Read Kernewek Diskwedhyans 14 Bible Online

Diskwedhyans 14 - Kernewek bible

Diskwedhyans 14

¹Ha my a welas, hag ott, an Oen ow sevel war an menydh Sion, ha ganso kans peswar ha dew-ugens mil, gans y hanow ev ha hanow y Das skrifys war aga thal.

²Ha my a glewas son dhiworth nev kepar ha son lies dowr, ha son taran vras, ha'n son a glewis o kepar ha telynnyoryon ow telynnya gans aga thelynnow.

³Hag i a ganas kan nowydh a-dherag an tron hag a-dherag an peswar kreatur bew ha'n henavogyon, ha denvyth ny ylli dyski an gan marnas an kans peswar ha dew-ugens mil re beu prenys dhiworth an norvys.

⁴An re ma yw neb na veu mostys gans benynes, rag aga bos chast. An re ma yw neb a hol an Oen pyle pynag yth ello. An re ma a veu prenys dhiworth mab-den, kynsa frut dhe Dhuw ha dhe'n Oen.

⁵Hag yn aga ganow nyns o gow kevys. Dinamm yns i.

⁶Ha my a welas ken el ow nija yn kres nev gans an aweyl heb hedhi dhe bregoth dhe neb a drig war an norvys, ha dhe bub kenedhel ha loeth ha taves ha pobel,

⁷ow leverel, ughel y lev, ‘Porth own a Dhuw, ha ro glori dhodho, rag bos eur y vreus devedhys, ha gwra gormel neb a wrug nev ha nor ha'n mor ha'n fentynyow a dhowrow.’

⁸Ha ken el, an nessa anedha, a holyas, ow leverel, ‘Koedha, koedha a wrug Babylon vras, hag a wrug dhe oll kenedhlow eva a'n gwin a sorr hy fornikashyon.’

⁹Ha ken el, an tressa anedha, a'ga holyas, ow leverel, ughel y lev, ‘Den mar kordh an best ha'y imaj, ha degemmeres y verk war y dal po war y dhorn,

¹⁰ev ynwedh a wra eva a'n gwin a'n sorr a Dhuw, dinewys heb gwannhe y'n hanaf a'y sorr, hag ev a vydh tormentys gans tan ha loskven a-dherag an eledh sans hag a-dherag an Oen.

¹¹Ha mog aga thorment a wra yskynna trank heb worfenn ha nyns eus powes dydh ha nos dhe neb a wordh an best ha'y imaj ha pypynag a dhegemmerro merk y hanow.’

¹²Ottomma perthyans an syns, neb a with gorhemmynnow Duw, ha fydh Yesu.

¹³Ha my a glewas lev dhiworth nev ow leverel, ‘Skrif: Gwynnvys an re varow a verow y'n Arloedh alemma rag.’ ‘Ya’, yn-medh an Spyrys, ‘may hallons i powes a'ga lavur, rag yma aga oberow orth aga siwya.’

¹⁴Ha my a welas, hag otta, kommolenn wynn, ha war an gommolenn nebonan owth esedha kepar ha Mab den gans kurun owrek war y benn ha kromman lymm yn y dhorn.

¹⁵Ha ken el a dheuth yn-mes a'n tempel ow karma, ughel y lev, dhe neb o esedhys war an gommolenn, ‘Gwra gorra dha gromman ha mysi, rag bos devedhys an eur dhe vysi rag bos adhves trevas an dor.’

¹⁶Ha neb o esedhys war an gommolenn a swaysyas y gromman war an dor, ha mysys veu an dor.

¹⁷Ha ken el a dheuth yn-mes a'n tempel usi yn nev, ha ganso kromman lymm ynwedh.

¹⁸Ha ken el a dheuth yn-mes a'n alter, ha ganso charj a'n tan, hag ev a gewsis ughel y lev, dhe neb a'n jevo an gromman lymm, ow leverel, ‘Gorr dha gromman lymm ha kuntell trevas gwinwydhenn an dor, rag bos adhves hy grappys.’

¹⁹Ha'n el a swaysyas y gromman dhe'n dor, ha kuntell trevas gwinwydhenn an dor ha'y thewlel y'n winwask vras a'n sorr a Dhuw.

²⁰Ha'n winwask a veu trettys a-ves dhe'n sita, ha goes a dheuth yn-mes a'n winwask, mar ughel avel fronnow an vergh, rag mil erowhys ha hwegh kans.