Read Kernewek Breusysi 7 Bible Online

Breusysi 7 - Kernewek bible

Breusysi 7

¹Ena Yerubbaal (henn yw Gideon) hag oll an bobel esa ganso a sevis yn-bann a-varr hag a gampyas ryb fenten Harod; hag yth esa kamp Midyan a'n gledhbarth dhedha, ryb bre More, y'n nans.

²An ARLOEDH a leveris dhe Gideon, ‘An re usi genes yw moy es dell eus edhomm dhymm dhe ri an Midyanysi yn aga leuv. Ny wra Ysrael marnas kemmeres an bri dhiworthiv, ow leverel, “Ow leuv evy re'm delivras.”

³Lemmyn ytho dyllo hemma yn klewans an bobel, “Piw pynag yw ownek hag ow krena, dehweles tre.” ’ Yndella Gideon a's kroedras; dew warn ugens mil anedha a dhehwelis tre ha deg mil a wortas.

⁴Ena an ARLOEDH a leveris dhe Gideon, ‘An bobel yw hwath re aga myns; kemmer i yn-nans dhe'n dowr ha my a's kroeder ragos ena. Pan lavarav, “Hemma a genes”, ev a genes; ha pan lavarav, “Nyns a hemma genes”, nyns a genes.’

⁵Ytho ev a gemmeras an bobel yn-nans dhe'n dowr, ha'n ARLOEDH a leveris dhe Gideon, ‘Oll an re hag a lap an dowr gans aga thaves, par dell lap ki, ty a's gorr dhe denewen; oll an re hag a war benn dewlin, ow korra aga diwla dh'aga ganow, ty a's gorr dhe'n denewen arall.’

⁶Myns an re hag a lapyas o tri hans gour; mes oll an re erell a'n bobel eth war benn dewlin rag eva dowr.

⁷Ena an ARLOEDH a leveris dhe Gideon, ‘Gans an tri hans hag a lapyas, my a'th teliver, hag y rov an Midyanysi y'th leuv. Dehweles oll an re erell dh'aga thre.’

⁸Ev a dhannvonas oll an Ysraelysi ma dh'aga thyldow, mes ev a withas an tri hans, hag i a gemmeras sosten an bobel dhiworth aga diwla, ha'ga hirgern. Yth esa kamp an Midyanysi yn-danno y'n nans.

⁹Y'n keth nos an ARLOEDH a leveris dhodho, ‘Sa'bann hag omsett erbynn an kamp; rag my re'n ros y'th leuv.

¹⁰Mes mara'th eus own a omsettya, ke yn-nans dhe'n kamp gans dha was Pura,

¹¹ha ty a glew an pyth a leverons, hag a-wosa dha dhiwleuv a vydh krevhes rag omsettya erbynn an kamp.’ Ytho ev eth yn-nans gans y was Pura dhe amal aray an wer ervys esa y'n kamp.

¹²An Midyanysi ha'n Amalekysi hag oll mebyon an est a wrowedha y'n nans avel hes a lokustes; ha'ga howrvergh o diniver, avel tewes an morrep.

¹³Pan dheuth Gideon, yth esa gour ow terivas hunros dhe vata; hag ev a leveris, ‘My a hunrosas hunros, hag otta, tesenn a vara heydh a goedhas yn kamp Midyan, hag a dheuth dhe'n tylda, hag a'n gwaskas bys may koedhas; ev a'n treylyas penn a-wartha dhe woeles ha'n tylda a goedhas.’

¹⁴Ha'y vata a worthybis, ‘Nyns yw henna marnas kledha Gideon mab Yoash, gour a Ysrael; Duw re ros Midyan hag oll an lu yn y leuv.’

¹⁵Pan glewas Gideon derivas an hunros ha'y styr, ev a wordhyas. Ev a dhehwelis dhe gamp Ysrael, hag a leveris, ‘Sevewgh yn-bann; rag an ARLOEDH re ros kamp Midyan yn agas leuv.’

¹⁶A-wosa ev a rannas an tri hans gour yntra tri fara, hag a worras hirgern yn aga diwdhorn oll, ha sethow gwag, gans faglennow a-berth y'n sethow.

¹⁷Ev a leveris dhedha, ‘Mirewgh orthiv, ha gwrewgh an keth tra; pan dhov vy dhe gyrghynn an gamp, gwrewgh par dell wrav.

¹⁸Pan hwythav an hirgorn, my hag oll usi genev, hwi ynwedh hwythewgh an hirgern oll a-dro dhe'n gamp, ha germewgh. “A-barth an ARLOEDH hag a-barth Gideon!” ’

¹⁹Ytho Gideon ha'n kans gour esa ganso a dheuth dhe gyrghynn an kamp yn dalleth an goel kres, wosa i dhe settya an goel; hag i a hwythas an hirgern ha brewi an sethow esa yn aga diwla.

²⁰Yndella an tri fara a hwythas an hirgern, ha terri an sethow, ow synsi yn aga leuv gledh an faglennow, hag yn aga leuv dhyghow an hirgern rag hwytha, hag i a grias, ‘Kledha a-barth an ARLOEDH hag a-barth Gideon!’

²¹Pub gour a sevi yn y le a-dro dhe'n kamp, hag oll an dus yn kamp a boenyas; i a grias yn ughel ha fia dhe'n fo.

²²Pan hwythsons an tri hans hirgorn, an ARLOEDH a settyas kledha pub den erbynn y vata hag erbynn oll an kamp; ha'n lu a fias maga pell avel Beth-shitta war-tu ha Serera, maga pell avel or Abel-mehola ryb Tabbath.

²³Ha gwer Ysrael a veu gelwys dhiworth Naftali ha dhiworth Asher ha dhiworth oll Manasse, hag i a jasyas war-lergh an Midyanysi.

²⁴Ena Gideon a dhannvonas kannasow der oll bro venydhyek Efraym, ow leverel, ‘Dewgh yn-nans erbynn an Midyanysi ha sesiwgh an dowrow er aga fynn, bys Beth-bara, ha'n Yordan ynwedh.’ Ytho oll gwer Efraym a veu gelwys yn-mes, hag i a gemmeras an dowrow bys Beth-bara, ha'n Yordan ynwedh.

²⁵I a gachyas an dhew bennsevik a Midyan, Oreb ha Zeeb; i a ladhas Oreb orth an garrek a Oreb, ha Zeeb a ladhsons orth an gwinwask a Zeeb, hag i ow chasya an Midyanysi. I a dhros penn Oreb ha penn Zeeb dhe Gideon, tu arall an Yordan.