Read Kernewek Breusysi 6 Bible Online

Breusysi 6 - Kernewek bible

Breusysi 6

¹Mebyon Ysrael a wrug an pyth o drog yn golok an ARLOEDH, ha'n ARLOEDHa's ros yn leuv Midyan seyth blydhen.

²Leuv Midyan a arwaskas Ysrael; ha drefenn Midyan mebyon Ysrael a wrug ragdha aga honan skovvaow yn savnow y'n menydhyow, ha fowys ha dinasow.

³Rag py eur bynag mebyon Ysrael a blansa has, an Midyanysi ha'n Amalekysi ha mebyon an est a dho er aga fynn.

⁴I a gampya er aga fynn hag a dhiswre trevas an dor, bys yn kyrghynn Gaza, ha ny asens sosten a-ji dhe Ysrael, na davas na asen vytholl.

⁵Rag i ha'ga chatel a dho yn-bann, hag i a dhri aga thyldow, kemmys ha lokustes; nyns ens i dhe nivera, naneyl i aga honan na'ga howrvergh; i a entras an tir dh'y wastya.

⁶Yndella Ysrael o gyllys pur voghosek drefenn Midyan; ha mebyon Ysrael a grias dhe'n ARLOEDH rag gweres.

⁷Pan grias mebyon Ysrael dhe'n ARLOEDH drefenn Midyan,

⁸an ARLOEDH a dhannvonas profoes dhe vebyon Ysrael; hag ev a leveris dhedha, ‘Yndellma y lever an ARLOEDH, Duw Ysrael: My a'gas dros yn-bann yn-mes a Ejyp, ha'gas dri yn-mes a'n chi a gethneth;

⁹ha my a'gas delivras dhiworth leuv Ejyp, ha dhiworth leuv oll an re a'gas arwaska; my a's tewlis yn-mes a-ragowgh, ha ri dhywgh hwi aga thir;

¹⁰ha my a leveris dhywgh hwi, “An ARLOEDH agas Duw yth ov; na wordhyowgh duwow an Amorysi mayth esowgh trigys yn aga thir.” Mes ny woslewsowgh dhe'm lev.’

¹¹Lemmyn el an ARLOEDH a dheuth hag esedha yn-dann an derebinthenn yn Ofra, o dhe Yoash, an Abiezryas. Pan esa y vab Gideon ow trushya gwaneth y'n winwask, rag y gudha a'n Midyanysi,

¹²el an ARLOEDH a omdhiskwedhas dhodho hag a leveris dhodho, ‘Yma an ARLOEDH genes, kasor galloesek.’

¹³Gideon a worthybis dhodho, ‘Mes, syrra, mars usi an ARLOEDH genen, ytho prag y hwarva oll hemma dhyn? Ha ple'ma oll an gweythresow marthys a dherivas agan tasow dhyn, ow leverel, “A ny wrug an ARLOEDH agan dri yn-bann a Ejyp?” Mes lemmyn an ARLOEDH re'gan tewlis dhe-ves, ha'gan ri yn leuv Midyan.’

¹⁴Ena an ARLOEDH a dreylyas dhodho hag a leveris, ‘Ke y'th nerth ma ha deliver Ysrael a leuv Midyan; a ny wrugavy dha dhannvon?’

¹⁵Ev a worthybis, ‘Ow Arloedh, fatell allav delivra Ysrael? Ow hordh yw an gwanna yn Manasse, ha my yw an lyha yn ow theylu.’

¹⁶An ARLOEDH a leveris dhodho, ‘My a vydh genes, ha ty a wysk yn-nans an Midyanysi, yn kettep penn anedha.’

¹⁷Ena y leveris dhodho, ‘Mara'm bo favour genes, diskwa dhymm arwoedh yth yw ty usi ow kewsel genev.

¹⁸Na ge alemma kyns av dhiso jy, hag y trov yn-mes ow ro ha'y gorra a-ragos.’ Hag y leveris, ‘My a worta bys pan dhehwelli.’

¹⁹Ytho Gideon a entras yn y ji hag a bareusis gevrik, ha tesennow heb burm a efa a vleus; ev a worras an kig yn kanstell, ha'n kowl a worras yn pott, hag ev a's dros dhodho yn-dann an derebinthenn hag a's ros dhodho.

²⁰El Duw a leveris dhodho, ‘Kemmer an kig ha'n tesennow heb burm ha'ga gorra war an garrek ma, ha diver an kowl yn-mes.’ Hag ev a'n gwrug yndella.

²¹Ena el an ARLOEDH a ystynnas bleyn an lorgh esa yn y dhorn hag a dochyas an kig ha'n tesennow heb burm ha tan eth yn-bann a'n garrek hag a loskas an kig ha'n tesennow heb burm; hag el an ARLOEDH eth yn-mes a'y wolok.

²²Ena Gideon a wodhya henna dhe vos el an ARLOEDH, ha Gideon a leveris, ‘Gweres vy, Arloedh DUW! Rag my re welas el an ARLOEDH fas orth fas.’

²³Mes an ARLOEDH a leveris dhodho, ‘Kres re bo dhis; na borth own, ny verwydh.’

²⁴Ytho Gideon a dhrehevis alter dhe'n ARLOEDH ena, ha'y henwel, An ARLOEDH yw kres. Bys y'n jydh hedhyw y sev yn Ofra an Abiezrysi.

²⁵An nos na an ARLOEDH a leveris dhodho, ‘Kemmer tarow dha das, an nessa tarow seyth bloedh y oes, ha tenna dhe'n dor alter Baal yw dhe'th tas, ha trogh yn-nans an Ashera usi rybdho,

²⁶ha drehav alter dhe'n ARLOEDH dha Dhuw war benn an dinas ma, yn furv usadow, ena kemmer an nessa tarow, ha'y offrynna avel offrynn leskys gans prenn an Ashera a dreghydh yn-nans.’

²⁷Ytho Gideon a gemmeras deg gour a'y servysi, hag a wrug par dell re lavarsa dhodho an ARLOEDH, mes drefenn y vos re ownek a'y deylu hag a dus an dre dh'y wul dydhweyth, ev a'n gwrug nosweyth.

²⁸Pan sevis gwer an dre yn-bann ternos a-varr, otta, alter Baal o tennys yn-nans, ha'n Ashera rybdhi o treghys dhe'n dor, ha'n nessa tarow a veu offrynnys war an alter re bia drehevys.

²⁹Ytho i a leveris an eyl dh'y gila, ‘Piw a wrug hemma?’ Wosa hwithra ha govynn, yn-medhons, ‘Gideon mab Yoash a wrug hemma.’

³⁰Ena tus an dre a leveris dhe Yoash, ‘Dro yn-mes dha vab rag may farwo, rag ev re dennas yn-nans alter Baal ha re droghas yn-nans an Ashera esa rybdhi.’

³¹Mes ev a leveris dhe oll esa ow sevel er y bynn, ‘A vynnowgh strivya rag Baal, po a vynnowgh pledya y gen? Piw pynag a striv ragdho a vydh ledhys erbynn bora an jydh. Mars ywa duw, strives ev ragdho y honan, drefenn y alter dhe vos tennys yn-nans.’

³²Ytho y'n jydh na Gideon a veu henwys Yerubbaal, henn yw dhe leverel, ‘Strives Baal er y bynn’, drefenn ev dhe denna y alter yn-nans.

³³Ena oll a Midyanysi ha'n Amalekysi ha mebyon an est a dheuth war-barth, hag ow treusi an avon i a gampyas yn nans Yezreel.

³⁴Mes spyrys an ARLOEDH a dheuth war Gideon; hag ev a hwythas an hirgorn ha'n Abiezrysi a veu gelwys dh'y holya.

³⁵Ev a dhannvonas kannasow der oll Manasse, hag i a veu gelwys dh'y holya. Ev a dhannvonas kannasow dhe Asher, Zebulun, ha Naftali hag i ynwedh eth yn-bann dhe vetya orta.

³⁶Ena Gideon a leveris dhe Dhuw, ‘Mar telivrydh Ysrael der ow leuv, dell re leversys,

³⁷otta, my a worr knew a wlan war an leur-drushya; mara pydh gluth war an knew hepken, ha sygh vydh oll an leur, ena my a woer y telivrydh Ysrael der ow leuv, dell re leversys.’

³⁸Hag yndella yth o. Pan sevis yn-bann ternos a-varr, hag a waskas an knew, ev a wrynyas bollas a dhowr anodho.

³⁹Ena Gideon a leveris dhe Dhuw, ‘Na leskes dha sorr er ow fynn, gas vy dhe gewsel unnweyth moy; gas vy dhe previ gans an knew unnweyth moy; bedhes sygh war an knew hepken, ha bedhes gluth war an leur.’

⁴⁰Ha Duw a wrug yndella an nos na, sygh o war an knew hepken, ha war oll an leur yth esa gluth.