Read Kernewek Diskwedhyans 7 Bible Online

Diskwedhyans 7 - Kernewek bible

Diskwedhyans 7

¹Ha wosa hemma, my a welas peswar el ow sevel war an peswar korn a'n norvys, ow synsi peswar gwyns an norvys ma na hwyttha gwyns war an dor na war an mor, na war wydhenn vydh.

²Ha my a welas ken el ow tos yn-bann dhiworth an howldrevel ha sel an Duw bew ganso, hag ev a armas, ughel y lev, dhe'n peswar el may feu grontys dhedha pystiga an dor ha'n mor,

³ow leverel, ‘Na wrewgh pystiga an dor, na'n mor, na'n gwydh erna sellyn gwesyon agan Duw war aga thal.’

⁴Ha my a glewas an niver anedha a veu selys, kans peder ha dew-ugens mil a bub loeth a vebyon Ysrael.

⁵A loeth Yuda y feu selys dewdhek mil. A loeth Rewben y feu selys dewdhek mil. A loeth Gad y feu selys dewdhek mil.

⁶A loeth Asher y feu selys dewdhek mil. A loeth Naftali y feu selys dewdhek mil. A loeth Manasse y feu selys dewdhek mil.

⁷A loeth Simeon y feu selys dewdhek mil. A loeth Levi y feu selys dewdhek mil. A loeth Yssakar y feu selys dewdhek mil.

⁸A loeth Zebulun y feu selys dewdhek mil. A loeth Yosep y feu selys dewdhek mil. A loeth Benyamin y feu selys dewdhek mil.

⁹Wosa hemma, my a welas, hag otta, routh veur, na ylli denvyth hy nivera, a bub kenedhel ha loeth ha pobel ha taves; i a sevi a-dherag an tron hag a-dherag an Oen, gwiskys yn powsyow gwynn, ha palmys yn aga diwla;

¹⁰hag i a armas, ughel aga lev, ow leverel, ‘Selwyans dh'agan Duw yw esedhys war an tron, ha dhe'n Oen.’

¹¹Hag oll an eledh a sevis a-dro dhe'n tron, hag a-dro dhe'n henavogyon ha'n peswar kreatur bew, hag i a goedhas a-dherag an tron war aga fasow ha gordhya Duw,

¹²ow leverel, ‘Amen. Bennath, ha gordhyans, ha furneth, ha grasyans, hag enor, ha nerth, ha galloes re bo dh'agan Duw trank heb worfenn. Amen.’

¹³Hag onan a'n henavogyon a worthybis, ow leverel dhymm ‘Piw yw an re ma yw gwiskys yn powsyow gwynn hag a-ble teuthons?’

¹⁴Ha my a leveris dhodho, ‘Ow arloedh, ty a woer.’ Hag yn-medh ev dhymm, ‘An re ma yw neb a dheuth yn-mes a anken meur, ha re wolghas aga fowsyow ha'ga gwynnhe yn goes an Oen.

¹⁵Rakhenna, ymons i a-dherag tron Duw, hag i a'n gordh dydh ha nos yn y dempel; ev neb yw esedhys war an tron a worr y dylda warnedha.

¹⁶Ny's tevydh nown namoy, na syghes. Ha'n howl ny wra koedha warnedha, na toemmder vyth.

¹⁷Rag an Oen usi yn kres an tron a wra aga maga ha'ga hembronk bys yn fentynyow dowrow bewnans, ha Duw a wra sygha pub dagrenn a'ga dewlagas.’