Read Kernewek Diskwedhyans 13 Bible Online

Diskwedhyans 13 - Kernewek bible

Diskwedhyans 13

¹Ha my a welas best ow trehevel yn-mes a'n mor, ha ganso deg korn ha seyth penn ha deg diadem war y gern, ha hanow blasfemi war y bennow.

²Ha'n best a welis o kepar ha lewpard, ha'y bawyow kepar ha pawyow ors, ha'y vin kepar ha min lew, ha'n dhragon a ros dhodho hy nerth, ha'y thron, ha galloes meur.

³Ha my a welas onan a'y bennow kepar ha pan ve goliys bys yn ankow, ha sawys veu y woli marwel, hag y feu marth gans oll an bys ow siwya war-lergh an best.

⁴Hag i a wordhyas an dhragon rag hi dhe ri galloes dhe'n best: hag i a wordhyas an best, ow leverel, ‘Piw yw kepar ha'n best, ha piw a yll gwerrya ganso?’

⁵Ha ganow a veu res dhodho, ow leverel taklow meur ha blasfemiow; ha galloes a veu res dhodho dhe weytha dew vis ha dew-ugens.

⁶Hag ev a igoras y anow yn blasfemiow erbynn Duw dhe vlasfemya y hanow ha'y dabernakel, ha'n re a drig yn nev.

⁷Hag y feu res dhodho dhe werrya gans an syns, ha'ga fetha: ha galloes a veu res dhodho war bub loeth ha pobel ha taves ha kenedhel.

⁸Hag oll trigoryon an norvys a wra y wordhya, nag yw skrifys aga henwyn yn lyver bewnans an Oen a veu ledhys, a-ban veu an norvys dallethys.

⁹Den mara'n jeves skovarn, klewes ev.

¹⁰Neb a ello yn kethneth, yn kethneth yth a: neb a vo ledhys gans kledha, gans kledha y fydh ledhys. Ottomma perthyans ha fydh an syns.

¹¹Ha my a welas ken best owth yskynna yn-mes a'n dor; hag yth esa dhodho dew gorn kepar hag oen, hag yth esa ow kewsel kepar ha dragon.

¹²Hag ev a ober gans oll an galloes a'n kynsa best a-dheragdho, hag ev a wra dhe'n dor ha dhe'n re a drig ynno gordhya an kynsa best hag a veu sawys y woli marwel.

¹³Hag ev a wra toknys bras may hwra dhe dan diyskynna dhiworth nev dhe'n dor a-dherag tus.

¹⁴Hag ev a doell an drigoryon war an bys der an toknys a veu res dhodho dhe wul a-dherag an best; ow leverel dhe'n re a drig war an bys may hwrellens imaj dhe'n best a veu goliys der an kledha hag a vewa.

¹⁵Hag y feu grontys dhodho dhe ri bewnans dhe imaj an best may kowssa imaj an best, ha may hwrella, kemmys na vynnens gordhya imaj an best dhe vos ledhys.

¹⁶Hag ev a wra dhe bub den, byghan ha bras, ha rych ha boghosek, ha rydh ha keth, degemmeres merk war an dhorn dhyghow, po war an tal,

¹⁷ha ma na alla denvyth na prena na gwertha, marnas neb a'n jevo an merk, hanow an best, po niver y hanow.

¹⁸Ottomma skentoleth. Neb a'n jevo skians niveres ev niver an best, drefenn y vos niver den; ha'y niver yw hwegh kans hwegh ha tri-ugens.