rannow a vro venydhyek Efraym, mayth esov vy anedhi. My re beu yn Bethlehem yn Yuda; hag yth esov ow mos dhe'm tre. Ny brofyas nebonan ow kemmeres yn y ji.

¹⁹Ni dha servysi a'gan beus kala ha boes rag agan asenes, gans bara ha gwin ragov ha rag an venyn ma, ha rag an gour yowynk usi genen. Ny'gan beus edhomm a dravyth moy.’

²⁰An kothwas a leveris, ‘Kres re bo genes. My a dhyght oll agas edhommow; saw na spen an nos y'n plen.’

²¹Ytho ev a'n dros yn y ji hag a ros boes dhe'n asenes; i a wolghas aga dewdroes, hag a dybris hag eva.

²²Pan esens ow lowenhe, gwer an sita, tebelwesyon, a gylghyas an chi hag a dhallathas frappya war an daras. I a leveris dhe'n kothwas, mester an chi, ‘Dro yn-mes an gour a dheuth y'th chi rag may hyllyn kesya ganso.’

²³Ha'n gour, mester an chi, eth yn-mes dhedha hag a leveris dhedha, ‘Na, ow breder, na omdhegewgh hwi mar dhrog. Drefenn bos an gour ma ow gwester, na wrewgh an dra dhivlas ma.

²⁴Otta omma ow myrgh wyrgh ha'y iswreg; gesiwgh vy dh'aga dri yn-mes lemmyn ha gwrewgh pypynag a vynnowgh y wul; mes erbynn an gour ma, na wrewgh an dra dhivlas ma.’

²⁵Mes ny vynnens goslowes orto. Ytho an gour a synsis y iswreg ha'y gorra yn-mes dhedha. I a's ravnas ha'y thebeldhyghtya oll an nos bys vora. Pan dardhas golow an jydh i a's gasas dhe vos.

²⁶Dell sevi an myttin, an venyn a dheuth hag a goedhas orth daras chi an gour mayth esa hy mester, bys pan o golow.

²⁷Hy mester a sevis myttin hag a igoras darasow an chi, ha pan eth yn-mes rag mos war y fordh, otta y iswreg a'y growedh orth daras an chi, ha'y diwleuv war an treudhow.

²⁸‘Sa'bann,’ yn-medh ev dhedhi, ‘ni a.’ Mes nyns esa gorthyp. Ena ev a's gorras war y asen, ha'n gour eth war y fordh.

²⁹Pan entras y ji, ev a gavas kollell, hag ow settya dalghenn yn y iswreg ev a's pow Ysrael.

³⁰Ena ev a erghis dhe'n wer a dhannvonas, ow leverel, ‘Yndella hwi a lever dhe bub Ysraelyas, “A hwarva tra a'n par ma a-dhia'n jydh may teuth mebyon Ysrael yn-bann dhiworth pow Ejyp bys y'n jydh ma? Avisiwgh anodho, omgusulyewgh, ha kewsiwgh.” ’