Read Kernewek Breusysi 2 Bible Online

Breusysi 2 - Kernewek bible

Breusysi 2

¹Lemmyn el an ARLOEDH eth yn-bann dhiworth Gilgal dhe Bokim, ha leverel, ‘My a'gas dros yn-mes a Ejyp, ha'gas dri a-berth y'n tir a des vy y ri dh'agas tasow. My a leveris, “Byth ny dorrav ow hevambos genowgh,

²ha hwi nevra ny wrewgh kevambos gans trigoryon an tir ma; hwi a derr dhe'n dor aga alteryow.” Mes ny obaysowgh ow lev. Prag y hwrussowgh hemma?

³Ytho my a lever dhywgh lemmyn, ny wrav aga chasya dhe-ves a-dheragowgh; mes i a ha bos kesstrivoryon dhywgh, ha'ga duwow a vydh antell dhywgh.’

⁴Pan gewsis el an ARLOEDH an geryow ma dhe oll mebyon Ysrael, an bobel a dhrehevis aga lev hag oela.

⁵Ytho i a henwis an tyller na Bokim; hag i a wrug offrynnow dhe'n ARLOEDH ena.

⁶Pan wrug Yoshua dannvon an bobel dhe-ves, pub esel a vebyon Ysrael eth dh'y eretons y honan dhe dhalghenna an tir.

⁷An bobel a servya an ARLOEDH dres oll dydhyow Yoshua, ha dres oll dydhyow an henavogyon a vewas pella es Yoshua, neb a welsa oll an ober meur a wrug an ARLOEDH a-barth Ysrael.

⁸Yoshua mab Nun, gwas an ARLOEDH, o kans bloedh ha deg pan verwis.

⁹Hag i a'n ynkleudhyas a-berth yn oryon y eretons yn Timnath-heres, yn bro venydhyek Efraym, a'n gledhbarth dhe venydh Gaash.

¹⁰Hag oll an henedh na a veu kuntellys dh'aga thasow ynwedh, hag ena ken henedh a devis war aga lergh, neb na aswonni an ARLOEDH na'n ober gwrys ganso a-barth Ysrael.

¹¹Ena mebyon Ysrael a wrug drogober yn golok an ARLOEDH hag a servyas an Baalim.

¹²I a forsakyas an ARLOEDH, Duw aga thasow, neb a's dros yn-mes a bow Ejyp; i a holyas duwow erell a dhuwow an poblow esa a-dro dhedha, hag i a blegyas dhe'n dor a-ragdha, ha serri an ARLOEDH.

¹³I a forsakyas an ARLOEDH, hag a servyas an Baalim ha'n Ashtaroth.

¹⁴Ytho sorr an ARLOEDH a loskas erbynn Ysrael, hag ev a's daskorras dhe ladron, neb a's pyllas; hag ev a's gwerthas yn diwla aga eskerens a-dro dhedha, ma na yllens sevel pella erbynn aga eskerens.

¹⁵Peskweyth may kerdhens yn-mes, leuv an ARLOEDH o er aga fynn a-barth droktra kepar dell lavarsa an ARLOEDH ha kepar dell dos ev ti; hag yth esens yn tebel studh.

¹⁶Ena an ARLOEDH a dhrehevis breusysi neb a wre aga selwel dhiworth leuv an re a'ga fylla.

¹⁷Mes hwath ny woslowens orth aga breusysi, mes yth esens ow horya war-lergh duwow erell ha plegya dhedha; i a dreylya yn skon a-dhiworth an fordh may kerdhi aga thasow, neb re beu gostydh dhe worhemmynnow an ARLOEDH, ha ny wrens yndella.

¹⁸Peskweyth may trehevi an ARLOEDH breusysi ragdha, yth esa an ARLOEDH gans an breusyas, hag ev a wre aga sawya dhiworth diwla aga eskerens oll dydhyow an breusyas; rag an ARLOEDH a gemmeri truedh drefenn aga hanasa dre reson an re a wre aga duwenhe ha'ga gwaska.

¹⁹Mes pan verwis breusyas, i a dreylya war-dhelergh ha bos moy tebel es aga thasow, owth holya duwow erell, orth aga servya ha plegya dhedha. Ny wrussons gasa aga gwriansow na'ga fordhow gorth.

²⁰Ytho sorr an ARLOEDH a loskas erbynn Ysrael; hag ev a leveris, ‘Rag an bobel ma dhe derri ow hevambos a worhemmynnis vy dh'aga thasow, ha ny woslowsons orth ow lev,

²¹alemma rag ny jasyav dhe-ves a-dheragdha kenedhel vyth a asas Yoshua pan verwis,

²²rag may preffiv Ysrael dredha, a wrens i gwitha fordh an ARLOEDH ow kerdhes ynni, kepar dell y's gwitha aga thasow, po na wrens.’

²³Ytho an ARLOEDH a asas an kenedhlow na, heb aga chasya dhe-ves distowgh, ha ny's gorras yn leuv Yoshua.