Read Kernewek Pysadow Manasse 1 Bible Online

Pysadow Manasse 1 - Kernewek bible

Pysadow Manasse 1

¹A Arloedh Ollgalloesek, Duw agan tasow, Duw Abraham, Ysak ha Yakob ha'ga henedh gwiryon;

²ty neb re wrug nev ha nor gans aga splannder oll,

³neb re gargharas an mor dre er dha worhemmynn; neb re geas an downvor ha'y selya dre dha hanow euthyk ha gloryus;

⁴yma pup-tra ow krena hag ow tegrena a-dherag dha nerth,

⁵rag ny yllir perthi meuredh dha glori, ha ny yllir sevel orth sorr dha wodros erbynn peghadoryon;

⁶mes mersi dha ambos yw dres musur ha dres hwithra,

⁷rag ty yw an Ughella Arloedh, a druedh meur, leun a berthyans, leun a versi, ow tiserri pan wodhev tus anfeus drefenn peghosow.[1] Ty, A Arloedh, herwydh dha dhader meur, re ambosas edrek ha gevyans rag an re a begh er dha bynn, hag yn dha versi heb fin ty re apoyntyas edrek dhe beghadoryon may fons i selwys.

⁸Rakhenna ty, A Arloedh, Duw an re wiryon, ny apoyntsys edrek rag an re wiryon, rag Abraham, Ysak ha Yakob, na beghas er dha bynn; mes ty re apoyntyas edrek dhymmo vy, yw peghador.

⁹Rag niver an peghosow a wrug vy yw moy ages tewes an mor; pals yw ow threuspassow, A Arloedh, pals yns, ha nyns ov vy gwiw dhe vires ha gweles ughelder an nev drefenn routh ow hammwriansow.

¹⁰Plegys yn-nans ov vy gans lies kadon a horn, ma na allav drehevel ow fenn[2] drefenn ow feghosow, ha nyns eus dhymm solas; rag my re brovokyas dha sorr, ha gul an pyth yw drog a-dheragos, ow trehevel taklow kasadow, ha moghhe idolys ahas.

¹¹Lemmyn ytho my a bleg glin ow holonn, ow pysi warnas rag kuvder.

¹²My re beghas, A Arloedh, my re beghas, ha my a aswonn ow hammwriansow.

¹³My a bys ha'th konjorya, spar vy, A Arloedh, spar vy. Na'm distru drefenn ow hammwriansow. Na vydh serrys orthiv bys vykken, ow kwitha drogow er ow fynn; na'm dampen vy a-berth yn rannow isella an norvys. Rag ty, A Arloedh, yw Duw an re a goedh yn edrek,

¹⁴ha dhymmo vy ty a dhiskwa dha dhader; rag ty a'm selow, anwiw dell ov, herwydh dha versi meur,

¹⁵ha my a'th wormel heb hedhi dres oll dydhyow ow bewnans. Rag oll lu an nevow a gan dha wormola, ha dhiso jy yw an glori trank heb worfenn. Amen.