Read Kernewek Diskwedhyans 2 Bible Online

Diskwedhyans 2 - Kernewek bible

Diskwedhyans 2

¹‘Dhe el an eglos yn Efesus skrif: Neb a syns an seyth sterenn yn y dhorn dhyghow ha kerdhes yn mysk an seyth kantoler owrek a lever an taklow ma:

²‘My a aswonn dha wriansow ha'th lavur ha'th perthyans, ha fatell na yllydh godhav tus dhrog, ha ty re brovas an re a lever aga bos abesteli heb bos yndellma, ha kavoes aga bos gowygyon.

³Yma genes perthyans; ty a wodhevis a-barth ow hanow, ha nyns osta skwithys.

⁴Byttegyns yma genev neppyth er dha bynn: ty re asas dha gerensa, kepar dell vedha wostalleth.

⁵Kovha, ytho, le may koedhsys anodho, ha kemmer edrek ha gwra an oberow dell wrussys kyns; poken dos dhiso yn skon a vynnav, ha gorra dha gantolbrenn mes a'y le, mar ny gemmerydh edrek.

⁶Mes an dra ma yma genes, ty dhe gasa gwriansow an Nikolaitanys a gasav vy ynwedh.

⁷Neb a'n jeffo skovarn, klewes ev an pyth a lever an Spyrys dhe'n eglosyow. Dhodho ev a fettho, my a re dhe dhybri a'n wydhenn a vewnans usi yn mysk paradhis Duw.

⁸‘Ha dhe el an eglos yn Smyrna skrif: An taklow ma a lever an kynsa ha'n diwettha, a veu marow, ha devedhys yw dhe vewnans:

⁹‘My a aswonn dha wriansow ha'th halar[1] ha'th voghosogneth (mes rych osta) ha my a aswonn blasfemi an re a lever aga bos Yedhewon, heb bos yndella, mes synaga Satnas yns i.

¹⁰Na borth own a nagonan a'n taklow na a wredh godhav. Otta, an jowl a wra tewlel re ahanowgh yn prison may fewgh prevys, ha galar a'gas bydh deg dydh. Bydh len bys yn ankow, ha kurun bewnans dhiso a rov.

¹¹Neb a'n jeffo skovarn, klewes ev an pyth a lever an Spyrys dhe'n eglosyow. Seul a fettho ny vydh pystigys der an nessa mernans.

¹²‘Ha dhe el an eglos yn Pergamum skrif: An taklow ma a lever ev ha ganso an kledha lymm dewvinyek:

¹³‘My a aswonn le mayth esos trigys,[2] le mayth usi tron Satnas, ha ty a syns ow hanow yn fast ha ny wrussys nagha ow fydh hwath y'n dydhyow na may feu ledhys Antipas ow merther len yn agas mysk, le may trig Satnas.

¹⁴Mes yma genev nebes taklow er dha bynn, rag yma genes ena an re a syns dyskas Balaam a dhyskas dhe Balak gorra maglenn a-dherag mebyon Ysrael dhe dhybri taklow offrynnys dhe idolys ha gul fornikashyon.

¹⁵Yndella ty ynwedh a'th eus re a syns dyskas an Nikolaitanys.[3]

¹⁶Kemmer edrek; poken dos dhiso yn skon a vynnav hag omladh er aga fynn gans kledha ow ganow.

¹⁷Seul a'n jeffo skovarn, klewes ev an pyth a lever an Spyrys dhe'n eglosyow. Dhe neb a fettho y rov a'n manna kudhys dhe dhybri, ha ganso ev men gwynn a rov hag y'n men hanow nowydh skrifys, nag aswonn denvyth marnas ev a'n degemmer.

¹⁸‘Ha dhe el an eglos yn Thyatira skrif: An taklow ma a lever Mab Duw a'n jeves dewlagas kepar ha flamm a dan, ha treys kepar ha brest fin:

¹⁹‘My a aswonn dha wriansow ha'th kerensa ha'th fydh ha'th wasonieth ha'th perthyans; ha'th wriansow wortiwedh yw moy es dha wriansow wor'talleth.

²⁰Byttegyns, yma genev hemma er dha bynn: ty dhe asa an venyn na Yezebel a elow hy honan profoeses dhe dhyski ha dynya ow gwesyon dhe wul fornikashyon ha dybri taklow offrynnys dhe idolys.

²¹Ha spas a res vy dhedhi dhe gemmeres edrek, mes ny vynn hi kemmeres edrek a'y fornikashyon.

²²Otta, my a's tewl yn gweli, ha'n re na a wra avoutri gensi yn galar meur, mar ny gemmerons edrek a'ga gwriansow.

²³Ha my a ladh hy fleghes yn farow; ha'n eglosyow oll a wra godhvos ow bos neb a hwila an lonethi ha'n kolonnow: hag y rov dhywgh hwi pubonan war-lergh agas gwriansow.

²⁴Mes dhywgh hwi y lavarav, ha dhe'n re erell yn Thyatira, dhe vyns na'n jeffo an dyskas ma, na wodhva, dell leverons, downderyow Satnas: ny worrav warnowgh begh arall.

²⁵Mes an pyth usi genowgh seulabrys synsiwgh ev fast erna dhyffiv.

²⁶Ha dhe neb a fettho ha gwitha ow gwriansow bys y'n diwedh, my a re galloes war an kenedhlow,

²⁷dh'aga rewlya gans gwelenn horn, kepar ha lestri pri, y fydhons i terrys dhe demmyn,

²⁸kepar dell dhegemmeris vy dhiworth ow Thas; my ynwedh a re dhodho an Vorlowenn.

²⁹Neb a'n jeves skovarn, klewes ev an pyth a lever an Spyrys dhe'n eglosyow.