Read Kernewek Breusysi 4 Bible Online

Breusysi 4 - Kernewek bible

Breusysi 4

¹Mebyon Ysrael a wrug an pyth o drog yn golok an ARLOEDH wosa Ehud dhe verwel.

²Ytho an ARLOEDH a's gwerthas yn leuv Yabin myghtern Kanan esa ow reynya yn Hasor; kaslewydh y lu o Sisera, esa trigys yn Harosheth-ha-goyim.

³Ena mebyon Ysrael a grias dhe'n ARLOEDH rag gweres; rag ev a'n jevo kans charett a horn, ha re arwasksa mebyon Ysrael yn fell ugens blydhen.

⁴Y'n termyn na yth esa Debora, profoeses, gwreg Lappidoth, ow preusi Ysrael.

⁵Hi a esedha yn-dann balm Debora yntra Rama ha Bethel yn bro venydhyek Efraym, ha mebyon Ysrael a dho dhedhi rag breus.

⁶Hi a dhannvonas ha gelwel Barak mab Abinoam a Kedesh Naftali, hag a leveris dhodho, ‘An ARLOEDH, Duw Ysrael a'th worhemmynn, “Ke ha hembronk yn-mes deg mil wour a vebyon Naftali hag a vebyon Zebulun, ha'ga dri genes dhe venydh Tabor.

⁷My a denn Sisera, kaslewydh lu Yabin, yn-mes rag dha vetya orth nans Kishon gans y jarettow ha'y lu; ha my a'n re y'th leuv.” ’

⁸Barak a leveris dhedhi, ‘Mars edh genev, yth av; mes mar nyns edh genev, nyns av vy.’

⁹Ha hi a leveris, ‘Yth av genes yn surredi; byttegyns ny led an fordh mayth edh warnedhi dhe'th glori, rag an ARLOEDH a werth Sisera yn leuv benyn.’ Ena Debora a sevis yn-bann hag eth gans Barak dhe Kedesh.

¹⁰Barak a elwis Zebulun ha Naftali dhe Kedesh, ha deg mil gour eth yn-bann war y lergh; ha Debora eth yn-nans ganso.

¹¹Lemmyn Heber an Kenyas re dhibarthsa dhiworth an Kenysi erell, mebyon Hobab hwegron Moyses, hag ev re gampyas mar bell avel an dherwenn yn Saanannim ogas dhe Kedesh.

¹²Pan veu derivys dhe Sisera Barak mab Abinoam dhe vos gyllys dhe venydh Tabor,

¹³Sisera a elwis oll y jarettow, naw kans charett a horn, hag oll an bobel esa ganso dhiworth Harosheth-ha-goyim dhe nans Kishon.

¹⁴Ena Debora a leveris dhe Barak, ‘Yn-bann! Rag hemm yw an jydh may ros an ARLOEDH Sisera y'th leuv. Yn tevri yma an ARLOEDH ow mos yn-mes a-ragos.’ Ytho Barak eth yn-nans a venydh Tabor gans deg mil wour orth y holya.

¹⁵Ha'n ARLOEDH a worras yn deray Sisera hag oll y jarettow hag oll y lu a-rag Barak gans min an kledha; ha Sisera a dhiyskynnas a'y jarett hag a fias yn-kerdh war droes,

¹⁶ha Barak a jasyas war-lergh an charettow ha'n lu bys Harosheth-ha-goyim. Oll lu Sisera a goedhas dre vin an kledha; nyns o nagonan gesys.

¹⁷Lemmyn Sisera a fias war droes dhe dylda Yael gwreg Heber an Kenyas; rag yth esa kres yntra myghtern Yabin a Hasor ha chi Heber a Kenyas

¹⁸Yael a dheuth yn-mes rag metya orth Sisera hag a leveris dhodho, ‘Treyl a-denewen, ow arloedh, treyl a-denewen dhymmo vy; na borth own.’ Ytho ev a dreylyas dhedhi yn hy thylda, ha hi a'n gudhas gans strel.

¹⁹Ena yn-medh ev dhedhi, ‘Ro dhymmo banna a dhowr dhe eva mar pleg, rag syghes a'm beus.’ Yndella hi a igoras kroghen a leth hag a ros dhodho diwes ha'y gudha.

²⁰Yn-medh ev dhedhi, ‘Sav orth entrans an tylda ha mar teu nebonan ha govynn, “Eus nebonan omma?” lavar “Nag eus” ’

²¹Mes Yael gwreg Heber a gemmeras ebil tylda hag a gemmeras morthol yn hy dorn hag eth yn tawel dhodho, hag ev a'y wrowedh fest yn kosk gans skwithter; ha hi a weskis an ebil yn er y benn, bys pan eth y'n dor, hag ev a verwis.

²²Pan dheuth Barak owth helghya Sisera, Yael eth yn-mes dhe vetya orto, hag a leveris dhodho, ‘Deus, hag my a dhiskwedh dhis an gour a hwilydh.’ Ytho ev a entras hy thylda, hag ottena Sisera a'y wrowedh marow ha'n ebil-tylda yn er y benn.

²³Yndella y'n jydh na Duw a uvelhas Yabin myghtern Kanan a-rag mebyon Ysrael.

²⁴Ena leuv mebyon Ysrael a weski tynna ha tynna war Yabin myghtern Kanan, bys pan dhiswrussons Yabin myghtern Kanan.