Read Kernewek Diskwedhyans 3 Bible Online

Diskwedhyans 3 - Kernewek bible

Diskwedhyans 3

¹‘Ha dhe el an eglos yn Sardis skrif: An taklow ma a lever neb a'n jeves an seyth Spyrys a Dhuw, ha'n seyth sterenn: ‘My a aswonn dha wriansow. Yma hanow genes ty dhe vewa, mes marow osta.

²Bydh difun, ha krevha an taklow yw gesys, yw parys dhe verwel, rag ny gevis dha wriansow kowlwrys a-dherag ow Duw.

³Kovha, ytho, fatell re wrussys degemmeres ha goslowes; ha syns fast, ha kemmer edrek. Mar ny vynn'ta difuna, dos a wrav kepar ha lader, ha ny wre'ta godhvos py eur tyffiv er dha bynn.

⁴Byttegyns yma genes nebes henwyn yn Sardis na wrug mostya aga dillas; hag i a wra kerdhes genev, gwynn aga dillas, rag gwiw yns i.

⁵Neb a fettho a vydh gwiskys yndella yn dillas gwynn, ha ny wrav defendya y hanow yn-mes a'n lyver a vewnans, mes yth aswonnav y hanow a-dherag ow Thas hag a-dherag y eledh.

⁶Neb a'n jeves skovarn, klewes ev an pyth a lever an Spyrys dhe'n eglosyow.

⁷‘Ha dhe el an eglos yn Filadelfia skrif: An taklow ma a lever neb yw sans, neb yw gwir, neb a'n jeves alhwedh Davydh, neb a iger, ha denvyth ny dhege, ha degea ha denvyth ny iger:

⁸‘My a aswonn dha wriansow. Otta, my re worras daras igerys a-dheragos, ha denvyth ny yll y dhegea; rag bos krevder byghan genes, ha re withsys ow ger, ha ny neghsys ow hanow.

⁹Otta, y hwrav gul dhedha a'n synaga a Satnas a lever aga bos Yedhewon, ha nyns yns, mes i a wowlever — otta, y hwrav gul dhedha dos dhe omblegya a-dherag dha dreys, ha godhvos my dhe'th kara.

¹⁰Rag ty dhe witha ger ow ferthyans, my a vynn dha witha rag eur an prevyans a wra dos war oll an bys, dhe brevi an re a drig war an norvys.

¹¹My a dheu yn skon; syns yn fast an pyth usi genes ma na gemmerro denvyth dha gurun.

¹²Neb a fettho, my a'n gwra koloven yn tempel ow Duw, ha ny wra ev mos yn-mes anodho namoy, ha hanow ow Duw a skrifav warnodho, ha hanow sita ow Duw, Yerusalem nowydh, ow tiyskynna yn-mes a'n nev dhiworth ow Duw, ha'm hanow nowydh ynwedh.

¹³Neb a'n jeffo skovarn, klewes ev an pyth a lever an Spyrys dhe'n eglosyow.

¹⁴‘Ha dhe el a'n eglos yn Laodisea skrif: An taklow ma a lever an Amen, an test len ha gwir, dalleth kreashyon Duw:

¹⁵‘My a aswonn dha wriansow, nag osta na yeyn na toemm: my a vynnsa may fes yeyn po toemm.

¹⁶Ytho, drefenn dha vos mygyl, na yeyn na toemm, dha drewa yn-mes a'm ganow a wrav.

¹⁷Rag ty a lever, “Rych ov vy, ha my re siwenis, ha nyns eus edhomm vyth dhymmo vy”; ha ny wodhesta dha vos truedhek, ha pitethus, ha boghosek, ha dall ha noeth.

¹⁸My a'th kusul a brena owr prevys y'n tan dhiworthiv may fi rych, ha dillas gwynn may fi gwiskys ha na omdhiskwettho an meth a'th noethedh, ha prena eli rag ura dha dhewlagas may hylli gweles.

¹⁹Myns a garav, a geredhav ha keski. Bydh diwysyk, ytho, ha kemmer edrek.

²⁰Otta, yth esov ow sevel orth an daras ha knoukya: den mar klew ow lev hag igeri an daras, my a dheu a-ji ganso, ha koena ganso, hag ev genev vy.

²¹Neb a fettho, my a wront dhodho esedha genev war ow thron, kepar dell fethis vy ynwedh, hag esedha gans ow Thas war y dron.

²²Neb a'n jeves skovarn, klewes ev an pyth a lever an Spyrys dhe'n eglosyow.’