Read Kernewek Ruth 1 Bible Online

Ruth 1 - Kernewek bible

Ruth 1

¹Ha dell hwarva yn dydhyow rewl an vreusysi, yth esa divoetter y'n tir, ha gour a Bethlehem-yuda eth dhe wodriga yn tiredh Moab, ev ha'y wreg ha'y dhew vab.

²Hanow an gour o Elimelek, ha hanow y wreg o Naomi, ha'y dhew vab o Mahlon ha Kilyon, a deylu Efratha yn Bethlehem-yuda; hag i a dheuth yn tiredh Moab ha gortos ena.

³Hag Elimelek gour Naomi a verwis, ha gesys o hi, ha'y dew vab gensi.

⁴Ha'n vebyon a dhemmedhis benynes a Moab; hanow an eyl o Orpa ha hanow hy ben o Ruth, hag yth esens trigys ena a-dro dhe dheg blydhen.

⁵Ha Mahlon ha Kilyon, aga dew, a verwis ynwedh, hag omdhivesys o an venyn a'y mebyon ha'y gour.

⁶Ha hi a sevis ha dehweles a diredh Moab, ha'y gohydhow gensi, drefenn hi dhe glewes yn tiredh Moab an ARLOEDH dhe wul vri a'y bobel, ow ri dhedha bara.

⁷Ha hi a asas an tyller mayth esa hi, ha'y diw wohydh gensi, ha mos dhe dhehweles dhe bow Yuda.

⁸Hag yn-medh Naomi dh'y diw wohydh, ‘Kewgh, dehwelewgh pubonan dhe ji hy mamm. Re wrello an ARLOEDH diskwedhes tregeredh dhywgh kepar dell wrussowgh hwi dhe'n re varow ha dhymmo vy.

⁹Re rollo an ARLOEDH dhywgh may kyffowgh powes, pubonan yn chi hy gour.’ Ena hi a ammas dhedha, hag i a wrug oela dagrow, ughel aga lev.

¹⁰Hag yn-medhons i dhedhi, ‘Yn sur ni a vynn dehweles genes dhe'th pobel jy.’

¹¹Hag yn-medh Naomi, ‘Treylyewgh, ow myrghes, prag y fynnowgh mos genev? Eus mebyon dhymm y'm torr may fens i gwer dhywgh hwi?

¹²Treylyewgh, ow myrghes, kewgh, rag re goth ov vy dhe gavoes gour. Mar lavarren bos govenek dhymm yndella, ha bos gans gour haneth, ha dineythi mebyon,

¹³a wrussiwgh hwi aga gortos bys pan vons i tevesik? A wrussiwgh hwi agas omwitha a-ji, heb kavoes gour? Na, ow myrghes, rag pur hwerow yw dhymm a-barth dhywgh, bos leuv an ARLOEDH ystynnys er ow fynn.’

¹⁴Mes i a dhrehevis yn-bann aga lev, hag oela dagrow a-nowydh, hag Orpa a ammas dh'y hweger, mes Ruth a's byrlas yn tynn.

¹⁵Hag yn-medh Naomi, ‘Otta, dha hwoer dre lagha re wrug dehweles dh'y fobel hi, ha dh'y dhuwow: ty gwra dehweles ynwedh war hy lergh.’

¹⁶Hag yn-medh Ruth, ‘Na bled genev dha asa, dhe dreylya dhiworth dha lergh, rag plepynag yth ylli, yth av; ha plepynag yth osti, yth ostyav; dha bobel a vydh ow fobel ha dha Dhuw a vydh ow Duw.

¹⁷Plepynag y ferwi y farwav, hag ena y fydhav ynkleudhys; hemma re wrello an ARLOEDH dhymm ha moy yn ta, mar kwra travyth saw ankow y honan gul dibarth yntra ty ha my.’

¹⁸Ha hi a welas hy bos ervirys dhe vos gensi, ha hi a astelas kewsel orti.

¹⁹Ytho i eth yn-rag aga diw bys pan dheuthons dhe Bethlehem. Ha pan ens devedhys dhe Bethlehem, oll an sita o yn tervans a-dro dhedha, hag yn-medhons, ‘Yw hemma Naomi?’

²⁰Hag yn-medh hi dhedha, ‘Na'm gelwewgh Naomi,[1] gelwewgh vy Mara,[2] rag an Ollgalloesek[3] re'm dyghtyas yn pur hwerow.

²¹My eth dhe-ves leun, ha gwag re wrug an ARLOEDH ow daskorr; prag y'm gelwewgh Naomi, ha Duw re dhustunias er ow fynn ha'n Ollgalloesek re wrug drog dhymm?’

²²Ytho Naomi a dhehwelis, ha gensi Ruth an venyn a Moab, hy gohydh, neb a dhehwelis dhiworth powdir Moab; ha dos yn Bethlehem a wrussons yn dalleth trevas an heydh.