Read Kernewek Breusysi 9 Bible Online

Breusysi 9 - Kernewek bible

Breusysi 9

¹Lemmyn Abimelek mab Yerubbaal eth dhe Shekem dhe gerens y vamm hag ev a leveris dhedha ha dhe gordh oll a deylu y vamm,

²‘Leverewgh yn diwskovarn arlydhi Shekem, “Pyneyl yw gwell ragowgh, an deg ha tri-ugens a vebyon Yerubbaal dhe reynya warnowgh po onan dhe reynya warnowgh?” Perthewgh kov ynwedh my dhe vos agas askorn ha'gas kig.’

³Ytho kerens y vamm a gewsis oll an geryow ma a'y wovis yn diwskovarn oll arlydhi Shekem ha'ga holonn a's tevo bodh a holya Abimelek, rag i a leveris, ‘Agan broder ywa.’

⁴I a ros dhodho deg shekel ha tri-ugens a arghans yn-mes a dempel Baal-berith gansa mayth arvethas Abimelek drokpolatys ha javelyon, neb a'n holyas.

⁵Ev eth dhe ji y das yn Ofra hag a ladhas y vreder mebyon Yerubbaal, deg gour ha tri-ugens war unn men. Mes Yotham mab Yerubbaal, an yowynka, a veu gesys, rag ev a omgudhas.

⁶Ena oll arlydhi Shekem hag oll Beth-millo a omguntellas, hag i eth hag a wrug Abimelek myghtern, orth an dherwenn ryb an peulven yn Shekem.

⁷Pan veu henna derivys dhe Yotham, ev eth hag a sevis war warthav menydh Gerizim, hag a grias yn ughel hag a leveris dhedha, ‘Goslowewgh orthiv, hwi arlydhi Shekem, rag may hwoslowo Duw orthowgh.

⁸An gwydh eth yn-mes rag untya myghtern warnedha aga honan. Ytho i a leveris dhe'n olewbrenn, “Reyn warnan.”

⁹An olewbrenn a worthybis dhedha, “A hedhav vy ow kul ow olew rych ganso mayth yw duwow ha tus enorys, ha mos dhe waya a-ugh an gwydh?”

¹⁰Ena an gwydh a leveris dhe'n figbrenn “Deus ha reyn warnan.”

¹¹Mes an figbrenn a worthybis dhedha, “A hedhav vy ow kul ow hwekter ha'm froeth sawrek, ha mos dhe waya a-ugh an gwydh?”

¹²Ena an gwydh a leveris dhe'n gwinbrenn, “Ty deus ha reyn warnan.”

¹³Ena an gwinbrenn a leveris dhedha, “A hedhav vy ow kul ow gwin a lowenha duwow ha tus, ha mos dhe waya a-ugh an gwydh?”

¹⁴Ena oll an gwydh a leveris dhe'n spedhasenn, “Ty deus ha reyn warnan.”

¹⁵Ha'n spedhasenn a leveris dhe'n gwydh, “Mar mynnowgh yn hwir ow untya myghtern warnowgh, ytho dewgh hag omwithewgh yn ow skeus; poken des tan yn-mes a'n spedhasenn ha leskes kederwydh Lebanon.”

¹⁶‘Lemmyn ytho, mar omdhugowgh yn gwirder hag yn lenduri pan wrussowgh Abimelek myghtern, ha mar tyghtsowgh yn teg gans Yerubbaal ha'y ji, ha re wrussowgh dhodho dell o gwiw —

¹⁷rag ow thas a omladhas ragowgh ha gorra y vewnans yn peryll, ha'gas delivras a leuv Midyan;

¹⁸mes hwi re sevis erbynn chi ow thas y'n jydh hedhyw, ha hwi re ladhas y vebyon, deg gour ha tri-ugens war unn men, ha hwi re wrug Abimelek, mab y vaghteth, myghtern war arlydhi Shekem, drefenn ev dhe vos a'gas teylu —

¹⁹mar tyghtsowgh yn gwirder hag yn lenduri gans Yerubbaal ha gans y ji y'n jydh ma, ytho lowenhewgh yn Abimelek, ha lowenhes ev ynnowgh;

²⁰mes mar ny wrussowgh yndella, des tan dhiworth Abimelek ha leski arlydhi Shekem ha Beth-millo, ha des tan dhiworth arlydhi Shekem, ha dhiworth Beth-millo, ha leski Abimelek.’

²¹Ena Yotham a boenyas dhe-ves, hag a fias, ow mos dhe Beer, le may hwortas, rag own a'y vroder Abimelek.

²²Abimelek a reynyas war Ysrael tri blydhen.

²³Mes Duw a dhannvonas tebel spyrys ynter Abimelek hag arlydhi Shekem; hag arlydhi Shekem a dhyghtyas yn fals gans Abimelek.

²⁴Hemma a hwarva rag may fe diellys an drog re bia gwrys dhe'n deg mab ha tri-ugens a Yerubbaal ha may fe aga goes gorrys war aga broder Abimelek, neb a's ladhas, ha war arlydhi Shekem, neb a grevhas y dhiwdhorn rag ladha y vreder.

²⁵Ytho arlydhi Shekem a settyas gwer yn kontrewaytyans war warthevyow an menydhyow. I a ladras pub huni a dremena rybdha war an fordh na; ha derivys veu dhe Abimelek.

²⁶Pan eth Gaal mab Ebed yn Shekem gans y deylu, arlydhi Shekem a drestyas ynno.

²⁷Wosa i dhe vos yn-mes dhe'n mes, ha kuntell grappys a'ga gwinlannow ha'ga trettya, i a synsis dy'goel. Ena i a entras yn chi aga duw hag eva, ha milliga Abimelek.

²⁸Gaal mab Ebed a leveris, ‘Piw yw Abimelek, ha piw yw an Shekemysi bys ma'n serfyn? A ny servyas mab Yerubbaal ha Zebul y soedhek gwer Hamor tas Shekem? Ytho prag y telledh ni dh'y servya?

²⁹Unnweyth a pe an bobel ma yn-dann ow leuv! Ena my a dhilesa Abimelek; my a lavarsa dhodho, “Ynkress dha lu ha deus yn-mes.” ’

³⁰Pan glewas Zebul, governour an sita, geryow Gaal mab Ebed y sorr a dhewis ynno.

³¹Ev a dhannvonas kannasow dhe Abimelek yn Aruma[2] ow leverel, ‘Otta, Gaal mab Ebed ha'y gerens deuva dhe Shekem, hag ymons ow treylya an sita er dha bynn.

³²Ytho lemmyn sav nosweyth, ty ha'n bobel usi genes, ha kontrewayt y'n prasow

³³Ena myttin a-varr, kettell vo an howl ow sevel, sav yn-bann ha fysk war an sita; ha pan dho ev ha'n bobel usi ganso yn-mes er dha bynn, ty a yll dyghtya gansa dell dhegoedh.’

³⁴Ytho Abimelek hag oll an bobel esa ganso a sevis nosweyth hag a gontrewaytyas erbynn Shekem yn peswar para.

³⁵Pan eth yn-mes Gaal mab Ebed hag a sevis orth entrans yet an sita, Abimelek ha'n bobel esa ganso a sevis dhiworth aga hudhva.

³⁶Ha Gaal pan y's gwelas, a leveris dhe Zebul, ‘Otta yma tus ow tiyskynna a bennow an menydhyow!’ Ha Zebul a leveris dhodho, ‘An skeusow war an menydhyow a hevel dhis bos tus.’

³⁷Gaal a gewsis arta hag a leveris, ‘Otta, yma tus ow tos yn-nans a gres an tir, hag yma unn para ow tos war fordh derwenn an goelyogyon.’

³⁸Ena Zebul a leveris dhodho, ‘Ple'ma dha vraslavar lemmyn, ty hag a leveris, “Piw yw Abimelek, bys ma'n serfyn?” A nyns yw an re ma an bobel a dhispressys? Ke yn-mes lemmyn hag omladh er aga fynn.’

³⁹Ytho Gaal eth yn-mes a-rag arlydhi Shekem hag a omladhas gans Abimelek.

⁴⁰Abimelek a'n chasyas hag ev a fias a-ragdho. Lies a goedhas goliys, bys yn entrans an yet.

⁴¹Ytho yth esa Abimelek trigys yn Aruma; ha Zebul a jasyas Gaal ha'y gerens yn-mes, bys ma na yllens triga na fella yn Shekem.

⁴²Ternos myttin an bobel eth yn-mes dhe'n prasow. Pan veu hemma derivys dhe Abimelek,

⁴³ev a gemmeras an bobel ha'ga ranna yntra tri fara, hag a gontrewaytyas y'n prasow. Pan viras ha gweles an dus ow tos yn-mes a'n sita, ev a sevis er aga fynn ha'ga ladha.

⁴⁴Abimelek ha'n para esa ganso a boenyas yn-rag hag a sevis orth entrans yet an sita, ha'n dhew bara a boenyas war oll an re esa y'n prasow ha'ga ladha.

⁴⁵Abimelek a omladhas erbynn an sita oll an jydh na; ev a gemmeras an sita hag a ladhas an bobel esa ynni; ev a dorras an sita dhe'n dor hag a's hasas gans hoelan.

⁴⁶Pan glewas oll arlydhi tour Shekem anodho, i a entras dorgell tempel El-berith

⁴⁷Derivys veu dhe Abimelek y feu oll arlydhi tour Shekem kuntellys war-barth.

⁴⁸Ytho Abimelek eth yn-bann dhe venydh Salmon, ev hag oll an bobel esa ganso. Abimelek a gavas boel yn y dhorn, ev a droghas pusorn a gewydh ha'y worra war y skoedh. Ena y leveris dhe'n bobel esa ganso, ‘An pyth a welsowgh hwi my dh'y wul, gwrewgh e yn skon, par dell re wrug vy.’

⁴⁹Ytho pub huni a'n bobel a droghas pusorn hag owth holya Abimelek i a'n gorras war an dhorgell, hag i a worras tan y'n dhorgell warnedha, bys may ferwis oll gwer tour Shekem ynwedh, a-dro dhe vil wour ha benynes.

⁵⁰Ena Abimelek eth dhe Thebes, hag a gampyas erbynn Thebes, ha'y sesya.

⁵¹Mes yth esa tour krev a-ji dhe'n sita, hag oll an wer ha'n benynes hag oll arlydhi an sita a fias dhodho hag a'n degeas war aga lergh, hag i eth dhe do an tour.

⁵²Abimelek a dheuth dhe'n tour, hag a vatalyas orto, hag a dheuth nes dhe dharas an tour rag gorra tan ynni.

⁵³Mes neb unn venyn a dewlis men-melin yn-nans war benn Abimelek, ha brewi y grogen.

⁵⁴Distowgh ev a elwis dhe'n yonker deger y arvow hag a leveris dhodho, ‘Tenn dha gledha ha'm ladha, ma na leverrer yn ow hever, “Benyn a'n ladhas.” ’ Ytho an yonker a'n gwanas, hag y ferwis.

⁵⁵Pan welas gwer Ysrael bos Abimelek marow, i eth tre yn kettep penn.

⁵⁶Yndella Duw a attylis dhe Abimelek a'n drogober a wrug erbynn y das, ow ladha y dheg broder ha tri-ugens,

⁵⁷ha Duw a wrug may koedhas oll droktra tus Shekem war aga fenn, ha warnedha a teuth molleth Yotham mab Yerubbaal.