Read Kernewek Diskwedhyans 12 Bible Online

Diskwedhyans 12 - Kernewek bible

Diskwedhyans 12

¹Ha tokyn bras a veu gwelys yn nev; benyn gwiskys gans an howl, ha'n loer yn-dann hy threys, ha kurun a dhewdhek sterenn war hy fenn;

²ha hi gans flogh y'n dorr, a armas yn gloesow, ow lavurya dhe dhineythi.

³Ha ken tokyn a veu gwelys yn nev, hag otta, dragon rudh meur gans seyth penn ha deg korn ha seyth diadem war hy fennow.

⁴Ha'y lost a skubas an tressa rann a'n ster a nev ha'ga thewlel dhe'n dor ha'n dhragon a sevis a-dherag an venyn a vedha ow tineythi, may teppra hy flogh kettell wrella hi y dhineythi.

⁵Ha hi a dhineythis mab gorreydh a vedha ow pugelya pub kenedhel gans gwelenn horn: ha'y flogh a veu ravshys dhe Dhuw, ha dh'y dron.

⁶Ha'n venyn a fias dhe'n gwylvos, le may ma dhedhi tyller parys gans Duw, ma's makkens hi ena mil dhydh dew kans ha tri-ugens.

⁷Hag yth esa kas yn nev. Mighal ha'y eledh a omladhas erbynn an dhragon; ha'n dhragon a omladhas ha'y eledh hi,

⁸ha ny fethsons i; ha ny veu aga thyller kevys namoy yn nev.

⁹Ha'n dhragon veur a veu tewlys yn-nans, an sarf goth neb yw gelwys an Jowl, ha Satnas, neb a doell oll an bys: ev a veu tewlys yn-nans bys y'n dor, ha'y eledh a veu tewlys yn-nans ganso.

¹⁰Ha my a glewas lev ughel yn nev ow leverel, ‘Lemmyn selwyans, ha nerth, ha gwlaskor agan Duw yw devedhys, ha galloes y Grist: rag bos kuhudhor agan breder tewlys yn-nans, neb a's kuhudhas dydh ha nos a-dherag agan Duw.

¹¹Hag i a'n fethas dre woes an Oen ha dre er aga dustuni, ha ny garsons aga bewnans bys yn ankow.

¹²Ytho, lowenhewgh, a nevow, ha hwi a drig ynna. Tru dhe'n dor ha dhe'n mor, rag an Jowl re dhiyskynnas dhywgh hwi, ha sorr bras ganso, rag ev a woer bos termyn berr ganso ev.’

¹³Ha pan welas an dhragon hy bos tewlys bys y'n dor, hi a helghyas an venyn a dhineythis an flogh gorreydh.

¹⁴Ha dhe'n venyn y feu res diwaskell an er bras may halla nija a-bervedh y'n gwylvos, bys yn hy thyller mayth yw megys ena termyn ha termynyow ha hanter termyn, dhiworth fas an sarf.

¹⁵Ha'n sarf a dewlis dowr yn-mes a'y anow kepar hag avon war-lergh an venyn may hwrella dhedhi bos degys dhe-ves gans an avon.

¹⁶Ha'n dor a weresas an venyn ha'n dor a igoras y anow ha lenki an avon a dewlis an dhragon yn-mes a'y ganow.

¹⁷Ha'n dhragon a sorras orth an venyn, hag yth eth dhe werrya gans remenant hy has neb a with gorhemmynnow Duw, ha dustuni Yesu yma gansa i.

¹⁸Ha hi[5] a sevis war dreth an mor.[6]